މިނިސްޓަރު އަމީން ރަޝިޔާ އަށް ކުރެއްވި ދަތުރުފުޅާ މެދު ރާއްޖޭގެ ޓްރެވަލް އެޖެންޓުންގެ ޖަމްއިއްޔާ އިން ކަންބޮޑުވެއްޖެ

ޓޫރިޒަމް މިނިސްޓަރު މުހައްމަދު އަމީން ރަޝިޔާ އަށް ކުރެއްވި ދަތުރުފުޅާ މެދު ރާއްޖޭގެ ޓްރެވަލް އެޖެންޓުންގެ ޖަމްއިއްޔާ އިން ކަންބޮޑުވެއްޖެ އެވެ.

އެސޯސިއޭޝަން އޮފް ޓްރެވެލް އެޖެންޓްސް މޯލްޑިވްސް (އޭޓީއޭ) އިން ވަނީ މިނިސްޓަރުގެ މި ދަތުރުފުޅުގައި ކަންހިނގާފައިވާ ގޮތާ މެދު ހިތްހަމަނުޖެހުން ފާޅުކޮށް ރަސްމީ ސިޓީއެއް ވެސް މިނިސްޓަރަށް ފޮނުވާފަ އެވެ.

އެ ޖަމްއިއްޔާ އިން ދެކޭ ގޮތުގައި ސަރުކާރުން އިސްނަގައިގެން ބާއްވާ ރަސްމީ ފަތުރުވެރިކަމުގެ ވަފުދުތަކުގައި އަމިއްލަ ސެކްޓަރު ބައިވެރިކުރުމުގައި ހާމަކަން ބޮޑު އަދި އިންސާފުވެރި އުސޫލެއް ގާއިމުކޮށްފައި އޮންނަން ޖެހޭނެ އެވެ.

މައުލޫމާތު ލިބިފައިވާ ގޮތުގައި އޭޓީއޭ އިން މިނިސްޓަރަށް މި މަހުގެ 19 ވަނަ ދުވަހުގެ ތާރީޚުގައި ފޮނުވި ސިޓީއެއްގައި އެ ޖަމިއްޔާއިން ވަނީ ރަޝިއާއަށް މިނިސްޓަރާ އެކު ދަތުރުކުރި ވަފުދުގެ ކަންކަން ހިނގާދިޔަ ގޮތާ މެދު ވަރަށް ބޮޑަށް ކަންބޮޑުވުން ފާޅުކޮށްފަ އެވެ.

އޭޓީއޭ އިން ފާހަގަކުރި ގޮތުގައި ކެޕިޓަލް ޓްރެވަލް، ލެޓްސް ގޯ މޯލްޑިވްސް، ޓްރެވަލް ކަނެކްޝަން، މޫދު ހޮލިޑޭސް އަދި މޯލްޑިވްސް ކަލެކްޝަން ފަދަ ދިވެހި ކުންފުނިތަކަކީ ރަޝިއާގެ މާކެޓް ކުރިއެރުވުމަށް ގިނަ އަހަރުތަކެއް ވަންދެން ބޮޑެތި އިންވެސްޓްމަންޓްތަކެއް ކޮށްފައިވާ ކުންފުނިތަކެކެވެ. ނަމަވެސް ރަޝިއާއަށް ދާ ވަފުދާ ގުޅޭ އެއްވެސް މައުލޫމާތެއް އެ ކުންފުނިތަކަށް ހިއްސާކޮށްފައި ނުވާ ކަމަށާއި، އެ ދަތުރުގައި ބައިވެރިވުމުގެ ފުރުސަތު ވެސް ދީފައި ނުވާ ކަމަށް އެ ޖަމިއްޔާއިން ބުނެފައިވެ އެވެ.

މި މައްސަލައިގައި އެ ޖަމިއްޔާގެ ކަންބޮޑުވުމަކީ ވަފުދުގައި ދަތުރުކުރާ ވަކި ބަޔަކާ މެދު އޮތް ހިތްހަމަނުޖެހުމެއް ނޫން ކަމަށާއި، އެއީ އެންމެނަށް ހަމަހަމަ ފުރުސަތުތަކެއް ލިބިދިނުމާ ގުޅޭ ކަމެއް ކަމަށް އޭޓީއޭ އިން ބުނެ އެވެ. ސަރުކާރުގެ ތާއީދާއި ތަމްސީލުވުން އޮންނަ މިފަދަ މިޝަންތަކުގައި އަމިއްލަ ފަރާތްތަކުން ބައިވެރިވުމުގެ ފުރުސަތު ދޭންވާނީ ދެފުށް ފެންނަ، އިންސާފުވެރި އަދި ހަމަހަމަ އުސޫލެއްގެ ދަށުން ކަމަށް އެ ޖަމިއްޔާއިން ދެކެ އެވެ.

މިކަމަށް ހައްލެއް ހޯދުމުގެ ގޮތުން، މިފަދަ ދަތުރުތަކުގެ މައުލޫމާތު ދުރާލައި އިންޑަސްޓްރީގައި މަސައްކަތްކުރާ ޖަމިއްޔާތަކަށް އެންގުމަށާއި، ޝައުގުވެރިކަން ފާޅުކުރުމުގެ ފުރުސަތު ހުޅުވާލުމަށް އޭޓީއޭ އިން ވަނީ ހުށަހަޅާފަ އެވެ. އަދި ޖާގަ މަދު ހާލަތްތަކުގައި ބައިވެރިން ހޮވާނެ ސާފު މިންގަނޑުތަކެއް ކަނޑައެޅުމަކީ ސަރުކާރާއި ސިނާއަތާ ދެމެދު އޮންނަ އިތުބާރު ބަދަހިވެ، އޮޅުންބޮނބުންތައް ނެތިގެންދާނެ ކަމެއް ކަމަށް ވެސް އެ ޖަމިއްޔާއިން ދެކެ އެވެ.

އޭޓީއޭ އިން ބުނެފައިވަނީ އެ ޖަމިއްޔާއިން އެދެނީ ވަކި ހާއްސަ އިނާޔަތްތަކެއް ލިބުން ނޫން ކަމަށާއި، އެދެނީ ހަމައެކަނި މައުލޫމާތު ނުލިބުމުގެ ސަބަބުން ސިނާއަތުގެ އެއްވެސް ހިއްސާދާރަކު ބާކީ ނުވުން ކަމަށެވެ. އެހެންކަމުން ކުރިއަށް އޮތް ތަނުގައި ސަރުކާރުން ކުރިއަށްގެންދާ ފަތުރުވެރިކަމުގެ ވަފުދުތަކާއި ބައިނަލްއަގުވާމީ ޕްރޮމޯޝަނަލް ހަރަކާތްތަކުގެ މައުލޫމާތު ހުޅުވާލެވިފައިވާ ސާފު އުސޫލެއްގެ ދަށުން ހިއްސާކުރުމަށް ވަނީ އެދިފަ އެވެ.

މިފަދަ ހަރުދަނާ ނިޒާމެއް ގާއިމުކުރުމުން މިނިސްޓްރީއާއި އަމިއްލަ ސެކްޓަރާ ދެމެދު އޮންނަ ގުޅުން ވަރުގަދަވެ، ބައިނަލްއަގުވާމީ މައިދާނުގައި ރާއްޖެ ތަމްސީލުކުރުމަށް ސަރުކާރާއި ސިނާއަތުގެ އެންމެ ގާބިލު ފަރާތްތައް ގުޅިގެން މަސައްކަތް ކުރުމުގެ ފުރުސަތު ލިބިގެންދާނެ ކަމަށް އޭޓީއޭ އިން ގަބޫލުކުރެ އެވެ. އަދި މި މައްސަލައަށް މިނިސްޓަރުގެ ސަމާލުކަން ލިބި، ކުރިއަށް އޮތް ތަނުގައި އިންސާފުވެރި އަދި ހާމަކަން ބޮޑު ގޮތެއްގައި ކަންކަން ކުރިއަށްދާނެ ކަމަށް އުންމީދުކުރާ ކަމަށް ވެސް އެ ޖަމިއްޔާ އިން ބުނެފައިވެ އެވެ.

ރައީސް މުއިއްޒުގެ ފަތުރުވެރިކަމާ ބެހޭ ވަޒީރު ވަރަށް ބޮޑު ޚަރަދު ކުރައްވައިގެން ރަޝިޔާ އަށް ކުރެއްވި ދަތުރުފުޅާމެދު އިންޑަސްޓްރީގެ ކަންބޮޑުވުން ފާޅުކޮށްފައިވާއިރު، މިހާރު ހިނގަމުންދާ ރަޝިޔާ-ޔޫކްރެއިން ހަނގުރާމައިގައި ޔޫކްރެއިން ކޮޅަށް ރައީސް މުއިއްޒުގެ ސަރުކާރުން ފާޅުގައި ތާއީދު ކުރަމުން ދިޔަ ނަަމަވެސް، އަމިއްލަ އޭޖެންޓުން އިސް ނަގައިގެން ރަޝިޔާ މާކެޓް ދެމެހެއްޓުމަށް މުހިންމު މަސައްކަތްތަކެއް ކުރަމުން ދިއުމުގެ ނަތީޖާ އަކީ  މިއަހަރުގެ މިހާތަނަށް 130،000 އަށްވުރެ ގިނަ ރަޝިޔާ ފަތުރުވެރިން ރާއްޖެއަށް ޒިޔާރަތްކުރުމެވެ. އެގޮތުން ރަޝިޔާއަކީ މިހާރު ރާއްޖެއަށް ދެވަނައަށް އެންމެ ގިނަ ފަތުރުވެރިން އަންނަ ޤައުމެވެ.

މައުލޫމާތު ލިބިފައިވާ ގޮތުގައި މިނިސްޓަރު އަމީންގެ މި ދަތުރުފުޅުގައި ރަޝިޔާގައި އޮޕަރޭޓް ކުރާ އަމިއްލަ އެއަރލައިންއެއް ރާއްޖެ ގެންނަން މަސައްކަތްކުރެއްވި އިރު މި ހުރިހާ ދުވަހު ރާއްޖެއަށް އޮޕަރޭޓް ކުރަމުން އައި ރަޝިޔާގެ ރަސްމީ އެއަރލައިން އެއިރޯފްލޮޓް އިން ވެސް ވަނީ ހިތްހަމަނުޖެހިފަ އެވެ.