ކޮވިޑް-19: ސޯމާލިއާގެ ކުރީގެ ބޮޑުވަޒީރު ވައިރަސްއަށް ފަރުވާ ހޯއްދަވަމުން ދަނިކޮށް އަވަހާރަވެއްޖެ
2 އެޕްރީލު 2020 | ބުރާސްފަތި 16:24އަވާހަރަވިއިރު އުމުރު ފުޅަކީ 83 އަހަރުފުޅު
ސޯމާލިއާގެ ކުރީގެ ބޮޑުވަޒީރު ނޫރް ހުސައިން ހަސަން
ސޯމާލިއާގެ ކުރީގެ ބޮޑުވަޒީރު ނޫރް ހަސަން ހުސައިން އަށް ކޮވިޑް-19 ޖެހިގެން ލަންޑަންގައި ފަރުވާ ހޯއްދަވަމުންދަނިކޮށް އަވަހާރަވެއްޖެ އެވެ.
އެއާއެކު ސޯމާލިއާގައި ވަނީ ތިންދުވަސް ގައުމީ ހިތާމަފާޅުކުރާ ދުވަސްތަކެއްގެ ގޮތުގައި ހަމަޖައްސާފަ އެވެ. ސޯމާލިއާގެ ކުރީގެ ބޮޑު ވަޒީރު އަވަހާރަވެފައިވަނީ ބުދަ ދުވަހު ލަންޑަންގެ ހޮސްޕިޓަލްގައި މިވައިރަސްއަށް ފަރުވާ ހޯއްދަވަމުން ދަނިކޮށެވެ. އަވާހަރަވިއިރު އުމުރު ފުޅަކީ 83 އަހަރުފުޅެވެ.
ނޫރް ހަސަން ހުސައިން މަޝްހޫރު ނަމުންނަމަ ނޫރް އައްޑޭ ބޮޑުވަޒީރުކަން ސޯމާލިއާގައި ކުރައްވާފައިވަނީ 2007 ވަނަ އަހަރުގެ ނޮވެމްބަރ މަހުން ފެށިގެން 2009 ވަނަ އަހަރުގެ ފެބްރުއަރީ މަހުގެ ނިޔަލަށެވެ. ނޫރް އަވަހާރަވުމާއި ގުޅިގެން ސޯމާލިއާގެ ރައީސް ނެރުއްވި ބަޔާނެއްގައި ވަނީ އެގައުމުގެ ދިދަ ބައި ދަނޑިއަށް ތިރިކުރުމަށް ނިންމާފައިވާކަން ހާމަަކުރައްވާފަ އެވެ.
ނޫރް ހުސައިން އުފަންވެވަޑައިގަންފައިވަނީ 1937 ވަނަ އަހަރު އެވެ. އަދި ފުލުހުންގެ ޚިދުމަތާއި ގުޅިވަޑައިގަތުމުގެ ކުރިން އިޓަލީން ވަނީ ތައުލީމު ހާސިލްކުރައްވާފަ އެވެ. ފުލުހުންގެ ޚިދުމަތުން ވަކިވެވަޑައިގަތުމަށްފަހު ސޯމާލިއާގެ ރެޑް ކްރެސެންޓްގައި މަސައްކަތްކުރައްވާފައިވެ އެވެ. އަދި އެފްރިކާގެ ގައުމުތަކުގެ އެމްބަސެޑަރެއްގެ ގޮތުގައި އިޓަލީގައި މަސައްކަތްކުރައްވާފައިވެ އެވެ.
ނޫރް ހުސައިން ފަސްދާނަލުމަށް ހަމަޖެހިފައިވަނީ ލަންޑަންގައި ކަމަށް އެމަނިކުފާނުގެ އާއިލާއިން ވަނީ ހާމަކޮށްފަ އެވެ. އާއިލާއިން ނެރުނު ބަޔާނެއްގައި ބުނެފައިވަނީ ފާއިތުވި ދެ ހަފްތާގައި ނޫރް ހުސައިން ބައްޔަށް ފަރުވާ ހޯއްދެވުމަށް ކިންގްސް ކޮލެޖް ހޮސްޕިޓަލްގައި އޮންނަވާފައިވާ ކަމަށެވެ.
ނޫރް ހުސައިން ހަސަންއަކީ ސޯމާލިއާގެ ނުފޫޒުގަދަ ބޮޑުވަޒީރެކެވެ. އަދި އެގައުމަށް ބޮޑެތި ބަދަލުތަކެއް ގެންނެވުމުގައި އެންމެ އިސްދައުރެއް އަދާކޮށްފައިވާ ބޭފުޅަކީވެސް ނޫރް ހުސައިން ކަމަށް ގިނަ ބަޔަކު ބުނެއެވެ.
އިނގިރޭސިވިލާތުގައި ވައިރަސް ޖެހިފައިވާ މީހުންގެ އަދަދު 33000 އަށް ވުރެ މަތިވެފައިވާއިރު ދެހާހަަށްވުރެ ގިނަ މީހުން ވަނީ މަރުވެފައެވެ. ސޯމާލިއާގައި މިހާތަނަށް އާއިރު ވައިރަސް ޖެހިގެން ރިޕޯޓްކޮށްފައިވަނީ ފަސް މީހުންނެވެ. އަދި އެކަކު ވަނީ މިހާތަނަށް އާއިރު މަރުވެފައެވެ.
