ފޯކްލޭންޑުގައި ކޮވިޑް-19 ފެތުރުމުގެ ބިރު އޮތުމުން ގިނަ ބަޔަކު އެކަހެރިކޮށްފި
28 މާރިޗު 2020 | ހޮނިހިރު 12:08ކުޑަ ކުއްޖަކަށް ދަނީ ފަރުވާދެމުން
ފޯކްލޭންޑްގެ ވެރިރަށް މަތިން ނަގާފައިވާ މަންޒަރެއް
ސައުތް އެޓްލާންޓިކް ގައި އޮންނަ ފޯކްލޭންޑު (އިސްލާސް މަލްވީނަސް) ގައި ކޮވިޑް-19 ފެތުރިދާނެ ކަމުގެ ބިރު އޮތުމުން ރައްކާތެރިކަމުގެ ފިޔަވަޅެއްގެ ގޮތުން ގިނަ ބަޔަކު އެކަހެރިކޮށްފިއެވެ.
އާބާދީގައި 3000 އެއްހާ މީހުން ދިރިއުޅޭ ފޯކްލޭންޑުން ކޮވިޑް-19 އަށް ޝައްކުކުރެވޭ އަލާމާތްތަކެއް ފެނިގެން ވެރިރަށް ސްޓޭންލީގެ ހޮސްޕިޓަލުގައި ކުޑަ ކުއްޖަކަށް ދަނީ ފަރުވާދެމުންނެވެ. އަދި މިހާތަނަށް އެ ކުއްޖާގެ ޓެސްޓުގެ ނަތީޖާ ހާމަކޮށްފައެއް ނުވެއެވެ.
މިހާތަނަށް ބައްޔަށް އެއްވެސް މީހަކު ޕޮޒިޓިވްވެފައިވާ ކަން ހާމަނުކުރި ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން ގިނަ ބަޔަކު ވަނީ އެކަހެރި ކޮށްފައެވެ.
ފޯކްލޭންޑުގެ ޑިރެކްޓަރ އޮފް ނެޗުރަލް ރިޒޯސަސް ޑރ. އެންޑްރިއާ ވިދާޅުވީ، އެ ގައުމުގައި ބަނދަރު ކޮށްފައި އޮތް ހަތް ކްރޫޒްލައިނަރ އެއްގައި ތިބި މީހުން ފޮނުވާލުމުގެ މަސައްކަތް ކުރަމުންދާ ކަމަށެވެ. އޭގެ ތެރޭގައި އިިނގިރޭސިވިލާތުގެ މީހުންވެސް ހިމެނޭ ކަމަށާއި، ޗާޓަރ ފްލައިޓެއްގައި އެ އެންމެން ފޮނުވާލުމުގެ މަސައްކަތް ކުރިޔަށްދާ ކަމަށެވެ. އޭނާ ވިދާޅުވީ، ރައްކާތެރިކަމުގެ ފިޔަވަޅެއްގެ ގޮތުން ބައްޔަށް ޝައްކު ކުރެވޭ އެއްވެސް މީހަކު އެ ގައުމަށް ފޭބުމުގެ ހުއްދަ ނުދޭނެ ކަމަށެވެ.
ފޯކްލޭންޑަކު ކޮވިޑް-19 އަށް ޓެސްޓު ކުރެވޭ ކިޓްތަކެއް ނުހުރެއެވެ. އެހެން ކަމުން ޓެސްޓުކުރަބް ސާމްޕަލްތައް ފޮނުވަން ޖެހެނީ 8000 މޭލު ދުރުގައި އޮންނަ އިނގިރޭސިވިލާތަަށެވެ. ފޯކްލޭންޑަކީ ދެކުނު އެމެރިކާގެ އިރުމަތީގައި އޮންނަ، އިނގިރޭސިންގެ ބާރު ހިނގާ ޖަޒީރާއެކެވެ.
