ކޮވިޑް-19 ޖެހުނު މީހުންގެ އަދަދު ތިންލައްކައަށް ވުރެ މައްޗަށް އަރައިފިއެވެ.

ދުނިޔޭގެ 188 ގައުމަކުން މި ވައިރަސް ފެނިފައިވާއިރު މިވައިރަސް ޖެހިގެން މިހާތަނަށް 13،000 މީހުންވަނީ މަރުވެފައެވެ. މިހާތަނަށް އެންމެ ގިނަ މީހުންނަށް މިވައިރަސް ޖެހިގެން ރިކޯޑްކޮށްފައިވަނީ ވައިރަސް އެންމެ ފުރަތަަމަ ފެނުނު ޗައިނާއިންނެވެ. އެއީ 81,008 މީހުންނެވެ. އެގައުމުގައި ވައިރަސް ޖެހިގެން 3,255 މީހުން ވަނީ މިހާތަނަށް މަރުވެފައެވެ. ސީރިއަސް ހާލަތުގައި 1,927 މީހުން ތިބިއިރު މިހާރުވެސް 6,013 މީހަކަށް އަންނަނީ ފަރުވާދެމުންނެވެ. ޗައިނާގައި ވައިރަސްފެތުރޭ މިންވަރު ބޮޑުތަނުން ދަށްކޮށްފައިވާއިރު މިހާރު ބާރު ސްޕީޑެއްގައި މިވައިރަސް ފެތުރެމުން އަންނަނީ އިޓަލީގައެވެ. އެގޮތުން އިޓަލީގައި ވަނީ ޗައިނާއަށް ވުރެ ގިނަ މީހުން މިވައިރަސް ޖެހިގެން މިހާރު މަރުވެފައެވެ.

އިޓަލީގައި މިހާތަނަށް މިވައިރަސް 53,578 މީހުންނަށް ވަނީ ޖެހިފައެވެ. އަދި 4,825 މީހުންވަނީ މިވައިރަސް ޖެހިގެން މަރުވެފައެވެ. އިޓަލީގައި ފާއިތުވި 24 ގަޑިއިރު ތެރޭގައި މިވައިރަސް ޖެހިގެން މަރުވި މީހުންގެ އަދަދު 800 އާ ކައިރިކުރެއެވެ. އެއާއެކު އިޓަލީގައި މިވައިރަސް ފެތުރުން ކޮންޓްރޯލް ކުރުމަށްޓަކައި އަޅާފިޔަވަޅުތައް ވަނީ ހަރުކަށި ކޮށްފައެވެ.

އިޓަލީއަށްފަހު ދެން އެންމެ ގިނަ އަދަދެއްގެ މީހުންނަށް ވައިރަސް ޖެހުމުން ދަނީ ސްޕެއިންގައެވެ. އެގައުމުގައި މިހާތަނަށް 25,496 މީހުންނަށް ވައިރަސް ޖެހިފައިވެއެވެ. އަދި 1,378 މީހަކު ވަނީ ވައިރަސް ޖެހިގެން މަރުވެފައެވެ. ސްޕެއިނަށްފަހު ދެން އެންމެ ގިނަ އަދަދެއްގެ މީހުންނަށް ވައިރަސް ޖެހިފައިވަނީ އެމެރިކާގައެވެ. އެއީ 23,940 މީހުންނެވެ. އެގައުމުން މިހާތަނަށް 301 މީހަކު ވަނީ ވައިރަސް ޖެހިގެން މަރުވެފައެވެ.

ދެން އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓް ކޮށްފައިވަނީ ޖަރުމަންވިލާތުންނެވެ. އެއީ 22,364 މީހުންނެވެ. އެގައުމުން މިހާތަނަށް 84 މީހަކު ވަނީ ވައިރަސް ޖެހިގެން މަރުވެފައެވެ. ދެން އެންމެ ގިނަ އަދަދެއްގެ މީހުންނަށް ވައިރަސް ޖެހިފައިވަނީ އިރާނުގައެވެ. އެއީ 20,610 މީހުންނެވެ. އެގައުމުގައި ވައިރަސް ޖެހިގެން މަރުވި މީހުންގެ އަދަދު އުޅެނީ 1,556 ގައެވެ.

ހަލުވިކަމާއެކު ދުނިޔޭގެ އެކިކަންކޮޅުތަކުގައި ކޮވިޑް-19 ފެތުރެމުންދާއިރު މިވައިރަސް އަށް ވެކްސިނެއް ހޯދުމުގެ މަސައްކަތް ވެސް އަންނަނީ ކުރަމުންނެވެ.