ރެއާލް މެޑްރިޑަށް ކުޅެމުން އަންނަ ވޭލްސްގެ ފޯވާޑް ގެރެތު ބޭލް މި ސީޒަނަށްފަހު އެޓީމު ދޫކޮށްލާނެ ކަމަށް މީޑިއާ ރިޕޯޓުތައް ބުނެފިއެވެ.

މި ސީޒަން ފެށުނުއިރު، ރެއާލްގެ ކޯޗު ޒިނެދިން ޒިދާންގެ ޕްލޭންގައި މުހިންމު ދައުރެއް އަދާކުރާނެ ކުޅުންތެރިޔެއްގެ ގޮތުގައި ބެލެވުނު ބޭލްއަށް ސީޒަންގެ މެދުތެރެއިން އެންމެ އެދެވޭ ކުޅުން ދެއްކޭގޮތް ވަނީ ނުވެފައެވެ. އެހެންކަމުން މި ސީޒަން ނިމުމުން ރެއާލުން ބޭލް ވިއްކާލާނެ ކަމަށް ބެލެވެއެވެ. އަނެއްކޮޅުން ބޭލް ގެންދިޔުމަށް އޭނާގެ ކުރީގެ ކްލަބު ޓޮޓެންހަމް ހިޓްސްޕާސްއިން އަންނަނީ މަސައްކަތް ކުރަމުންނެވެ.

ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް ވަނީ އެ ކްލަބާއެކު ހަދާފައިވާ އެއްބަސްވުން 2022 ގެ ނިޔަލަށް އާކޮށްފައެވެ.

މި ސީޒަން ފެށުމުގެ ކުރިން ރެއާލްގެ ވެރިން ބޭލްއާއި މެދު ހިތްހަމަނުޖެހި އޭނާ ވިއްކާލަން އުޅުނު ކަމަށް އަޑުފެތުރުނެވެ. ރެއާލްގެ ވެރިން ބޭލްއާއި މެދު ހިތްހަމަނުޖެހުނީ ވޭލްސްގެ ޔޫރޯ ކޮލިފިކޭޝަން މެޗަކަށްފަހު އޭނާ ދެއްކި ވާހަކަތަކާއި ގުޅިގެންނެވެ. އެއަށްފަހު ޕްރީ ސީޒަން ބައެއް މެޗުތަކުގައި ބޭލް ހިމަނާފައެއްވެސް ނުވެއެވެ.

އެކަމަކު އޭގެ ފަހުން ރެއާލްގެ ކޯޗު ޒިދާން ވަނީ ބޭލްގެ ދިފާއުގައި ވާހަކަދައްކާފައެވެ. ޒިދާން ބުނީ އޭނާއާ ބޭލްއާ ދެމެދު އެއްވެސް މައްސަލައެއް ނެތް ކަމަށާއި، ބޭލްއަކީ އެޓީމަށް ވަރަށް މުހިންމު ކުޅުންތެރިއެއް ކަމަށެވެ.

ބޭލް ހޯދުމަށް ޓޮޓެންހަމުން މަސައްކަތް ކުރަމުންދާއިރު، ދާދި ފަހުން ބޭލްގެ އޭޖެންޓް ބުނީ އޭނާ އެނބުރި ޓޮޓެންހަމަށް ދިޔުމަކީ ވަރަށް ނާދިރު ކަމެއް ކަމަށެވެ. އެގޮތުން މިވަގުތު ބޭލް ރެއާލްގައި ހުރީ ހިތްހަމަޖެހިގެން ކަމަށާއި، އެހެން ޓީމަކަށް ބަދަލުވުމާއި މެދު ގޮތެއް ނިންމާލީ ރެއާލްއާއެކު ހަދާފައިވާ އެއްބަސްވުން ހަމަވުމުން ކަމަށްވެސް ބުންޏެވެ.

ބޭލް ވަނީ ރެއާލްއަށް މިހާތަނަށް ކުޅުނު 246 މެޗުގައި 105 ލަނޑު ކާމިޔާބުކޮށް، އެ ކްލަބާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު، ކްލަބު ވޯލްޑް ކަޕް ތިން ފަހަރު، ސްޕެނިޝް ލީގު އެއް ފަހަރު، ސްޕެނިޝް ކަޕް އެއް ފަހަރު އަދި ސްޕެނިޝް ސުޕަ ކަޕް އެއް ފަހަރު ކާމިޔާބުކޮށްފައެވެ.