އެފްރިކާގެ އެންމެ މޮޅު ކުޅުންތެރިޔަކަށްވެސް މަހުރޭޒް

މިދިޔަ އަހަރު އެފްރިކާގެ އެންމެ މޮޅު ކުޅުންތެރިޔަކަށް ލެސްޓާ ސިޓީ އަށް ކުޅެމުން އަންނަ ރިޔާދް މަހުރޭޒް ހޮވައިފި އެވެ.

އަލްޖީރިއާ ގައުމީ ޓީމުގައި ހިމެނޭ މަހުރޭޒް އަށް އެފްރިކާގެ މޮޅު ކުޅުންތެރިޔާގެ މަގާމު ހޯދީ ބުރޯޝިއާ ޑޯޓްމަންޑްގެ ޕިއެރާ އެމެރިކްއާ ވާދަކޮށްގެންނެވެ. އެމެރިކް އަކީ 2015 ވަނަ އަހަރު މި މަގާމު ހޯދި ކުޅުންތެރިޔާ އެވެ.

މަހްރޭޒް އަށް މޮޅު ކުޅުންތެރިޔާގެ މަގާމު ލިބުނީ 361 ވޯޓާއެކުގައެވެ. އޭނާއާ ވާދަކުރި އެމެރިކް އަށް 313 ވޯޓު ލިބުނުއިރު، ލިވަޕޫލްގެ ފޯވާޑް ސާޑިއޯ މާނޭ އަށް ލިބުނީ 186 ވޯޓެވެ.

މަހްރޭޒް ވަނީ މިދިޔަ އަހަރު ޕީއެފްއޭގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ. އޭނާ ވަނީ މިދިޔަ ސީޒަނުގައި ލެސްޓާ އަށް 17 ގޯލު ކާމިޔާބުކޮށްފައެވެ. މީގެއިތުރުން އޭނާ ވަނީ މިދިޔަ ސީޒަނުގައި 11 ލަނޑު ޖެހުމަށްވެސް އެހީތެރިވެދީފައެވެ.

ލެސްޓާ ސިޓީ ރެލިގޭޝަން ޒޯނުން ނަގައިދީ އަދި ޗެމްޕިއަންކަމަށް ވާދަކުރާ ކުލަބަކަށް ހަދައި ދިނުމުގައި ބޮޑު ދައުރެއް އަދާކޮށްފައިވާ މަހްރޭޒް ހޯދުމަށް ގިނަ ކްލަބްތަކުން ދަނީ މަސައްކަތްކުރަމުންނެވެ. އޭގެ ތެރޭގައި އާސެނަލްގެ އިތުރުން ބާސެލޯނާއާއި ޗެލްސީންވެސް ހިމެނެއެވެ.