ރައްޔިތުންގެ މަޖިލީހުގެ ޖަލްސާ ނޯންނާނެ ކަމަށް ރައްޔިތުންގެ މަޖިލީހުގެ އިދާރާއިން އެންގި ނަމަވެސް ރައްޔިތުންގެ މަޖިލީހުގެ ޖަލްސާއަށް މާދަމާ ވަޑައިގަންނަވާނެ ކަމަށް އިދިކޮޅު ސިޔާސީ ޕާޓީތަކުގެ ޖޮއިންޓް ޕާލިމެންޓްރީ ގުރޫޕުން ބުނެފި އެވެ.
އިދިކޮޅު ސިޔާސީ ޕާޓީތަކުގެ ޖޮއިންޓް ޕާލިމެންޓްރީ ގުރޫޕުން ބޭއްވި ނޫސްވެރިންގެ ބައްދަލުވުގައި އެމްޑީޕީ ޕާލަމެންޓްރީ ގުރޫޕްގެ ލީޑަރު އިބްރާހިމް މުހައްމަދު ސޯލިހް ވިދާޅުވީ ރައްޔިތުންގެ މަޖިލީހުގެ ރައީސް އަބްދުﷲ މަސީހް އިތުބާރު ނެތް ކަމުގެ މައްސަލަ އޮންނަން ޖެހޭނެ ކަމަށެވެ. އަދި އެ މައްސަލަ ކުރިއަށް ނުގެންގޮސް ދެން އިތުރު މައްސަލައެއް ކުރިއަށް ނުގެންދެވޭނެ ކަމަށްވެސް ވިދާޅުވި އެވެ.
އިބްރާހިމް މުހައްމަދު ސޯލިހް ވިދާޅުވީ އެއްވެ އުޅުމުމުގެ މިނިވަން ކަމަކީ ގާނޫނޫ އަސާސީން ލިބިދީފައިވާ ހައްގެއް ކަމަށާއި މާދަމާ ބާއްވާ އެއްވުމަށް ގާނޫނީ އެއްވެސް ހުރަހެއް ނެތް ކަމަށެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް ވިދާޅުވީ ގާނޫނާ އެއްގޮތައް ހިންގާ މުޒާހަރާއެއް ހުއްޓުމުގެ ބާރު ސަލާމަތީ ހިދުމަތްތަކަށްވެސް ނޯންނާނެ ކަމަށެވެ. އަދި އެއްވެ އުޅުމުގެ މިނިވަން ކަމަކީ ގާނޫނު އަސާސީން ލިބިދީފައިވާ އޮންނަ ކަމެއްކަމަށް އަނާރާ ވިދާޅުވި އެވެ.
ރައްޔިތުންގެ މަޖިލީހުގެ ބައެއް މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ ނިންމުން ބާތިލް ކުރުމަށް ސުޕްރީމް ކޯޓަށް ހުށަހަޅާފައިވާ މައްސަލަ އަވަހަށް ނިންމާ ދިނުމަށް ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލިމެންޓްރީ ގުރޫޕުން ވަނީ ގޮވާލައިފަ އެވެ.
މި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް ވިދާޅުވީ މުޒާހަރާތައް ބްރޯޑްކާސްޓް ނުކުރެވޭނެ ކަމަށް ބުނެ ބްރޯޑްކާސްޓިން ކޮމިޝަނުން އިންޒާރު ދީފައިވާ ކަމަށެވެ. އަދި ހިޔާލުފާޅުކުރުމުގެ މިނިވަންކަމުގެ ބޭނުން ކުރުމަކީ އަސާސީ ހައްގެއް ކަމަށްވެސް ވިދާޅުވި އެވެ.
ޖުމްހޫރީ ޕާޓީގެ ޕާލަމެންޓްރީ ގުރޫޕްގެ ޑެޕިއުޓީ ލީޑަރު އަބްދުﷲ ރިޔާޒް ވިދާޅުވީ ސުޕްރީމް ކޯޓުން ވީހާވެސް އަވަހަށް މެމްބަރުންގެ ގޮނޑިގެއްލިފައިވާ މައްސަލަ ނިންމަދޭން ޖެހޭނެ ކަމަށެވެ. އަދި ވިދާޅުވީ އެ މައްސަލަ ނުނިންމަވާ އިތުރު ކަމެއް ކުރައްވަންޖެހޭނެ ކަމަށް ދެކިވަޑައިނުގަންނަވާ ކަމަށެވެ.
ގުޅިފައިވާ ސިޔާސީ ޕާޓީތަކުން ވަނީ މާދަމާ ރައްޔިތުންގެ މަޖިލީހުގެ ޖަލްސާއަށް މެމްބަރުން ވަޑައިގަންނަވާއިރު ވީހާވެސް ގިނަ ބަޔަކު އެ ބޭފުޅުންނާއެކު ނިތުމަށް ގޮވާލާފަ އެވެ. ނަމަވެސް މި މަހުގެ 31ގެ ކުރިން މަޖިލިހުގެ އެއްވެސް ޖަލްސާއެއްވެސް އަދި ކޮމެޓީއެއްގެ މަސައްކަތެއްވެސް ނުބޭއްވުމަށް މަޖިލީހުން ވަނީ އަންގާފަ އެވެ. ގުޅިފައިވާ ސިޔާސީ ޕާޓީތަކުން އެގޮތަށް ގޮވާލާފައިވާއިރު، ފުލުހުން ބުނީ، ގުޅިފައިވާ ސިޔާސީ ޕާޓީތަކުން ބާއްވަނީ ޢައިރު ޤާނޫނީ އެއްވުމެއްކަމަށެވެ. އަދި އެކަމަށް ފުރުސަތުވެސް ނުދޭނެ ކަމަށެވެ.
