ފަރަންސޭސްވިލާތުން ވައިރަސް ޖެހިގެން މަރުވި މީހުންގެ އަދަދު 13،000 ށް ވުރެ މައްޗަށް އަރައިފި
މަރުވި މީހުންގެ ތެރެއިން ގިނައީ ނާރސިންގ ހޯމް ތަކުގައި ތިބި މީހުން
ފަރަންސޭސްވިލާތު ގައި ކޮވިޑް-19 އަންނަނީ ހަލުވިކަމާއެކު ފެތުރެމުން
ކޮވިޑް-19 ޖެހިގެން ފަރަންސޭސްވިލާތުން މަރުވި މީހުންގެ އަދަދު 13،000 އަށް ވުރެ މައްޗަށް އަރައިފި އެވެ.
އެގައުމުގައި ހުކުރު ދުވަހު 987 މީހުން ވައިރަސް ޖެހިގެން މަރުވެފައި ވާއިރު މީގެ ތެރެއިން ގިނަ މީހުންނަކީ ނަރސިންގ ހޯމެއްގައި ތިބި ބައެއް ކަމަށް އެގައުމުން ބުނެއެވެ. މީގެ ތެރެއިން ބައެއް މީހުން އައިސީޔޫގައި ތިބިއިރު މުޅި ފަރަންސޭސްވިލާތު ގައި ވައިރަސް ފެތުރޭ މިންވަރު ކުޑަކުރެވިފައިވަނީ ކުޑަ އިންސައްތައަކަށެވެ.
ފަރަންސޭސްވިލާތު ގައި ވައިރަސް ޖެހިފައިވާ މީހުންގެ އަދަދު ވަނީ 124،869 މީހުންނަށް އަރާފަ އެވެ. ނަމަވެސް އެގައުމުގެ ސިއްހަތާއި ބެހޭ މިނިސްޓްރީން އަދި ސީދާ އަދަދުތަކެއް ހާމަނުކުރާ ކަމަށް ރޮއިޓަރސް އިން ބުނެ އެވެ. އެއީ ހޮސްޕިޓަލްތަކާއި ނަރސިންގ ހޯމްތަކު ގައި ތިބި މީހުންގެ އަދަދުތައް އަދި އެއްކޮށް ނުލިބޭތީ ކަމަށް ރޮއިޓަރސް އިން ބުނެއެވެ.
ހުކުރު ދުވަހު ފަރަންސޭސްވިލާތު ގެ ހެލްތު މިނިސްޓްރީން ބުނެފައިވަނީ 7004 މީހުން އައިސީޔޫ ތަކުގައި އެބަތިބި ކަމަށެވެ. އެއީ ބުރާސްފަތި ދުވަހާ އަޅާބަލާއިރު 1 އިންސައްތައިގެ ދަށްވުމެއް ކަމަށް އެ ގައުމުން ބުނެއެވެ.
ފަރަންސޭސްވިލާތު ގެ ނަރސިންގ ހޯމްތަކު ގައި ވައިރަސް ޖެހިގެން މަރުވަމުންދާ މީހުންނާއި ވައިރަސް ޖެހޭ މީހުންގެ އަދަދުތައް ސަރުކާރުގެ ކަމާބެހޭ އޮފިޝަލުންނާ ހަމައަށް އަންނަނީ ލަހުން ކަމަށް އެގައުމުން ބުނެއެވެ. އެހެންކަމުން އެ އަދަދުތައް ލިބުމާއެކު ނަންބަރުތައް އަންނަނީ ކުއްލިއަކަށް އިތުރުވަމުންނެވެ. އެހެން ނަމަވެސް އެގައުމުގައި ވައިރަސް ޖެހިގެން ރަސްމީކޮށް ރިޕޯޓްކުރެވޭ އަދަދުތައް އަންނަނީ އިތުރުވަމުންނެވެ.
ވައިރަސް ހަލުވިމިނު ގައި ފެތުރެމުންދާ އެހެން ގައުމުތައް ކަމަށްވާ އެމެރިކާ، އިޓަލީ، ސްޕެއިން ފަދަ ގައުމުތަކުން ކޮންމެ ދުވަހަކު ހާމަކުރަމުންދާ އަދަދުތަކާއި ޚިލާފަށް ފަރަންސޭސްވިލާތުން އަންނަނީ ވަކިވަކިން ހޮސްޕިޓަލުތަކުން ލިބެމުންދާ އަދަދުތަކާއި ނަރސިންގ ހޯމްތަކުން ލިބެމުން އަންނަ އަދަދުތައް ހާމަކުރަމުންނެވެ.
