ކޮންޓޭ ޗެލްސީ ދޫކޮށްލަން އުޅޭ ވާހަކަ އެ ކްލަބުން ދޮގުކޮށްފި

އިނގިރޭސި ކްލަބް ޗެލްސީގެ ކޯޗް ކޮންޓޭ، މަގާމުން އިސްތިއުފާދީ ކްލަބު ދޫކޮށްލަން އުޅޭކަމަށް ދެކެވޭ ވާހަކަތައް އެ ކްލަބުން ދޮގުކޮށްފިއެވެ.

ޗެލްސީގެ ބައެއް ކުޅުންތެރިންނާއި ކޮންޓޭ އާއި ދެމެދު މައްސަލަތަކެއް ޖެހި އޭނާ ކްލަބު ދޫކޮށްލަން އުޅޭކަމަށް ސްކައި ސްޕޯޓްސް އިޓާލީއާއިން ވަނީ ރިޕޯޓްކޮށްފައެވެ. ނަމަވެސް އެ ކްލަބުން ބުނެފައިވަނީ، އެއީ އެއްވެސް ހަގީގަތެއް އެކުލެވިގެންވާ ވާހަކަތަކެއް ނޫން ކަމަށާއި، އަންނަ ސީޒަނުގައިވެސް އެޓީމުގެ ކޯޗުކަމުގެ މަގާމުގައި ހުންނާނީ ކޮންޓޭ ކަމަށެވެ.

ސްކައި ސްޕޯޓްސް އިޓާލިއާއިން ރިޕޯޓްކޮށްފައިވާ ގޮތުގައި، ޓްރާންސްފާގެ މައްސަލަތަކެއްގައި ކޮންޓޭ އާއި ޗެލްސީގެ ޑިރެކްޓަރުންނާއި ދެމެދު ވަނީ މައްސަލަތަކެއް ޖެހިފައެވެ. އެހެން ކަމުން މި މައްސަލަތަކާއި ގުޅިގެން އޭނާ ކުލަބު ދޫކޮށްލާނެ ކަމަށް ބެލެވޭ ކަމަށް ސަކައި ސްޕޯޓްސް އިޓާލިއާއިން ވަނީ ރިޕޯޓް ކޮށްފައެވެ.

ޗެލްސީގެ ކޯޗުކަމާއި ކޮންޓޭ ހަވާލުވި ފުރަތަމަ ސީޒަނުގައި އޭނާ ވަނީ އެކުލަބަށް އިނގިރޭސި ޕްރެމިއާ ލީގު ކާމިޔާބުކޮށްދީފައެވެ. ނަމަވެސް އެފްއޭކަޕް ފައިނަލުގައި އެޓީމު ވަނީ އާސެނަލް އަތުން ބަލިވެފައެވެ.

އަންނަ ސީޒަނުގެ ޗެމްޕިއަންސް ލީގަށް ޓީމު ވަރުގަދަ ކުރުމަށްޓަކާ ޓްރާންސްފާގައި ޓީމަށް މޮޅެތި ކުޅުންތެރިން ގެނައުމަށް މަސައްކަތް ކުރަމުން ދާކަމަށް މީގެ ކުރިން ކޮންޓޭ ވަނީ ބުނެފައެވެ. ނަމަވެސް ކޮންޓޭ ޝައުގުވެރިވާ ބައެއް ކުޅުންތެރިން ލިބިދާނެ ކަމާއިމެދު ސުވާލު އުފެދިފައި ވާއިރު، ދާދި ފަހުން އެޓީމުގެ ތަރި ޑިއޭގޯ ކޯސްޓާ އާއި ކޮންޓޭ އާއި ދެމެދު މައްސަލަތަކެއްޖެހި އޭނާ ކްލަބު ދޫކޮށްލަން ބޭނުންވާ ކަމަށްވެސް ވަނީ ބުނެފައެވެ.