ޝީޝާ އާއި ކާބޯތަކެތީގެ ހިދުމަތް ދިނުން މަނާކޮށްފައި ވަނިކޮށް އެ ހިދުމަތް ދިން ފަސް ކެފޭއެއް ޖޫރިމަނާކޮށްފިއެވެ.

ފުލުހުން ބުނީ ޑިރެކްޓާ ޖެނެރަލް އޮފް ޕަބްލިކް ހެލްތުގެ އެންގުމާ ހިލާފަށް، މި މަހުގެ 20 ވަނަ ދުވަހު ޝީޝާގެ ހިދުމަތް ދިން ދެ ކެފޭއެއް ޖޫރިމަނާކޮށްފައިވާ ކަމަށެވެ.

ހަލުވިކަމާއެކު ކޮވިޑް-19 ފެތުރެމުންދާތީ ކެފޭތަކާއި ރެސްޓޯރެންޓް ފަދަ ތަންތަނުގައި ޝީޝާ ބުއިމާއި ޝީޝާގެ ހިދުމަތް ދިނުން މަނާކުރީ މި މަހުގެ 19 ވަނަ ދުވަހުގެ ރޭ 12:00 އިން ފެށިގެންނެވެ.

މީގެ އިތުރުން ކާބޯތަކެތީގެ ހިދުމަތް ދީގެން މި މަހުގެ 23 ވަނަ ދުވަހު ކެފޭއަކާއި 24 ވަނަ ދުވަހު ދެ ކެފޭއެއް ޖޫރިމަނާކޮށްފައިވާ ކަމަށް ފުލުހުން ބުނެއެވެ.

މިހުރިހާ ތަންތަން ޖޫރިމަނާކޮށްފައިވަނީ 5000 ރުފިޔާއިންނެވެ.

އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން ޑިރެކްޓާ ޖެނެރަލް އޮފް ޕަބްލިކް ހެލްތު އަންގާ އެންގުންތަކަށް ބޯނުލަބައިފި ނަމަ، އެ މީހުންގެ ނަން ހާމަކޮށް، 5،000 ރުފިޔާއަށްވުރެ، ބޮޑު ނޫން އަދަދަކުން ޖޫރިމަނާ ކުރެވޭނެ ކަމަށް އެޗްޕީއޭ އިން ވަނީ ބުނެފައެވެ.

މާލެ ހިމެނޭ ސަރަހައްދުގެ ހުރިހާ ރެސްޓޯރަންޓްތަކާއި ކެފޭތައް އާންމުންނަށް ބަންދު ކުރީ މި މަހުގެ 22 ވަނަ ދުވަހުގެ ރޭ މެންދަމު 12:00 އިން ފެށިގެންނެވެ. ކެފޭ ރެސްޓޯރަންޓުތައް އާންމުންނަށް ބަންދުކުރި ނަމަވެސް ޓޭކްއަވޭ އާއި ޑެލިވަރީގެ ހިދުމަތް ދެވޭނެއެވެ.