މި ސީޒަން ކެންސަލްކުރަން ފާޑިނަންޑް ގޮވާލައިފި

މުޅި ދުނިޔޭގައި މިހާރު ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން މިފަހަރުގެ ފުޓްބޯޅަ ސީޒަން ކެންސަލް ކުރުމަށް މެންޗެސްޓާ ޔުނައިޓެޑްގެ ކުރީގެ ޑިފެންޑަރު ރިއޯ ފާޑިނަންޑް ގޮވާލައިފިއެވެ.

ކޮވިޑް-19 ގެ ސަބަބުން ޔޫރަޕްގެ ގަދަ ފަސް ލީގުގގެ ކުޅުން ވަނީ މެދުކަނޑާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗް ލީގެވެ. އަދި ޔުއެފާ އިން ވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ފަސްކޮށްފައެވެ.

އަންނަ ސީޒަން ފަށަން ކަނޑައަޅާފައިވާ މުއްދަތުގައި މި ސީޒަނުގެ ބާކީބައި ކުޅެވުމުގެ ފުރުސަތު މިހާރު ލިބިފައިވަނީ، ކުރިއަށް އޮތް ހޫނު މޫސުމަށް ތާވަލުކޮށްފައި އޮތް އޮލިމްޕިކްސް އާއި ޔޫރޯ ފުޓްބޯޅަ މުބާރާތުގެ އިތުރުން ކޮޕަ އެމެރިކާ ފުޓްބޯޅަ މުބާރާތް އަންނަ އަހަރަށް ފަސްކުރުމުންނެވެ.

ޔޫރަޕްގެ ބައެއް ގައުމުތަކުން މި ސީޒަން އެއްކޮށް ނިންމާލާނެ ގޮތަކާ ބެހޭގޮތުން އެ ގައުމެއްގެ ކްލަބުތަކާ އެކު މަޝްވަރާކުރަމުން އައި ނަމަވެސް، މި ސީޒަން ކެންސަލްކުރަން ބައެއް ގައުމުތަކުގެ އެފްއޭ އިން އަންނަނީ މަޝްވަރާ ކުރަމުންނެވެ.

މީޑިއާތަކާ ވާހަކަ ދައްކަމުން ފާޑިނަންޑް ބުނީ ކޮވިޑް-19 ކަންތަކުގައި އަވަސް ހައްލެއް ނުހޯދިއްޖެނަމަ، އެންމެ ރަނގަޅު ގޮތަކީ މި ސީޒަން ކެންސަލް ކުރުން ކަމަށާއި ފުޓްބޯޅަ އަށް ވުރެ މިވަގުތު އިސްކަން ދޭންވީ އާންމުންގެ ސަލާމަތާއި ރައްކާތެރިކަމަށް ކަމަށެވެ.

ފާޑިނަންޑް މިހެން ބުނިއިރު، ދާދި ފަހުން ޔުއެފާ ރައީސް ސްލޮވީނިއާގެ އަލެކްސަންޑަ ސެފެރިން ވިދާޅުވީ ކޮވިޑް-19 އާ ގުޅިގެން މެދުކަނޑާލާފައިވާ ޔޫރަޕްގެ ފުޓްބޯޅަ މުބާރާތްތަށް އަލުން ފަށަން ކަނޑައަޅާފައިވާ ޕްލޭނާ އެއްގޮތަށް ނުގޮސްފިނަމަ ފުޓްބޯޅަ ސީޒަން ގެއްލުމުގެ ބިރު އެބައޮތް ކަމަށެވެ.

ކޮވިޑް-19 އާ ގުޅިގެން އޭޕްރިލް މަހުގެ 30 ގެ ނިޔަލަށް ޔޫރަޕްގެ ހުރިހާ ބޮޑެތި ލީގުތަކެއްހެން ފަސްކޮށްފައިވާއިރު، އަލުން ފެށުމަށް ކަނޑައެޅިފައިވާ ތާރީޚުގައި ލީގުތައް ފެށުން ނާދިރު ކަމަށް ފުޓްބޯޅަ ދިރާސާކުރާ މާހިރުން އަންނަނީ ތަކުރާރުކޮށް ބުނަމުންނެވެ. ރިޕޯޓުތައް ބުނާގޮތުން ޔުއެފާގެ މަޝްވަރާއެއް ނެތި ގައުމެއްގެ ފުޓްބޯޅަ ސީޒަން ކެންސަލްކޮށްފިނަމަ، އަންނަ ސީޒަނުގައި ޔޫރަޕްގެ މުބާރާތެއްގައި އެ ގައުމެއްގެ ޓީމެއް ބައިވެރިނުކުރުމުގެ ފުރުސަތު ބޮޑެވެ.