"އެފްރިކާ އަކީ ލެބޯޓަރީއެއް ނޫން"

ކޮރޯނާވައިރަސް (ކޮވިޑް-19) އަށް ތައްޔާރުކުރާ ފުރަތަމަ ވެކްސިން އެފްރިކާގައި ޓެސްޓުކުރުމަށް ފްރާންސްގެ ތަޖުރިބާކާރު ދެ ޑޮކްޓަރުން ދެއްކި ވާހަކައަށް ކުރީގެ މަޝްހޫރު ފުޓްބޯޅަ ކުޅުންތެރިޔާ ޑިޑިއޭ ޑްރޮގްބާ ރައްދު ދީފިއެވެ.

ފްރާންސްގެ މީޑިއާއެއްގައި އެގައުމުގެ ތަޖުރިބާކާރު ދެ ޑޮކްޓަރުން ބުނެފައިވަނީ ކޮވިޑް-19 އަށް ފުރަތަމަ ތައްޔާރުކުރާ ވެކްސިން ޓެސްޓުކުރުމަށް އެފްރިކާގެ ގައުމުތަކުގެ ބޭނުން ހިފިދާނެ ކަމަށެވެ. އެވާހަކަ އަކީ ނަސްލީ ތަފާތުކުރުން ކަމުގައި ބެލެވޭނެ ކަމަށް ބުނެ ގިނަ ބަޔަކު އަންނަނީ ޑޮކްޓަރުން ދެއްކި ވާހަކައަށް ނުރުހުން ފާޅުކުރަމުންނެވެ. މި ވާހަކަދެއްކި ދެ ޑޮކްޓަރުން ވަނީ މި ވާހަކައަކީ އެއްވެސް ހާލެއްގައި ނަސްލީ ތަފާތުކުރުމަށް ދެއްކި ވާހަކައެއް ނޫން ކަމަށާއި އެހެން ހީވާނަމަ އެކަމަށް އެންމެންގެ އަރިހުން މާފަށް އެދޭކަމަށް ބުނެފައެވެ.

އެފްރިކާ މީހުންގެ ދިފާއުގައި ގިނަ ފުޓުބޯޅަ ތަރިން އަންނަނީ ވާހަކަދައްކަމުންނެވެ. އޭގެ ތެރޭގައި ބާސެލޯނާގެ ކުރީގެ ކުޅުންތެރިޔާ ސެމިއުލް އެޓޫ އާއި ޑޮރޮގްބާ ހިމެނެއެވެ.

ޑޮރޮގްބާގެ ޓުވިޓާގައި އޭނާ ބުނީ އެފްރިކާ މީހުންނާ ދޭތެރޭ ފްރާންސްގެ ދެ ޑޮކްޓަރުން ދެއްކި ވާހަކައަކީ ބަލައިގަނެވޭނެ ވާހަކަތަކެއް ނޫން ކަމަށާއި، އެފްރިކާ އަކީ ލެބޯޓަރީއެއް ނޫން ކަމަށެވެ. މީގެ އިތުރުން ޑްރޮގްބާ ބުނީ މިއީ ކަންބޮޑުވާ މައްސަލައެއް ކަމަށާއި، މަސައްކަތް ކުރަންވީ ދުނިޔޭގެ އެންމެން ވެސް މި ބަލިމަޑުކަމުން ސަލާމަތް ކުރުމަށް ކަމަށް ބުނެފައެވެ.

ޗައިނާއިން ޑިސެމްބަރު މަހު ފެނުނު ކޮވިޑް-19 މިހާރު ވަނީ މުޅި ދުނިޔޭގެ އެކި ކަންކޮޅުތަކަށް ފެތުރިފައެވެ. އެގޮތުން މި ވައިރަސް މިހާރު އެންމެ ބޮޑަށް ފެތުރެމުން އަންނަނީ އެމެރިކާގައާ ޔޫރަޕްގައެވެ. އެފްރިކާއިން މި ވައިރަސް އެންމެ ބޮޑަށް ފެތުރެމުން އަންނަނީ ދެކުނު އެފްރިކާގައެވެ.