އަރުޝަދުގެ ބަންދުގެ މުއްދަތު 10 ދުވަހަށް އިތުރުކޮށްފި
އަރުޝަދު ޚާލިދުގެ މައްޗަށް ޑައަމޯފިން ޓްރެފިކްކުރުމުގެ ދައުވާ ކްރިމިނަލް ކޯޓަށް ހުށަހަޅާފައިވޭ
ގދ.ހޯނޑެއްދޫ / އަލޯރާ ، އަރުޝަދު ޚާލިދު
ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި ހައްޔަރުކުރި ގދ.ހޯނޑެއްދޫ، އަލޯރާ އަރުޝަދު ޚާލިދު ގެ ބަންދަށް 10 ދުވަސް ކްރިމިނަލް ކޯޓުން އިތުރުކޮށްދީފިއެވެ.
އޭނާގެ ބަންދުގެ މުއްދަތު އިތުރުކޮށްދީފައިވަނީ ކޯޓުން އަންގާރަ ދުވަހު އޭނާ ދޫކޮށްލި މައްސަލަ ރިވިއުކޮށްދިނުމަށް ޕީޖީއަށް ފުލުހުން އެދުމުން ޕީޖީ މެދުވެރިކޮށް އެ މައްސަލަ ރިވިއުކުރުމަށް ބުދަ ކުރިމިނަލްކޯޓްގައި ބޭއްވި އަޑުއެހުމުގައެވެ.
ފުލުހުން ބުނީ މިއަހަރުގެ ޖެނުއަރީ 30 ވަނަ ދުވަހު ޑްރަގް އިންޓެލިޖެންސަށް ލިބުނު މަޢުލޫމާތަކާއި ގުޅިގެން ގދ.ހޯނޑެއްދޫ / އަލޯރާ ، އަރުޝަދު ޚާލިދު އިތުރު ބަޔަކާއި ގުޅިގެން ފުޅާ ދާއިރާއެއްގައި މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ބޭނުންކޮށް ގެންގުޅެ، އެތަކެތީގެ ޓްރެފިކްކުރާކަމަށް ތުހުމަތުކުރެވޭ މައްސަލާގައި ތަހްޤީގު ނިންމާ ޕްރޮސެކިއުޓަރ ޖެނެރަލް އޮފީހަށް ފޮނުވިފައިވާ މައްސަލާގައި ޕްރޮސެކިއުޓަރ ޖެނެރަލް އޮފީހުގެ ފަރާތުން ވަނީ އަރުޝަދު ޚާލިދުގެ މައްޗަށް ހޯމަ ދުވަހުގެ ވަގުތެއްގައި ޑައަމޯފިން ޓްރެފިކްކުރުމުގެ ދަޢުވާ ކްރިމިނަލް ކޯޓަށް ހުށަހަޅާފައެވެ.
މިމައްސަލާގައި ފުލުހުން ބަލާފާސްކުރުމަށްފަހު 09 ކިލޯއަށްވުރެ ގިނަ ޑައަމޯފިން (ހެރޮއިން) އާއި 04 ގްރާމަށް ވުރެ ގިނަ ކޮކެއިން ފެނިފައިވެއެވެ. މިމައްސަލާގައި ކުށުގެ ވެށިން ގިނަ ޢަދަދެއްގެ ފައިސާ ފުލުހުންގެ ބެލުމުގެ ދަށަށް ގެނެވިފައިވެއެވެ.
އަދި އޭގެ އިތުރުން މިމައްސަލާގައި ހިމެނޭ އަރުޝަދު ޚާލިދުގެ ނަމުގައިވާ ހުޅުވާފައިވާ ބޭންކް އެކައުންޓްތަކުގައިވާ ފައިސާއަކީ މަސްތުވާތަކެތީގެ ވިޔަފާރިކޮށްގެން ހޯދާފައިވާ ފައިސާކަމަށް ތަޙުޤީޤަށް ތުހުމަތުކުރެވޭތީ ކްރިމިނަލް ކޯޓު ޢަމުރެއްގެ ދަށުން ވަނީ ފްރީޒްކުރެވިފައެވެ. މިމައްސަލާގައި ގާތްގަޑަކަށް 4.6 މިލިއަން ރުފިޔާ ފައިސާ ފުލުހުންގެ ބެލުމުގެ ދަށަށް ގެނެވިފައިވެއެވެ.
