މަޖިލީހުގެ ޖަލްސާތައް އޮންލައިންކޮށް ބޭއްވުން: މިއީ މިގޮތަށް ޖަލްސާތައް ބާއްވާ ދުނިޔޭގެ ފުރަތަމަ މަޖިލިސް

ރައްޔިތުންގެ މަޖިލީހުން އޮންލައިންކޮށް، ވީޑިއޯ ކޮންފަރެންސް މެދުވެރިކޮށް، މަޖިލީހުގެ ޖަލްސާތައް ބާއްވަން ނިންމާފައިވާތީ، މިއީ ދުނިޔޭގައި މިގޮތަށް ވީޑިއޯ ކޮންފަރެންސް މެދުވެރިކޮށް ބާއްވާ، ގައުމެއްގެ ގާނޫނު ހަދާ މަޖިލީހެއްގެ ފުރަތަމަ ބައްދަލުވުންކަން ހާމަކޮށް ބައިނަލްއަގްވާމީ ބައެއް މީޑީއާތަކުން އެކަން ފާހަގަކޮށްފި އެވެ.

ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ރޯގާއާ ގުޅިގެން ގިނަ ގައުމުތަކަކަށް އެބަލީގެ ނުރައްކަލާ ކުރިމަތިވެފައިވާއިރު، ރާއްޖޭގައިވެސް ވަނީ އާންމު ސިއްހަތުގެ ނުރައްކަލުގެ ހާލަތު އިއުލާންކޮށްފައެވެ. އެހެންކަމުން ސަރުކާރުގެ އޮފީސްތައް ބަންދުކޮށް، އަދި ގާނޫނު ހަދާ މަޖިލީހުގެ މަސައްކަތްތައްވެސް ގޭގައި ކުރަންޖެހިފައިވާ ދަނޑިވަޅުގައި، ގާނޫނު ހަދާ މަޖިލީހުން ރައްޔިތުންނަށްޓަކައި ކުރަންޖެހޭ ކަންކަން ކުރުމަށްޓަކައި މަޖިލީހުން ވަނީ ވީޑިއޯ ކޮންފަރެންސް މެދުވެރިކޮށް މަޖިލީހުގެ ޖަލްސާތަކާއި ކޮމެޓީގެ މަސައްކަތްތައް ކުރުމަށް ނިންމާފަ އެވެ.

Advertisement

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އާ ހަވާލާދެއްވައި ބައިނަލްއަގްވާމީ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި، މިފަދަ ހާދިސާތަކުގައިވެސް، ރައްޔިތުން ތަމްސީލްކުރާ ދުނިޔޭގެ ގާނޫނު ހަދާ މަޖިލިސްތަކުގެ ދައުރު ހުއްޓިގެން ނުދާނެގޮތަކަށް ކަންކަން ބައްޓަން ކުރަންޖެހެއެވެ. އެގޮތުން ރާއްޖޭގެ ގާނޫނު ހަދާ މަޖިލީހުން ވަނީ އޮންލައިންކޮށް، މަޖިލީހުގެ މަސައްކަތްތައް ކުރުމަށް ނިންމާފައިކަމަށްވެސް ރައީސް ނަޝީދު ވިދާޅުވެފައިވެއެވެ.

ރައްޔިތުންގެ މަޖިލީހުން ވަނީ މަޖިލީހުގެ ރައީސް، ރައީސް ނަޝީދުއާއި މަޖިލީހުގެ މެމްބަރުން ހިމެނިވަޑައިގަންނަވާ ގޮތަށް މަޖިލީހުގެ ޖަލްސާތައް ވީޑިއޯ ކޮންފަރެންސްކޮށް، ކުރިއަށް ގެންދާނެ ގޮތުގެ ރިހާސަލެއް ހޮނިހިރު ދުވަހު ކުރިއަށް ގެންގޮސްފަ އެވެ.

މަޖިލީހުން ވަނީ ހޯމަ ދުވަހުގެ ޖަލްސާގެ އެޖެންޑާ ވެސް އާންމުކޮށްފަ އެވެ. މަޖިލީހުގެ ހޯމަ ދުވަހުގެ ޖަލްސާ ފެށުމަށް ނިންމާފައިވަނީ ހެނދުނު 11:00 ގައެވެ.

އެޖެންޑާގައިވަނީ، މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ދަށުން ހުށަހަޅާ ކަމެއް އެކަންޏެވެ. އެއީ، ކޮވިޑް-19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން އާއިލާތަކައި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމަށް، ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ (ހ)ގެ ދަށުން އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް ފޮނުއްވާފައިވާ މައްސަލަ އެވެ.

މަޖިލީހުގެ ޖަލްސާތައް ވެބް ކޮންފަރެންސް މެދުވެރިކޮށް، ކުރިއަށް ގެންދާއިރު، މަޖިލީހުގެ މެމްްބަރުންގެ އިތުރުން އިދާރީ ބައެއް މުއައްޒަފުންނާއެކު 92 ބައިވެރިންނަށް ބައިވެރިވެވޭގޮތަށް އުސޫލެއް ރައްޔިތުންގެ މަޖިލީހުގެ އާންމު ކޮމެޓީން ވަނީ ފާސްކޮށްފަ އެވެ.

މަޖިލީހުގެ އާންމު ކޮމެޓީގެ ރިޕޯޓްގައި ބުނެފައިވަނީ، ރައްޔިތުންގެ މަޖިލީހުގެ 87 މެމްބަރުންނާއި އަމީން ޢާންމު، ކައުންސެލަރ ޖެނެރަލް، ސާޖަންޓް އެޓް އާމްސް، އަދި މި މަސައްކަތާގުޅޭ އިދާރީ މުވައްޒަފުން ހިމެނޭގޮތަށް ޖުމްލަ 92 ބައިވެރިން ކޮންމެ ވެބް ކޮންފަރެންސިންގ ޗެނަލްއެއްގައި ހިމެނިގެން، ޖަލްސާތައް ބޭއްވުމުގެ އިންތިޒާމު ހަމަޖެހިގެންދާނެ ކަމަށެވެ.

ކޮމެޓީން ފާސްކުރި އުސޫލުގައިވާގޮތުން ބަހުސަށް ހުޅުވާލެއްވުމުން، މެންބަރުން ފުރުޞަތަށް އެދިވަޑައިގަންނަވަންޖެހޭނީ ވެބް ކޮން ފެރެންސިންގ އެޕްލިކޭޝަނުގެ "ޗެޓް" ބޭނުންކުރައްވައިގެން ނެވެ. އަދި ނިޒަމީ މައްސަލައެއް ފާހަގަ ކުރެއްވުމަށްވެސް "ޗެޓް" ބޭނުން ކުރެއްވައި، އެމައްސަލައެއް ފާހަގަކުރެއްވޭގޮތަށް ވަނީ ހަމަޖެހިފަ އެވެ.

ވޯޓުލުމުގެ ކަންކަން ކުރިއަށްދާނީ، ރައްޔިތުންގެ މަޖިލީހުގެ ގަވާއިދުގެ 194 ވަނަ މާއްދާގައި ބަޔާންކޮށްފައިވާގޮތަށް ވަކިވަކިން މެންބަރުންނާ ސުވާލު ކުރައްވައިގެންކަމަށްވެސް މި އުސޫލްގައިވެއެވެ. އެގޮތުން ވޯޓު ނެގުމުގައި ކޮންމެ މެންބަރެއްގެ ނަން އިޢުލާނުކުރުމުން ފެންނަނަމަ "ފެނޭ" ނުފެންނަނަމަ "ނުފެނޭ" އަދި ވަކިގޮތަކަށް ވޯޓް ދޭން ބޭނުން ނޫންނަމަ "ވޯޓް ނުދެން" މިހެން ހާމަކުރަން ޖެހޭނެކަމަށްވެސް އުސޫލްގައި ބަޔާން ކޮށްފައިވެއެވެ.