"ޕީއެފްއޭ ފޭންސް ޕްރެމިއާ ލީގު ޕްލެއާ އޮފް ދަ ސީޒަން" އެވޯޑް ހެރީ ކޭން ހާސިލްކޮށްފި

ކުޅިވަރު ހަބަރު ފަތުރާ ވެބްސައިޓެއް ކަމަށްވާ "ސްކައި ސްޕޯޓްސް" އިން ހޮވާ، "ޕީއެފްއޭ ފޭންސް ޕްރެމިއާ ލީގު" އެވޯޑުގެ ސީޒަނުގެ އެންމެ މޮޅު ކުޅުންތެރިޔާގެ މަގާމް ޓޮޓެންހަމްގެ ތަރި ހެރީ ކޭން ހާސިލްކޮށްފިއެވެ.

ކޭން މި އެވޯޑް ހާސިލްކުރީ، ސްކައި ސްޕޯޓްސްގެ ވެބްސައިޓާއި، އެޕްލިކޭޝަންތައް މެދުވެރިކޮށް، ސަޕޯޓަރުންގެ މެދުގައި ނެގި ވޯޓުންނެވެ.

ވޯޓުގައި ކޭންއާ އެންމެ ކައިރިން ވާދަކުރީ ޗެމްޕިއަން ޗެލްސީގެ، ކަންޓޭ އާއި އެޑެން ހަޒާޑް އެވެ. ޖުމްލަ 16،378 ވޯޓާއިއެކު ކޭން އެއްވަނަ ހޯދިއިރު، ދެވަނައަށް ހޮވުނީ 13،515 ވޯޓާއިއެކު ކަންޓޭ އެވެ. ތިން ވަނައަށް ހޮވުނު އެޑެން ހަޒާޑް އަށް ލިބިފައިވަނީ 8،412 ވޯޓެވެ.

މި އެވޯޑަށް ވާދަކުރާ ގަދަ 6 ކުޅުންތެރިން ހޮވާފައި ވަނީ ސްކައި ސްޕޯޓްސްގެ ކުޅިވަރާ ބެހޭ ތަޖުރިބާކާރުންގެ މެދުގައި އެކުލަވާލެވިފައިވާ ޕެނަލް އަކުންނެވެ. އެގޮތުން މަގާމަށް ވާދަކޮށްފައިވާ 6 ކުޅުންތެރިންނަކީ، ކޭން އާއި، ކަންޓޭ އަދި، ހަޒާޑްގެ އިތުރުން، އާސެނަލްގެ އެލެގްސިސް ސަންޗޭޒް އާއި، ޓޮޓެންހަމްގެ މީޑްފިލްޑާ ޑެލެ އަލީ އާއި، އެވަޓަންގެ ސްޓްރައިކަރު ރޮމެލޫ ލުކާކޫ އެވެ.

އެންމެ މޮޅު ކުޅުންތެރިޔާގެ މަގާމު ހޯދި ކޭން ވަނީ މިފަހަރުގެ ސީޒަނުގައި ޓޮޓެންހަމް އަށް 29 ގޯލު ކާމިޔާބުކޮށްދީ، 7 ގޯލު ޖެހުމަށް އެހީތެރިވެ ދީފައެވެ. މިސީޒަނަކީ ޓޮޓެންހަމްއިން ނިންމާލި އެކުލަބުގެ އެންމެ ކާމިޔާބު ސީޒަން ކަމަށް ގިނަ ބަޔަކު ބުނަމުން ދާއިރު، ކޭން އަކީ ވަނީ ލީގުގެ ދެވަނަ މަގާމު ޓޮޓެންހަމްއަށް ހޯދައިދިނުމުގައި މުހިންމު ދައުރެއް އަދާކޮށްފައެވެ.

ކޭން ވަނީ އެންމެ ގިނަ ގޯލު ކާމިޔާބުކޮށްގެން ރަން ބޫޓުވެސް ހާސިލް ކޮށްފައެވެ.