މިއީ ކާރިސާއެއް ދިމާވުމުން ކަންކުރަންވީ ގޮތެއް ނޫން، ރައްޔިތުންގެ ނުތަވަސްކަން އިތުރުވޭ: ސޯބެ

އައްޑޫ ސިޓީ ހިތަދޫއަށް އެރި ނަގޫރޯޅީއާ ގުޅިގެން ރައީސް އަބްދުﷲ ޔާމީންގެ ސަރުކާރުން ކަންކުރަނީ ކާރިސާއެއް ދިމާވުމުން ކަންކުރަންވީ ގޮތަށް ނޫން ކަމަށް އައްޑޫ ސިޓީ ކައުންސިލްގެ މޭއަރު އަބްދުﷲ ސޯދިގް ސޯބެ ވިދާޅުވެއްޖެއެވެ.

ނަގޫރޯޅިއާ ގުޅިގެން ހާލުގައި ޖެހުނު އާއިލާތަކަށް ސަރުކާރުން އެހީތެރިކަން ފޯރުކޮށްދޭ އުސޫލާ ގުޅޭ ގޮތުން ވާހަކަ ދައްކަވަމުން ސޯދިގް (ސޯބެ) ވިދާޅުވީ މަރުކަޒީ ސަރުކާރުގެ އެންގުމަކާ ނުލާއި, ހާލުގައި ޖެހުނު މީހުންނަން އެހީތެރިކަން ފޯރުކޮށްދެވޭނެ ގޮތެއް ނެތިފައި ސީޓީ ކައުންސިލުން 24 ގަޑީއިރު ތިބެން ޖެހުމަކީ މި ހާދިސާގައި އެންމެ ހިތްހަމަ ނުޖެހުނު ކަންތައް ކަމަށެވެ. ނަގޫރޯޅިއާ ގުޅިގެން ޖުމްލަ 29 ގެއަށް އެކި ވަރުގެ ގެއްލުން ލިބި 13 ގެއެއްގެ ފުރާޅުއެއްލާލިއިރު، އައްޑޫ ސިޓީގައި ސަރުކާރުގެ ކުންފުނިތަކާއި މުއައްސަސާތައް ތިބިއިރު ވަގުތުން ވަގުތަށް މަސައްކަތް ނުފެށުމުން ރައްޔިތުންގެ ނުތަވަސްކަން އިތުރުވެ ނަފްސާނީ ގޮތުން މީހުންނަން އަސަރުކޮށްފައިވާ ކަމަށް ސޯބެ ވިދާޅުވިއެވެ.

"ސަރުކާރުގެ ހުރިހާ މުއައްސަސާތެކެއް ވަރަށް އެކުގައި މަސައްކަތް ކުރި ދުވަހެއް މިއީ. މިކޮޅުގެ ހުރިހާ މުއައްސަސާތަކެއް ވަރަށް މަސައްކަތް ކުރުމުގެ ރޫހެއްގައި ނުކުމެތިބީ. އެހެންނަމަވެސް ހުރިހާ ބޭފުޅުން ވެސް މަޑުކޮށްގެން ތިބީ ޑިޒާސްޓަރ މެނޭޖްމެންޓުން ދެން ކުރަންވީ ކަމެއް އަންގަންދެން. އެރޭ މީހުންނަން ބޯހިޔާވަހިކަން ހޯދަދީފައި، މަގުން ގަސްތައް ނަގާ، އެއަށް ފަހު އިތުރުކަމެއް ނުކުރެވޭ، ދެން މަޑުކޮށްގެން ތިބީ ސަރުކާރުން މައުލޫމާތު ލިބޭތޯ. މެންދުރާ ހަމައަށް ހުރިހާ މުއައްސަސާތަކާއި ގުޅޭގެން އަޅުގަނޑު ވާހަކަ ދެއްކިން. ބުނީ މިނިސްޓަރު ވަޑައިގެން ބައްލަވާފައި އަންގަވާ ގޮތަކަށް ކުރިއަށް ގެންދަވާށޭ. މިކޮޅުގައި މަސައްކަތް ކުރަން މީހުން ތިބެފައި. އަޅުގަނޑުމެން ރަށުގެ މީހުންނަން މިކަން ދިމާވީ. މި ރަށުގެ މީހުން މުއައްސަސާތަކުގައި ތިބީ. އެމީހުންވެސް އެކަން ކުރަން ބޭނުން އެކަމު އެ އޮތޯރިޓީއެއް ނެތް،" ރާއްޖެއެމްވީއަށްއ މައުލޫމާތު ދެއްވަމުން އައްޑޫ ސިޓީ ކައުންސިލްގެ މޭއަރު ވިދާޅުވިއެވެ.

ނަގޫރޯޅީގައި ގެއްލުން ލިބުނު އާއިލާތަކާ ސަރުކާރުގެ ވަފުދުން ބައްދަލުކުރަނީ

އައްޑޫ ސިޓީގައި ގާއިމްކޮށްފައިވާ ސަރުކާރުގެ ކުންފުނިތަކުގައި މަސައްކަތް ކުރާނެ އެއްޗެހި ހުރި ނަމަވެސް މަސައްކަތް ކުރާނެ މީހުން 24 ގަޑީއިރުވީ އިރު، ހާލުގައި ޖެހުނު މީހުންނަން އެހީތެރިކަން ފޯރުކޮށް ނެދެވި ތިބެން ޖެހުނީ މިނިސްޓަރީތަކުން ލިބެންޖެހޭ ހުއްދަ އޭރު ނުލިބުމުން ކަމަށް ކައުންސިލުން ބުނެއެވެ. ޑިފެންސް މިނިސްޓަރު އާދާމް ޝަރީފް އުމަރު ބުރާސްފަތި ދުވަހު އައްޑުއަށް ވަޑައިގެން މުއްސަސާތަކާ ބައްދަލުކުރައްވައި މަސައްކަތް ހަވާލުކުރުމުން އަމަލީ މަސައްކަތް ފަށުމަކީ ކާރިސާއެއް ދިމާވެގެން މަސައްކަތް ކުރާ އުސޫލެއް ނޫން ކަމަށް ސޯބެ ވިދާޅުވިއެވެ.

"މިއީ އަކީ ކާރިސާއެއް ދިމާވެގެން މަސައްކަތް ކުރަންވީ ގޮތެއް ނޫން. ސަރުކާރުގެ އިސްބޭފުޅަކު ނުވަތަ ރައީސުލްޖުމްހޫރިއްޔާ އަންގަވަންދެން މަސައްކަތް ނުފެށި އޮތުމަކީ މި ދިމާވި ކާރިސާގައި އަޅުގަނޑަށް ފެނުނު އެންމެ ހިތްހަމަ ނުޖެހުނު ކަންތައް. ވިއްސާރާގައި އަހަރަކު އެއްފަހަރު ފެންބޮޑުވުން، ފުރާޅުއެއްލާލުން މިކަހަލަ ކަންތަން ރާޖޭގެ ރަށްތަކަށް ދިމާވާއިރު، މަރުކަޒީކޮށް މިކަން ކުރަންޏާ މިކަމެއް ނުވާނެ. ކޮންމެ ކަމެއް ދިމާވާއިރު ޑުރާމާ ކުޅުން އާދަވެފައި މިއޮތީ. ހެޔޮނިޔަތަކު ނޫން ކުރެވޭ ކަމެއް ކުރެވެނީ. ކޮންމެސް އެއްބޭފުޅަކު ގުޅާލައްވާފައި އެވާހަކަ ޓުވީޓް ކުރައްވާފައި،" ސޯބެ ވިދާޅުވިއެވެ.

މަސައްކަތް ކުރިއަށް ގެންދާ ކޮމެޓީ ލީޑުކުރަނީ އެމްއާރުޑީސީ

ހިތަދޫގައި ހާލުގައި ޖެހުނު ރައްޔިތުންނާ ޑިފެންސް މިނިސްޓަރު ބައްދަލުކުރުމަށް ފަހު ބޭއްވި ބައްދަލުވުމަށް ފަހު ސިޓީ ކައުންސިލް ހިމެނޭ ގޮތަށް އަށް މުއައްސަސާއެއް ބައިވެރިވާ ކޮމެޓީއެއް އެކުލަވާލި ކަމަށާއި އެ ކޮމެޓީ ލީޑް ކުރައްވަން އެމްއާރުޑީސީއާ ހަވާލުކުރި ކަމަށް ސޯބެ ވިދާޅިއެވެ. ކޮމެޓީ ލީޑް ކުރައްވަން އެމްއާރުޑީސީއާ ހަވާލުކުރުމަކީ މައްސަލައެއް ނޫންކަން ފާހަގަކުރައްވަމުން ސޯބެ ވިދާޅުވީ އެފަދަ ކޮމެޓީއެއް އެކުލަވާލުން ލަސްވުމަކީ ކަންބޮޑުވާކަމެއް ކަމަށެވެ.

ގެއްލުން ލިބުނު ގެތަކުގެ މަސައްކަތް ގުރޫޕްތަކަށް ބަހަލާއިގެން ވަރަށް ބާރަށް ކުރިއަށްދޭ

"ކޮމެޓީ މަސައްކަތް ކުރިއަށް ގެންދާނެ ގޮތެއް ހަމަޖެއްސީ، ލީޑްކުރައްވަނީ އެމްއާރުޑީސީން. އެކުންފުނީގައި ވެހިކަލްތައް ހުރުމުން އޯކޭ. އަޅުގަނޑު މި ދަންނަވަނީ އެކަން ރޭވުނުލެއް ލަސް ވާހަކަ، އެހިސާބުން މަސައްކަތް ފުށުނު، ގެތަށް ބަހާލެވުނު ގުރޫޕްތަކާއި، އެމްއެންޑީއެފަށް އެއްގެ، ޕޮލިހަށް އެއްގެ، އެމްއާރުޑީސީއަށް އެއްގެ، ހުކުރު ދުވަހުގެ މަސައްކަތުން ތިންގެއެއްގެ މަސައްކަތް ވަނީ ނިމިފައި. ދެންހުރި ގެތަކުގެ މަސައްކަތް މިހާރު ކުރިއަށް އެބަދޭ" ސޯބެ ވިދާޅުވިއެވެ.

ސަރުކަރުން މިހާރު ރަމަޞާން މަހަށް މަސައްކަތް ނިންމަން ވަރަށް ބޮޑަށް ބާރުއަޅާކަން ފާހަގަކުރަމުން ސޯބެ ވިދާޅުވި ގޮތުގައި އެކަން ސަރުކާރަށް ކުރެވެންޖެހޭނެ ކަމަށެވެ. ނަގޫރޯޅީގައި ގެތަކަށް ލިބުނު ގެއްލުމުގެ ތަފްސީލް ރިޕޯޓްތައް އައްޑޫ ސިޓީ ކައުންސިލުން ހަދާފާއިވާއިރު، ގޭގޭގައި ހިފާގެންގުޅޭ ތަކެތި ވެސް ރަމަޞާން މަހުގެ ކުރިން ފޯރުކޮށްދެވޭނެ ކަމަށް އެނާ ވިދާޅުވިއެވެ.

"ކުރެވެންވާނެ. ކީއްވެގެންތޯ ނުކުރެވެންވީ. ގޭގޭގައި ހުރި ސާމާނަން ބަލާއިރު ބާޒާރުގައި މިތާ އައްޑޫގައި އެބަހުރި ގޭގެއަށް ބޭނުވާ އެނދާއި، ބަދިގޭގެ ސާމާނާއި، ރޯދައަށް އާންމު ހާލަތަށް ގެނެއުމަށް ކުރަންޖެހޭ ހުރިހާ މަސައްކަތެއް ކުރަންޖެހޭ" ސޯބެ ވިދާޅުވިއެވެ.

ރަމަޞާން މަހުގެ އަޅުކަން ފަށުމުގެ ކުރިއަށް ރާއްޖޭގެ ރައްޔިތުން ހިތަދޫގައި ހާލުގައި ޖެހުނު މީހުންނަން އެހީތެރިކަން ފޯރުކޮށްދީ އެމީހުންގެ ދިރިއުޅުން އާންމު ހަލަތަށް ބަދަލުކުރަން މަސައްކަތް ކުރުމަށް ސޯބެ ވަނީ އިލްތިމާސްކުރައްވާފައެވެ.