ކޮވިޑް-19 ފެތުރުން ކޮންޓްރޯލް ކުރުމަށް އަޅަމުން އަންނަ ފިޔަވަޅުތައް އިތުރަށް ވަރުގަދަކޮށް، ބުރާސްފަތި ދުވަހު ފުރަތަމަ ފަހަރަށް މާލެ ހިމެނޭ ޞަރަޙައްދުގައި ކާފިއު އިޢުލާނުކޮށް އެ ވަގުތުގައި މާލެތެރެ ބެލެހެއްޓުމަށް، ކޮމިޝަނަރު އޮފް ޕޮލިސް މުޙައްމަދު ހަމީދު ނުކުމެވަޑައިގެން އަމަލީ ގޮތުން ޑިއުޓީ އަދާކުރައްވައިފި އެވެ.

މާލެ، ހުޅުމާލެ އަދި ވިލިމާލޭގައި ބުރާސްފަތި ދުވަހުގެ ހަވީރު 5-8 އަށް ކާފިއު ހިންގާފައިވާއިރު އެ ވަގުތުގައި ބޭރުގައި އުޅޭ މީހުންނަށް ފިޔަވަޅު އަޅާނެ ކަމަށް ފުލުހުން ވަނީ ބުނެފަ އެވެ. އެގޮތުން މަގުތަކުގައި އުޅޭ މީހުންނަށް ފުރަތަމަ ނަޞޭޙަތްދީ، އަދި 1،000ރ. އިން ޖޫރިމަނާ ކުރަން ވަނީ ނިންމާފައިވާ ކަމަށް ފުލުހުން ވަނީ ބުނެފަ އެވެ. ފުލުހުން ހަވީރު 5 ޖެހުމާއެކު މަގުތައް ބަލަހައްޓަމުން ގެންގޮސްފައިވާއިރު ފުލުހުން ކުރި ޓްވީޓެއްގައި ވަނީ ސީޕީ އަމަލީ ގޮތުން މަގުތަކުގައި ޖޫނިއަރ ފުލުހުންނާއެކު ހަރަކާތްތެރިވެ ވަޑައިގެންނެވިކަން ހާމަކޮށްފަ އެވެ.

ބުރާސްފަތި ދުވަހުން ފެށިގެން ވަކި މުއްދަތެއް ނެތް ގޮތަށް ކާފިއު އިއުލާންކޮށްފައިވާއިރު އިސްތިސްނާވާ ވަކި ފަރާތްތަކަށް ނޫން މީހުންނަށް މިވަގުތު ތެރޭގައި ބޭރުގައި ނޫޅެވޭނެއެވެ. މިވަގުތުތެރޭގައި ގިނަ ބަޔަކު ގޭތެރޭގައި ތިބި ނަމަވެސް މަދު ފަރާތްތަކަކުން ބޭރަށް ނިކުމެ އުޅުނުތަން ވަނީ ފެނިފަ އެވެ. އަދި އެފަރާތްތަކަށް ފުލުހުން ނަސީހަތްދިންތަންވެސް ވަނީ ފެނިފައެވެ.

ރާއްޖެއިން މިހާތަނަށް 19 މީހަކު ކޮވިޑް-19 އަށް ޕޮޒިޓިވްވެފައި ވާއިރު ވައިރަސް ފެތުރުން ކޮންޓްރޯލް ކުރުމަށް އަންނަނީ ގިނަ ފިޔަވަޅުތަކެއް އަޅަމުންނެވެ. އެގޮތުން މާލޭގެ ސަރަހައްދުގައި ބުރާސްފަތި ދުވަހުން ފެށިގެން ވަކި ވަގުތެއްގައި ބޭރަށް ނުކުތުން މަނާކޮށް، އެ ވަގުތުތަކުގައި އެއްގަމު އުޅަނދު ދުއްވުމާއި ބަހާއި ފެރީ ވެސް ހިމެނޭ ގޮތުން ޕަބްލިކް ޓްރާންސްޕޯޓް ވެސް ވަނީ ހުއްޓާލާފަ އެވެ.

ފުލުހުން ރޭ ނެރުނު ބަޔާނެއްގައި ބުނީ، މާލެ، ވިލިމާލެ އަދި ހުޅުމާލޭގައި ކާފިއު ހިންގާ ވަގުތު މަގުތަކުގައި މީހުން އުޅުމާއި އުޅަނދުފަހަރު ދުއްވުން މަނާވާނެ ކަމަށެވެ. އަދި އެހެން ވަގުތުތަކުގައި އެއްފަހަރާ ތިން މީހުންނަށް ވުރެ އިތުރަށް މަގުމަތީގައި އުޅޭ ނަމަ ނަސޭހަތްތެރިވާނެ ކަމަށާއި އެކަން ތަކުރާރުވާ ނަމަ ޖޫރިމަނާ ކުރާނެ ކަމަށް ބަޔާނުގައި ބުނެފައިވެއެވެ. އާއްމު ސިއްހަތުގެ ގާނޫނުގެ ދަށުން ރާއްޖޭގައި ފުރަތަމަ ފަހަރަށް އިއްވާފައިވާ ސިއްހީ ނުރައްކަލުގެ ކުއްލި ހާލަތުގައި، ކަރަންޓީނުކޮށް ނުވަތަ އެކަހެރިކޮށްގެން ފަރުވާ ދިނުމަށް ކުރާ މަސައްކަތަށް ހުރަސްއަޅާ ނަމަ 5،000ރ. އަށް ވުރެ ބޮޑު ނޫން އަދަދަކުން ޖޫރިމަނާ ކުރާނެ އެވެ.