"ރޮނާލްޑޯ ރެއާލަށް ބަދަލުވެއްޖެނަމަ އެކަމާ ހައިރާނެއް ނުވާނަން"

ޕޯޗުގަލް އަދި ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އަލުން އެނބުރި ރެއާލް މެޑްރިޑަށް ބަދަލުވި ނަމަވެސް އެކަމާ ހައިރާން ނުވާނެ ކަމަށް އޭނާ އާއެކު ޕޯޗުގަލްގެ ގައުމީ ޓީމަށް ކުޅެމުން އަންނަ ޖޯސޭ ފޮންޓް ބުނެފިއެވެ.

މީޑިއާ ރިޕޯޓުތައް ބުނާ ގޮތުން ރޮނާލްޑޯއަށް ބިޑް ކުރަން ރެއާލުން އަންނަނީ ތައްޔާރުވަމުންނެވެ. އެގޮތުން ހޫނު މޫސުމުގެ ޓްރާންސްާ ބާޒާރުގައި ރެއާލުން ރޮނާލްޑޯ ގަތުމަށް 60 މިލިއަން ޔޫރޯގެ ބިޑެއް ކުރާނެއެވެ. އަދި ޔުވެންޓަސްއަށް ދިމާވާނެ މާލީ ދަތިތަކުން އަރައިގަތުމަށް އެޓީމުން ރޮނާލްޑޯ ވިއްކާލުމަށް އޮތީ ތައްޔާރަށް ކަމަށްވެސް ވަނީ ރިޕޯޓުކޮށްފައެވެ.

ރޮނާލްޑޯ އާއެކު ޕޯޗުގަލްއަށް ކުޅެމުން އަންނަ ފޮންޓް ބުނީ ރޮނާލްޑޯ ރެއާލަށް ބަދަލުވުމުން އޭނާ އެކަމާއި ހައިރާން ނުވާނެ ކަމަށާއި، ހަގީގަތަކީ ރޮނާލްޑޯއަށް އޭނާގެ ކުރީގެ ކްލަބު ރެއާލް އަކީ ހާއްސަ ޓީމަކަށް ވުމުން ކަމަށެވެ. މީގެއިތުރުން ފޮންޓް ބުނީ ރޮނާލްޑޯ ރެއާލްގައި ހޭދަކުރި ދުވަސްވަރު އޭނާއަށް އެކްލަބުގެ ސަޕޯޓަރުންނާއި ކްލަބުގެ އިސްފަރާތްތަކުންގެ އެހީތެރިކަން ވަރަށް ބޮޑަށް ލިބުނު ކަމަށެވެ.

ރިޕޯޓުތައް ބުނާ ގޮތުން ރޮނާލްޑޯ އަލުން އެނބުރި ރެއާލްއަށް ބަދަލުވާން ބޭނުންވާ ކަމަށް އޭނާގެ އޭޖެންޓް ކައިރީގައި ވަނީ ބުނެފައެވެ. މީގެ އިތުރުން ސީޒަންގެ ކުރީ ކޮޅު ރޮނާލްޑޯ އާއި ޔުވެންޓަސްގެ ކޯޗު ސާރީއާ ދެމެދު ހިތްހަމަ ނުޖެހުންތަކެއް އުޅުނުކަމަށް ރިޕޯޓުތައް ވަނީ ބުނެފައެވެ. އެކަމަކު ސާރީ ވަނީ ފަހުން ރޮނާލްޑޯއާ އޭނާއާ ދެމެދު އެއްވެސް މައްސަލައެއް ނެތް ކަމަށް ބުނެފައެވެ.

ރޮނާލްޑޯ ރެއާލަށް ބަދަލުވާން އުޅޭކަމުގެ އަޑުތައް ގަދަވެފައިވަނިކޮށް، ރޮނާލްޑޯ ވަނީ ރެއާލްގެ ދަނޑުގައި ބާސެލޯނާއާ ދެކޮޅަށް ރެއާލް ކުޅުނު މެޗު ބަލަން ސްޕެއިނަށް ގޮސްފައެވެ. އަދި އެ މެޗުގެ ހާފް ޓައިމްގައި ރޮނާލްޑޯ ވަނީ ރެއާލްގެ ކުޅުންތެރިންނާއި ބައްދަލުކޮށްފައެވެ.

2009 ވަނަ އަހަރު މެންޗެސްޓާ ޔުނައިޓެޑުން ރޮނާލްޑޯ ރެއާލް މެޑްރިޑަށް ބަދަލުވީ އޭރުގެ އެންމެ އަގުބޮޑު ކުޅުންތެރިޔާގެ ގޮތުގައެވެ. ރެއާލް އާއެކު ހޭދަކުރި 9 ސީޒަނުގައި ރޮނާލްޑޯ ވަނީ އެޓީމަށް ކުޅެދިން 292 މެޗުން 311 ލަނޑު އެޓީމަށް ކާމިޔާބުކޮށްދީފައެވެ. އަދި ޔުވެންޓަސްއަށް ބަދަލުވެ މިހާތަނަށް ޔުވެންޓަސް އަށް އޭނާ ކުޅެދިން 53 މެޗުން ވަނީ 42 ލަނޑު އެޓީމަށް ކާމިޔާބުކޮށްދީފައެވެ. ރޮނާލްޑޯ އަކީ ރެއާލަށް މިހާތަނަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއެވެ.