ޖަޕާނުގައި ކުއްލި ނުރައްކަލުގެ ހާލަތު އިއުލާން ކުރަނީ

ދުނިޔޭގެ އެކިކަންކޮޅުތަކުގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް ކޮވިޑް-19 ގެ އަސަރު ޖަޕާނަށްވެސް ކުރަމުން އަންނާތީ ޖަޕާނުގެ ބޮޑުވަޒީރު ސިންޒޯ އަބޭ ހަމަސް ދުވަހުގެ ކުއްލި ނުރައްކަލުގެ ހާލަތު އިއުލާން ކުރައްވަން އުޅޭ ކަމަށް މީޑިއާ ރިޕޯޓްތައް ބުނެފިއެވެ.

މަޝްހޫރު މީޑިއާ ރޮއިޓާސް އިން ރިޕޯޓްކޮށްފައިވާ ގޮތުގައި ޖަޕާނުގެ ބޮޑުވަޒީރު އަބޭ އަންގާރަ ދުވަހުގެ ވަގުތެއްގައި ކުއްލި ނުރައްކަލުގެ ހާލަތު އެގައުމުގައި އިއުލާން ކުރާނެއެވެ. އަދި ކުއްލި ނުރައްކަލުގެ ހާލަތުގައި އެގައުމުގެ އިގްތިސާދަށް ކުރާ އަސަރުން އަރައިގަތުމަށް ސްޓިމިއުލަސް ޕެކޭޖްތަކެއް ހެދުމަށް ސަރުކާރުން ނިންމައިފައިވާ ކަމަށް މީޑިއާ ރިޕޯޓްތައް ބުނެއެވެ.

ޖަޕާނުން މިހާތަނަށް 3،500 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު އެގައުމުން މި ވައިރަހުގައި 85 މީހުން ވަނީ މިހާތަނަށް މަރުވެފައެވެ. އަދި އެގައުމުގެ ބޮޑެތި ސިޓީތަކަށް މިވައިރަސް ދަނީ ފެތުރެމުންނެވެ. އެގޮތުން ޓޯކިޔޯއިން އެކަނިވެސް މި ވައިރަހަށް 1،000 އަށް ވުރެ ގިނަ މީހުން ވަނީ ޕޮޒިޓިވްވެފައެވެ.

މީޑިއާ ރިޕޯޓްތައް ބުނާ ގޮތުން ޖަޕާނުން ކުއްލި ނުރައްކަލުގެ ހާލަތު އިއުލާން ކުރަން އުޅެނީ އެގައުމުގެ ބައެއް ވިޔަފާރިތައް ބަންދު ކުރުމަށާއި، ރައްޔިތުން ގޭގައި މަޑުކުރުމަށް އަމުރު ކުރުމަށެވެ. ނަމަވެސް އެގައުމު ލޮކްޑައުންއަކަށް ނުދާނެ ކަމަށް ރިޕޯޓްތައް ބުނެއެވެ.