އައިލެންޑާސް ފުޓްސަލް ޗެލެންޖު ފަސްކޮށްފި

މެދުރާއްޖެ ތެރޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ އައިލެންޑާސް ފުޓްސަލް ޗެލެންޖު 2020 ފަސްކުރުމަށް ނިންމައިފި އެވެ.

މުބާރާތް އިންތިޒާމުކުރާ ޓީއެފްއެމް ސްޕޯޓްސް ކްލަބުން ބުނީ މުބާރާތް ފަސްކުރީ ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) އާ ގުޅިގެން ދައުލަތުގެ މުއައްސަސާތަކުން އިރުޝާދު ދެއްވާފައިވާ ގޮތަށް އަމަލުކުރުމަށް ކަމަށެވެ. އަދި މި މުބާރާތް ދެން ބާއްވާނެ ތާރީޚެއް ފަހުން އިއުލާނުކުރާނެ ކަމަށްވެސް ވަނީ ބުނެފައެވެ.

މިއަހަރުގެ މުބާރާތް ބޭއްވުމަށް ކުރިން ހަމަޖެހިފައި އޮތީ މެއި މަހުގެ 29 އިން ޖޫން މަހުގެ 5 ވަނަ ދުވަހުގެ ނިޔަލަށެވެ. ކޮންމެ އަހަރަކުވެސް ދިއްގަރުގައި ބާއްވާ މި މުބާރާތުގައި މ. އަތޮޅުގެ ގިނަ ރަށްތަކެއްގެ ޓީމުތައް އަންނަނީ ވާދަކުރަމުންނެވެ.

ރާއްޖެއިން ކޮރޯނާވައިރަސް (ކޮވިޑް-19) ފެނިފައިވާއިރު، ރާއްޖޭގައި ވަނީ މިމަހުގެ 12 އިން ފެށިގެން ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައެވެ. އެއާއެކު ރާއްޖޭގައި ބާއްވަމުން އަންނަ އެކު ކުޅިވަރު މުބާރާތްތައް މިހާރު އަންނަނީ ފަސްކުރަމުންނެވެ.

ރާއްޖެއިން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު މިހާރު ވަނީ 13 އަށް އަރާފައެވެ.