މުސާރާ ކުޑަކުރަން ރޮނާލްޑޯ ނިންމައިފި

ޔުވެންޓަސްގެ މުސާރަ ކުޑަކުރަން ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ނިންމައިފި އެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ ހުއްޓުމަކަށް އައިސްފައިވާއިރު، ގިނަ ކްލަބުތަކަށް ވަނީ މާލީ ގޮންޖެހުންތަކާ ކުރިމަތިލާން ޖެހިފައެވެ. ޔޫރަޕްގެ ބައެއް ކްލަބުތަކުގެ ކުޅުންތެރިން މުސާރާ ނުނަގަން ނިންމާފައިވާއިރު، ބައެއް ކްލަބުތަކުން ވަނީ މުސާރަ ކުޑަކޮށްފައެވެ.

ޔުވެންޓަސްއިން ކުޅުންތެރިންގެ މުސާރަ ކުޑަކޮށްފައި ނުވި ނަމަވެސް، ރޮނާލްޑޯ ވަނީ އޭނށާގެ މުސާރާއިން 3.8 މިލިއަން ޔޫރޯ މަދުކުރަން ނިންމާފައެވެ. ޔުވެންޓަސްއާއެކު ރޮނާލްޑޯއަށް އަހަރަކު 30 މިލިއަން ޔޫރޯގެ މުސާރައެއް ލިބެއެވެ.

އަމިއްލަ މުސާރަ ކުޑަކުރަން ރޮނާލްޑޯ ނިންމިއިރު، ދާދި ފަހުން ރޮނާލްޑޯ އާއި އޭނާގެ އޭޖެންޓް ޖޯޖް މެންޑޭޒް ވަނީ ޕޯޗުގަލްގެ ދެ ސަރަހައްދެއްގެ ހޮސްޕިޓަލްތަކަށް 1 މިލިއަން ޔޫރޯ ހަދިޔާކޮށްފައެވެ.

މިހާތަނަށް ޔުވެންޓަސްއިން ކޮވިޑް-19 އަށް ތިން ކުޅުންތެރިއަކު ވަނީ ޕޮޒިޓިވްވެފައެވެ. އެއީ ޕައުލޯ ޑިބާލާ އާއި ބްލައިސް މަޓުއިޑީ އާއި ޑެނިއަލީ ރުގާނީ އެވެ. އިޓަލީން މިވައިރަހަށް ޕޮޒިޓިވްވި ފުޓްބޯޅަ ކުޅުންތެރިންގެ އަދަދު 13 އަށް އަރާފައިވާއިރު، އިޓަލީގައި ކުރިޔަށްދާ ކުޅިވަރު ހަރަކާތްތައް އަންނަ އޭޕްރީލް މަހުގެ ތިންވަނަ ދުވަހުގެ ނިޔަލަށް ހުއްޓާލުމަށް އެގައުމުގެ ސަރުކާރުން ވަނީ ނިންމާފައެވެ.