ކަރަންޓީން ފެސިލިޓީ ތަކުގައި ސިއްހީ ޚިދުމަތް ދެވޭ އިންތިޒާމް ވަނީ ހަމަޖައްސާފައި: އަމީން
10 އެޕްރީލު 2020 | ހުކުރު 09:28ސިއްހީ ގޮތުން ކަމެއް ދިމާވެއްޖެވާނަމަ ޑޮކްޓަރުންނާއި ނަރުހުން އެޓެންޑްވާނެ
ހެލްތް މިނިސްޓަރު އަބްދުﷲ އަމީން
ރާއްޖޭގައި ގާއިމްކޮށްފައިވާ ކަރަންޓީން ފެސިލިޓީތަކުގައި ވެސް ސިއްހީ ޚިދުމަތް ދެވޭ އިންތިޒާމް ހަމަޖައްސާފައިވާ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ކޮވިޑް-19 ގެ އެންމެ ފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ އެއްވެސް ކަރަންޓީން ފެސިލިޓީއެއްގައި ހުރި މީހަކަށް ސިއްހީ ގޮތުން ކަމެއް ދިމާވެއްޖެ ކަމަށްވާނަމަ އެކަމަކަށް ޑޮކްޓަރުންނާއި ނަރުހުން އެޓެންޑް ވާނެ ކަމަށާއި، މި ނިޒާމުގެ ތެރެއިން ކުރެވެން ހުރި ހުރިހާ ކަމެއް ކުރާނެ ކަމަށެވެ. އެއްވެސް މީހެއްގެ ސިއްހީ ހާލަތާ މެދުގައި ފަރުވާކުޑަކޮށް ދޫކޮށްލުމަކީ ކުރެވޭނެ ކަމެއް ނޫން ކަމަށާއި، އެއީ ޒިންމާއެއް ކަމުގައި ދެކިގެން ހުރިހާ އިންތިޒާމް ތަކެއް ހަމަޖައްސާފައިވާ ކަމަށެވެ.
މިނިސްޓަރު އަމީން ވިދާޅުވީ ކަރަންޓީން ފެސިލިޓީއެއް ގައި ހުރި މީހަކު ކްރިޓިކަލް ހާލަތަކަށް ގޮސްފިކަމަށް ވާނަމަ، ހޮސްޕިޓަލް އަށް ގެންގޮސް ފަރުވާ ދެވޭނެ ރައްކާތެރި އިންތިޒާމް ވެސް ހަމަޖެހިފައިވާ ކަމަށެވެ.
މިނިސްޓަރު އަމީން ވިދާޅުވީ ރާއްޖެއިން ބޭރުގެ ގައުމުތަކުގައި ތިބި ދިވެހިން ރާއްޖެއަށް އަންނަން ބޭނުންވާތީ އެދިވެހިން ގެނައުމުގެ މަސައްކަތްތައް ސަރުކާރުން ކުރަމުންދާ ކަމަށެވެ. ރާއްޖެއަށް މިހާރު ގެނެވިފައިވާ މީހުންގެ ތެރެއިން ފަރުވާ ދޭޏްޖެހޭ މީހުން ތިބުމާއެކު އިތުރު ފަރުވާދޭ އިންތިޒާމްތައް ހަމަޖެއްސުމުގެ މަސައްކަތް ކުރަމުންދާ ކަމަށް މިނިސްޓަރު އަމީން ވިދާޅުވިއެވެ.
ރާއްޖެއިން ބޭރުގެ ގައުމުތަކުގައި ސިއްހީ ފަރުވާ ހޯދުމަށް ގިނަ ދިވެހިން ގޮސްތިބިކަން ފާހަގަކުރައްވައި މިނިސްޓަރު އަމީން ވިދާޅުވީ ރާއްޖެއިން ލިބެން ނެތް ފަރުވާއެއް ހޯދުމަށް މަޑުކުރުމަށް އިރުޝާދު ދެވިދާނެ ކަމަށެވެ.
