އދ.ގެ އާންމު މަޖިލީހުގެ ރިޔާސަތަށް ދިވެހިރާއްޖެއިން ވާދަކުރަނީ
14 އެޕްރީލު 2020 | އަންގާރަ 13:19ރައީސް ސޯލިހު ވެރިކަމަށް ވަޑައިގަތުމަށްފަހު އެ މަސައްކަތް ދަނީ ކުރައްވަމުން
ފޮރިން މިނިސްޓަރ އަބްދުﷲ ޝާހިދު އަދި އދ.ގެ ސެކެޓްރީ ޖެނެރަލް އެންޓޯނިއޯ ގުޓޭރޭޒް
ދިވެހިރާއްޖެއިން އދ.ގެ އާންމު މަޖިލީހުގެ 76 ވަނަ ސެޝަންގެ ރިޔާސަތަށް ކުރިމަތިލާން ނިންމައިފިއެވެ.
ރާއްޖެއެމްވީއަށް މައުލޫމާތުދެމުން ފޮރިިން މިނިސްޓްރީން ބުނީ އަދ. ގެ އާއްމު މަޖިލީހުގެ ރިޔާސަތަށް ކުރިމަތިލުމަކީ ރައީސް އިބްރާހިމް މުހައްމަދު ސާލިހުގެ ޚާރިޖީ ސިޔާސަތުގެ ދަށުން ބައިނަލްއަގްވާމީ ދުނިޔެއާއި ގުޅި، ރާއްޖެއަކީ ބަސް ވިކޭ ގައުމަކަށް ހެދުމަށް ކުރާ މަސައްކަތުގެ ދަށުން ކުރަމުން އަންނަ މަސައްކަތެއް ކަމަށެވެ. އެގޮތުން، ރައީސް ސޯލިހު ވެރިކަމަށް ވަޑައިގަތުމަށްފަހު އެ މަސައްކަތް ދަނީ ކުރައްވަމުން ކަމަށްވެސް ފޮރިން މިނިސްޓްރީން ބުންޏެވެ.
ރާއްޖެއިން މިކަމަށް ޝައުގުވެރިކަން ފާޅުކޮށް، އެކުވެރި ގައުމުތަކުގެ ތާއީދު ހޯދުމަށް މަސައްކަތްތަކެއް ކުރަމުން އަންނަ ކަމަށް ފޮރިން މިނިސްޓްރީން ބުންޏެވެ. ފޮރިން މިނިސްޓްރީން ބުނީ އަދ.ގެ އާއްމު މަޖިލީހުގެ ރިޔާސަތަށް ރާއްޖެއިން ނެރޭނެ ކެންޑިޑޭޓަކީ އެކުވެރި ގައުމުތަކުން ބަލައިގަންނަ ކެންޑިޑޭޓަކަށް ވާނެ ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގެ ފަހު އަހަރު ދިިވެހިރާއްޖެއިން ވަނީ އދ.ގެ ސަލާމަތީ މަޖިލީހުގެ ގޮނޑިއަކަށްވެސް ވާދަކޮށްފައެވެ. 2019 ވަނަ އަހަރުން ފެށިގެން 2020 ވަނަ އަހަރުގެ ނިޔަލަށް ސަލާމަތީ މަޖިލީހުގެ ދާއިމީ ނޫން މެމްބަރުންގެ ގޮތުގައި ތިބޭނެ މެމްބަރުން ހޮވުމަށް އދ.ގެ އާއްމު މަޖިލީހުގައި ނެގި ވޯޓުން ރާއްޖެ އަށް ލިބުނީ 46 ވޯޓެވެ. ރާއްޖެ ވާދަކުރި އޭޝިއާ ޕެސިފިކް ސަރަހައްދަށް އޮތް ޖާގަ ކާމިޔާބު ކުރީ 144 ވޯޓާއި އެކު އިންޑޮނޭޝިއާއެވެ.
