ފަލަމަސްގަނޑަށް ލިބުނު އަނިޔާއާ އެކު ބްރާވޯ އަށް ސީޒަން ނިމިއްޖެ

ފަލަމަސްގަނޑަށް ލިބުނު އަނިޔާއާއެކު މެންޗެސްޓާ ސިޓީގެ ގޯލު ކީޕަރު ކްލައުޑިއޯ ބްރާވޯ ސީޒަން ނިންމާލަން ޖެހިއްޖެ އެވެ.

މިދިޔަ ބުރާސްފަތި ދުވަހުގެ ރޭ ޔުނައިޓެޑް އާއި ސިޓީ ބައްދަލުކުރި މެޗުގައި ބްރާވޯގެ ވާތު ފައިގެ ފަލަމަސްގަނޑު ވަނީ އިރައިގެންގޮސްފައެވެ. އެގޮތުން ގޯލްޑޮޓްކޮމް އިން ވަނީ އޭނާ އަށް ސީޒަންގައި ބާކީ އޮތް ބައި ނުކުޅެވޭނެކަން ކަށަވަރުކޮށްދީފައެވެ.

ޗިލީ ގައުމީ ޓީމުގެ އެއް ނަމްބަރު ކީޕަރު ބްރާވޯ އަށް ލިބުނު އަނިޔާއާއެކު ހުކުރު ދުވަހު ވަނީ ޓެސްޓްތަކެއް ހަދާފައެވެ. އެ ޓެސްޓްތަކުން ދައްކާގޮތުގައި ތިން ހަފްތާއަށް ބްރާވޯ ކުޅުމާ ދުރުގައި ހުންނަންޖެހޭނެ އެވެ.

އެހެންނަމަވެސް ރިޕޯޓްތައް ބުނާ ގޮތުގައި ޕްރިމިއާ ލީގުގައި ވަޓްފޯޑްއާ ދެކޮޅަށް ސިޓީ ކުޅޭ ފަހު މެޗުގައި ބްރާވޯ ފެނުމުގެ ފުރުސަތު އެބައޮތެވެ. އެހެންނަމަވެސް އެއީ އޭނާ ފަރިތަކުރުމާ ގުޅި އެއްކޮށް ފިޓްވެއްޖެނަމައެވެ.

ސިޓީގެ ކުރީގެ ކީޕަރު ޖޯ ހާޓް ލޯން އެއްބަސްވުމެއްގެ ދަށުން ފޮނުވާލުމާއެކު، ސިޓީގެ ސަޕޯޓަރުން ތިބީ ރުޅިގަދަވެފައެވެ. އެގޮތުން އެ ސަޕޯޓަރުންގެ ގިނަ ފާޑުކިޔުން ސިޓީގެ ކޯޗު ޕެޕްގާޑިއޯލާއަށްވެސް އަމާޒުވިއެވެ.

ޔޫރަޕްގެ މަޝްހޫރު ގިނަ ކްލަބްތަކުން ހުށަހެޅުންތައް ލިބެމުން އަންނަ ބްރާވޯ މި ސީޒަނަށް ފަހު ސިޓީ ދޫކޮށްލާނެ ކަމަށް ނުބެލެވެއެވެ. އެގޮތުން އޭނާ ސިޓީއާއެކު ޕްރީ ސީޒަން ދަތުރުތަކުގައި ބައިވެރިވާނެ ކަމަށް ރިޕޯޓްތައް ބުނެއެވެ.

ބާސެލޯނާ ދޫކޮށްލުމަށްފަހު ސިޓީ އަށް ބަދަލުވެ ބްރާވޯ ވަނީ އެޓީމަށް މިވީތަނަށް 26 މެޗު ކުޅެދީފައެވެ. އޭނާ ވަނީ ބާސާގައި ހޭދަކުރި ތިން ސީޒަނުގައި އެޓީމާއެކު ދެ ލަލީގާ، ދެ ކޮޕާޑެލްރޭ، އެއް ސްޕެނިޝް ސުޕާކަޕް، ޔުއެފާ ސުޕާކަޕް އަދި ފީފާ ކްލަބް ވޯލްޑްކަޕް ކާމިޔާބުކޮށްފައެވެ.