އިންޓައަށް ބަދަލުވާން އުޅޭ ކަމަށް ދެކެވޭ ވާހަކަތައް މެސީ ދޮގުކޮށްފި

މި ސީޒަން ނިމުމުން އިންޓަ މިލާނަށް ބަދަލުވާން އުޅޭ ކަމަށް ދެކެވޭ ވާހަކަތައް ބާސެލޯނާގެ ކެޕްޓަން ލިއޮނެލް މެސީ ދޮގުކޮށްފި އެވެ.

ސްޕެއިންގެ ބައެއް މީޑިއާތަކުން މީގެ ކުރިން ވަނީ މި ސީޒަން ނިމުމުން އިޓަލީގެ އިންޓައަށް މެސީ ބަދަލުވާން އުޅޭ ކަމަށް ރިޕޯޓުކޮށްފައެވެ. ބާސާގެ ސްޕޯޓިން ޑިރެކްޓަރު އެރިކް އަބިދާލާއި މެސީއާ ދެމެދު އުފެދިފައިވާ މައްސަލަގަނޑުގެ ސަބަބުން މެސީ މި ސީޒަނަށް ފަހު ބާސާ ދޫކޮށްލާނެ ކަމަށް މީޑިއާތަކުން ވަނީ ރިޕޯޓުކޮށްފައެވެ.

ބާސާ އާއި މެސީއާ ދެމެދު ވެފައިވާ އެއްބަސްވުމުގައިވާ ގޮތުން، މި ސީޒަން ނިމުމުން އޭނާ އަށް ކްލަބު ދޫކޮށްލުމުގެ އިޚުތިޔާރު ލިބެއެވެ. އެކަމަކު ދާދި ފަހުން މެސީ ވަނީ ސޯޝަލް މީޑިއާ މެދުވެރިކޮށް އެ ޚަބަރު ދޮގުކޮށްފައެވެ.

މެސީ ބާސާ ދޫކޮށްލާނެ ކަމަށް މީޑިއާތަކުން ރިޕޯޓުކުރިއިރު، ދާދި ފަހުން ބާސާ ބޯޑުގެ ހަ މެމްބަރަކު ވަނީ މަގާމުން އިސްތިއުފާވެސް ދީފައެވެ. މި މެމްބަރުންތައް މަގާމުން އިސްތިއުފާދިނީ އެ ކްލަބުގެ ރައީސް ޖޯސެފް މާރިއާ ބާޓޮމެއޫއާ ހިތްހަމަނުޖެހިގެން ކަމަށް މީޑިއާތަކުން ވަނީ ރިޕޯޓުކޮށްފައެވެ.

ބާސާއިން އެ ކްލަބުގެ ރައީސް ބާޓޮމެއޫ ދިފާއުކޮށް، އޭނާއާ ދެކޮޅަށް މަސައްކަތްކުރާ ފަރާތްތަކުގެ އަގުވައްޓާލަން ބޭނުންވި ކަމަށްވެސް މީޑިއާތަކުގައި މީގެ ކުރިން ވަނީ އަޑު ފެތުރިފައެވެ. އަދި އެކަމަށް ކުންފުންޏެއްގެ އެހީ އެ ކްލަބުން ހޯދި ކަމަށާއި، އެގޮތުން ބާސާގެ ކެޕްޓަން ލިއޮނެލް މެސީ އާއި ޖެރާޑް ޕީކޭ އާއި ކުރީގެ ކުޅުންތެރިން ކަމަށްވާ ޒަވީ ހެނާންޑޭޒް އާއި ކާލްސް ޕުޔޯލް އަދި ކުރީގެ ކޯޗު ޕެޕް ގާޑިއޯލާގެ އަގުވައްޓާލަން ޓްވިޓާ އާއި ފޭސްބުކުގައި މަސައްކަތްކޮށްފައިވާ ކަމަށް ތުހުމަތުކުރި އެވެ.

އެފަދަ ވާހަކަތަކެއް މީޑިއާ އިން ރިޕޯޓުކުރީ އޭގެ ކުރިން މެސީއާ އެ ކްލަބުގެ ސްޕޯޓިން ޑިރެކްޓަރު އެރިކް އަބިދާލްއާ މައްސަލަތަކެއް ޖެހިފައިވަނިކޮށެވެ. މި މައްސަލަ ޖެހުނީ، ބާސެލޯނާގެ ކުރީގެ ކޯޗު އާނެސްޓޯ ވަލްވޭޑޭ މަގާމުން ވަކިކުރުމުގައި ކުޅުންތެރިންގެ ޒިންމާ ވެސް އެބައޮތް ކަމަށާއި ބައެއް ކުޅުންތެރިން ވަލްވޭޑޭގެ ކޯޗުކަމުގައި އެކަށީގެންވާ ވަރަށް މަސައްކަތް ނުކުރާ ކަމަށް އަބިދާލް ބުނުމުންނެވެ. އެކަމުގައި މެސީ ބުނީ ކުޅުންތެރިންތަކެއް ބޮލުގައި ކޯޗަށް އެއްބާރުލުން ނުދޭ ކަމަށް ބުނެ އިލްޒާމެއް އަޅުވާއިރު އެއީ ކޮން ކުޅުންތެރިންނެއްކަން އެނގެންޖެހޭނެ ކަމަށެވެ.