އިސްލާމިކް ސްޓޭޓް (އައިއެސް) ގެ ހަނގުރާމަވެރިން މޫސަލްގެ ތާރިޚީ މިސްކިތެއް ކަމަށްވާ އަލް ނޫރީ މިސްކިތުގެ ވަށައިގެން ވާ މަގުތައް ބަންދުކޮށް އިރާގު ސިފައިންނާ ކުރިމަތިލުމަށް ތައްޔާރުވާން ފަށައިފިއެވެ.

މިއީ އައިއެސްގެ ކޮންޓްރޯލް އޮތް އިރާގުގެ މައި ސިޓީ ދިފާއު ކުރުމަށް އައިއެސް އިން ކުރާ އެންމެ ފަހު މަސައްކަތް ކަމަށް ވަނީ ބެލެވިފައެވެ.

ރިޕޯޓުތައް ބުނާގޮތުން ފާއިތުވި 48 ގަނޑިއިރުތެރޭ އެ ސަރަހައްދުގެ ރައްޔިތުންނަށް ވަނީ އައިއެސްގެ ހަނގުރާމަވެރިން މިސްކިތް ވަށާލާ މަންޒަރު ފެނިފައެވެ. އަލް ނޫރީ މިސްކިތަކީ 2014 ވަނަ އަަހަރު އައިއެސްގެ ލީޑަރު އަބޫ ބަކްރު އަލް ބަގްދާދީ "ޚިލާފަތެއް" އުފެއްދިކަން އިއުލާން ކުރި މިސްކިތެވެ.

އައިއެސް އިން 2014 ގައި މޫސަލް ހިފައި އަދި އިރާގާއި ސީރިޔާގެ ބިންތައް ހިފިފަހުން އައިއެސް އިން ދަނީ އަލް ނޫރީ މިސްކިތުގައި އެ ޖަމާއަތުގެ ދިދަ ވިހުރުވަމުންނެވެ.

އެމެރިކާ އިން ވާގިވެރިވާ އިރާގު ސަރުކާރުން ވަނީ އިރުމަތީ މޫސަލް މިއަހަރުގެ ޖެނުއަރީގައި އެމީހުންގެ އަތްދަށަށް ގެނެސްފައެވެ. އަދި ނިމިދިޔަ މޭމަހު ވަނީ ހުޅަނގު މޫސަލް ގައި  އައިއެސްގެ ކޮންޓްރޯލް އޮތް ސަރަހައްދުތައް ހިފުމަށް މަަސައްކަތް ފަށާފައެވެ.

އިރާގު މޫސަލްގައި ބާކީ ތިބި އައިއެސްގެ ހަނގުރާމަވެރިން އެ ސިޓީގައި ވާނީ މަރު ކަމަށް އެމެރިކާގެ އަސްކަރިއްޔާގެ އޮފިޝަލަކު މާޗް މަހު ވަނީ ވިދާޅުވެފައެވެ. މޫސަލްގެ، އައިއެސްގެ ކޮންޓްރޯލް އޮންނަ ސަރައްދުތަކުގައި ދަތި ހާލުގައި އަދިވެސް 200،00 އެއްހާ މީހުން އެބަތިއްބެވެ.