އަމީރު ވިދާޅުވަނީ ސަޕްލިމެންޓްރީ ބަޖެޓެއް ހުށަހަޅަންޖެހޭ ހާލަތަށް ނުދާކަމަށް، ނަޝީދުގެ ޚިޔާލު ތަފާތު؟!
2 އެޕްރީލު 2020 | ބުރާސްފަތި 10:52ބަޖެޓު ބަދަލުކުރުމުގެ މަސައްކަތް ކުރެވޭނެ: ނަޝީދު
ފިނޭންސް މިނިސްޓަރ އިބްރާހިމް އަމީރު، މަޖިލީހުގެ ރައީސް މުހައްމަދު ނަޝީދު
ކޮވިޑް-19 އާއި ގުޅިގެން ދުނިޔޭގެ އިގްތިސާދަށް އެތައް ގެއްލުމެއް ވަމުންދާއިރު މިހާރު މިއޮތީ ސަޕްލިމެންޓްރީ ބަޖެޓު ހުށަހަޅާ ހާލަތުގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުރާސްފަތި ދުވަހު މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނަޝީދު ވިދާޅުވީ މިހާރު މިއޮތީ ސަޕްލިމެންޓްރީ ބަޖެޓު ހުށަހަޅާ ހާލަތުގައި ކަމަށެވެ.
ރައީސް ނަޝީދު މިހެން ވިދާޅުވި ނަމަވެސް ދަރުބާރުގޭގައި ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރ އިބްރާހިމް އަމީރު ސަޕްލިމެންޓްރީ ބަޖެޓެއް ހުށަހަޅާން ޖެހޭ ހާލަތެއް އަދި ނެތް ކަމަށެވެ. އެހެންނަމަވެސް، ސަޕްލިމެންޓްރީ ބަޖެޓެއް ހުށަހަޅަންޖެހޭ ހާލަތެއް އަތުވެއްޖެނަމަ، އެ ބަޖެޓް ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ.
ދައުލަތުގެ އާމްދަނީ ކުޑަވަމުންދާކަން ފާހަގަކުރައްވާ އެމަނިކުފާނު ވިދާޅުވީ އެކަންކަމުން އަރައިގަތުމަށް ކަންތައްތަކެއް ކުރަންޖެހޭ ކަމަށެވެ. ނަޝީދު ވިދާޅުވީ މާޗުމަހާއި ހަމަޔަށް ވިޔަފާރީގެ ފައިދާއާއި ޖީއެސްޓީގެ ފައިދާވެސް ރަނގަޅުކަމަށެވެ. މިއަހަރުގެ ތިން މަސްދުވަހުގެ ފައިދާ ނެގެން ޖެހޭނެ ކަމަށެވެ. ރައީސް ނަޝީދު ވިދާޅުވީ ކުލި ކަނޑާލަންޖެހޭ ރިސޯޓުތައް ބަލަންޖެހޭ ކަމަށާއި އެފަދަ ކަންކަމާއި މެދު ވިސްނަންޖެހޭ ކަމަށެވެ.
ނަޝީދު ވިދާޅުވީ ސަޕްލުމެންޓްރީ ބަޖެޓާއި މެދު ރައީސްއާއި މަޝްވަރާ ކުރައްވާފައިނުމާކަމަށެވެ. އެހެން ނަމަވެސް ބަޖެޓު ބަދަލުކުރުމުގެ މަސައްކަތް ކުރެވޭނެ ކަމަށްވެސް ވިދާޅުވިއެވެ. ފިނޭންސް މިނިސްޓަރ އަމީރު ވިދާޅުވެފައިވަނީ ކޮވިޑް-19 އާއި ގުޅިގެން ދައުލަތުގެ ބަޖެޓު 12 ބިލިއަން ޑެފިސިޓް ވާނެ ކަމަށެވެ.
