ނޫސްވެރިން ހައްޔަރުކުރިއިރު އާދަމް ޝަރީފް ހުންނެވީ ޣައިރު ޤާނޫނީ އަމުރު ކުރެއްވުމަށް: ވިސާމް
އޭރު އާދަމް ޝަރީފް ހުންނެވީ މީހުން ހައްޔަރު ކުރުމުގައި ކަމަށް ވިސާމް ވިދާޅުވި
ރާއްޖެޓީވީގެ ކުރީގެ ނޫސްވެރިޔާ އަދި ގަމު ދާއިރާގެ މެންބަރު މުހައްމަދު ވިސާމް
ނޫސްވެރިން ހައްޔަރުކުރިއިރު އާދަމް ޝަރީފް ހުންނެވީ ޣައިރުޤާނޫނީ އަމުރުކުރެއްވުމަށް ޑިފެންސް މިނިސްޓަރުގެ މަޤާމުގައިކަމަށް ގަމު ދާއިރާގެ މެންބަރު މުހައްމަދު ވިސާމް ވިދާޅުވެއްޖެ އެވެ.
ވިސާމް މިހެން ވިދާޅުވެފައިވަނީ ސިއްހީ ކުއްލި ނުރައްކާގެ ހާލަތު ނިމެންދެން ޗެނަލް 13 އިން ގެނެސްދެމުންދާ "މަޑިސީލަ" ޕްރޮގްރާމް ގެނެސްދިނުން މެދުކަނޑާލުމަށް މޯލްޑިވްސް ބްރޯޑްކާސްޓިންގް ކޮމިޝަން (ބްރޯޑްކޮމް) އިން ނިންމުމާއި ގުޅިގެން، މަޑުއްވަރީ ދާއިރާގެ މެންބަރު އާދަމް ޝަރީފު އުމަރު ކުރެއްވި ޓްވީޓަކަށް ރައްދު ދެއްވަމުންނެވެ.
ކުރީގެ ރައީސް އަބްދުﷲ ޔާމިނުގެ ވެރިކަމުގައި ޑިފެންސް މިނިސްޓަރުކަން ކުރައްވާފައިވާ އާދަމް ޝަރީފް ކުރައްވާފައިވާ ޓްވީޓްގައި ވަނީ ޗެނަލް 13 މިހާރު އެކުރަނީ ކުރިން ރާއްޖެޓީވީން ކުރި ކަންކަން ކަމަށާއި، އޭރު ރާއްޖެ ޓީވީ ބަންދު ނުކުރީ އިދިކޮޅުގެ އަޑު އިވެން ޖެހޭނެތީ ކަމަށެވެ. އަދި މިހާރު ވެސް ކުރަންވީ ކަމަކީ ޒިންމާދާރު ނޫސްވެރިކަމަށް ހިތްވަރުދިނުން ކަމަށާއި ވެރިކަމަށް އައުމުގެ ކުރިން ދައްކާ ވާހަކަ އާއި ވެރިކަމަށް އައުމަށްފަހު ދެކޭ ގޮތް ތަފާތު ނުކުރެއްވުމަށް ޓްވީޓުގައި އެދިވަޑައިގެންފައިވެއެވެ.
ރައީސް ޔާމީންގެ ސަރުކާރުގައި އިދިކޮޅު ފަރާތްތަކުން ކުރިއަށް ގެންދިޔަ މުޒާހަރާތައް ކަވަރު ކުރުމަށް ރާއްޖެ ޓީވީގެ ނޫސްވެރިއެއްގެ ހައިސިއްޔަތުން ހަރަކާތްތެރިވަމުން ދިޔައިރު އެތައް ފަހަރެއްގެ މަތިން ހައްޔަރުކޮށް ނުހައްގުން ޖަލަށްލާ އެތައް އަނިޔާތެކެއް ލިބިފައިވާ ވިސާމް، އާދަމް ޝަރީފްގެ ޓުވީޓަށް ރައްދު ދެއްވައި ކުރެއްވި ޓްވީޓްގައި ވަނީ މީޑިއާގެ ވާހަކަ ޝަރީފް މިއަދު ދައްކަވާއިރު ލަދުގެ ކަންފުޅެއްވެސް ނެތީތޯ ސުވާލު ކުރައްވާފައެވެ. އަދި ރައީސް ޔާމީންގެ ވެރިކަމުގައި ރާއްޖެޓީވީގެ ނޫސްވެރިން ޤާނޫނާއި ޤަވާއިދުތަކާއި ޚިލާފަށް ހައްޔަރުކޮށް، ނުހައްގުން އެތައް މިލިއަން ރުފިޔާއިން ރާއްޖެޓީވީ ޖޫރިމަނާކުރިކަން ހަނދުމަފުޅު ނެތުނީތޯ ވިދާޅުވެ ވަނީ ސުވާލު ކުރައްވާފައެވެ.
އޭރު އާދަމް ޝަރީފް ހުންނެވީ މީހުން ހައްޔަރުކޮށް، ޣައިރު ޤާނޫނީ އަމުރުކުރެއްވުމުގައިކަމަށް ވިސާމް ވިދާޅުވި އެވެ. އަދި އޭރުގައި އުޅުއްވީ މީހުންގެ ދަތްދޮޅި ދުއްވާލުމުގައި ކަމަށާއި މީޑިއާގެ މިނިވަންކަމުގެ ވާހަކަނުދެއްކެވުމަށް ވިސާމް ވަނީ އާދަމް ޝަރީފަށް ގޮވާލައްވާފަ އެވެ.
ރައީސް ޔާމީންގެ ސަރުކަރުގައި ވިސާމް ވަނީ ހަތް ހަފަރެއްގެ މަތިން ހައްޔަރުކޮށް 48 ދުވަހު ޖަލު ބަންދުގައި ބަހައްޓާފައެވެ. އަދި ދެ ދައުވާއެއް އޭނާގެ މައްޗަށް ވަނީ އުފުލާފައެވެ.
