މަޖިލީހުގެ ހަރަދުތައް ކުޑަކުރަން މެމްބަރުންގެ ކޮއްތު ކަނޑާލަނީ
ކޮއްތު ފައިސާ ކަނޑާލުމުން މަހެއްގެ މައްޗަށް އެއްލައްކަ ރުފިޔާ ސަލާމަތްކުރެވޭނެ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުގެ ހަރަދުތަކުގެ ތެރެއިން 19.3 މިލިއަން ރުފިޔާ ކުޑަކުރުމަށް ފިނޭންސް މިނިސްޓްރީން އެންގުމާއި ގުޅިގެން، މެމްބަރުންގެ ކޮއްތު މި ދުވަސްކޮޅަށް ކަނޑާލުމުގެ މަސައްކަތް ފަށައިފިއެވެ.
މަޖިލީހުގެ ހަރަދުތަކުން 19.3 މިލިއަން ރުފިޔާ ކަނޑަން ފިނޭންސް މިނިސްޓަރު އަމީރު ފޮނުއްވެވި ސިޓީއާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، އެއީ ކުރެވޭނެ ކަމެއް ކަމަށެވެ. އަދި އެ މަސައްކަތް ހަވާލުކުރެއްވީ ރައްޔިތުންގެ މަޖިލީހުގެ ނައިބު ރައީސް، އީވާ އަބްދުﷲ އާއެވެ.
އަންގާރަ ދުވަހުގެ މަޖިލީހުގެ ޖަލްސާގައި މަޖިލިސް މެމްބަރުންގެ ކޮއްތު ކަނޑާލުމަށް އީވާ މަސައްކަތްކުރައްވާ ވާހަކަދައްކަވަމުން، ރައީސް ނަޝީދު ވިދާޅުވީ، ކޮއްތު ކަނޑާލިޔަސް ބޯފެން ކޮޅާ އެއްޗެހި ލިބޭގޮތަށް ބަހައްޓަވަން އީވާ ގާތު އެދިވަޑައިގަތް ކަމަށެވެ.
ކުރިން ހާމަކޮށްފައިވާ އަދަދުތަކަށް ބަލާއިރު، މެމްބަރުންގެ ކޮއްތަށް ދުވާލެއްގެ މައްޗަށް 14،000ރ. ހަރަދުވެއެވެ. އަދި މި އަދަދަށް ބަލައިގެން މަހެއްގެ މައްޗަށް ޖުމްލަ ހަރަދުގެ ތެރެއިން ގާތްގަނޑަކަށް 168،000ރ. ކަނޑާލެވޭނެއެވެ.
މި 19.3 މިލިއަން ރުފިޔާއަކީ ރައްޔިތުންގެ މަޖިލީހުގެ އިދާރާގެ ބަޖެޓުގެ ތެރެއިން ކުޑަކުރަން ހުށައަޅާފައިވާ އަދަދެކެވެ. މި އަހަރަށް ރައްޔިތުންގެ މަޖިލީހުގެ އިދާރާގެ ބަޖެޓުގެ ގޮތުގައި ފާސްކޮށްފައިވަނީ 129،550،285ރ. އެވެ.
މި ބަޖެޓުގެ ތެރެއިން 86 މިލިއަން ރުފިޔާއަކީ މަޖިލިސް މެމްބަރުންގެ މުސާރައާއި އިނާޔަތްތަކުގެ ގޮތުގައި ދޭ ފައިސާއެވެ. މެމްބަރުންގެ މުސާރައިގެ ތެރެއިން 20 އިންސައްތަ އުނިކުރުމަށް އެމްޑީޕީ ޕާލިމެންޓްރީ ގްރޫޕުން ވަނީ ހުށައަޅާފައެވެ.
ރައްޔިތުންގެ މަޖިލީހުގެ މެމްބަރެއްގެ މުސާރައަކީ 42,500ރ. އެވެ. އޭގެ އިތުރުން ކޮމިޓީ އެލަވަންސާއި ލިވިންގް އެލަވަންސްގެ ގޮތުގައި އިތުރު 40،00ރ. މެމްބަރުންނަށް ލިބެއެވެ.
މުސާރާއިން 20 އިންސައްތަ އުނިކުރާނަމަ، މަޖިލިސް މެމްބަރެއްގެ މުސާރައިގެ ގޮތުގައި ލިބޭނީ 34،000ރ. އެވެ. މުސާރައިން 20 އިންސައްތަ ކަނޑާލުމުން މަހެއްގެ މައްޗަށް 739،000ރ. ހަރަދުގެ ތެރެއިން ކުޑަކުރެވޭނެއެވެ.
އެމްޑީޕީ ޕާލިމެންޓްރީ ގްރޫޕުން ހުށައަޅާފައިވާ ގޮތަށް މުސާރަ އުނިކުރެވޭނީ ރައްޔިތުން މަޖިލީހުގެ ތިންބައިކުޅަ ދެބައި އަގްލަބިއްޔަތުން އެ އިސްލާހަށް ވޯޓު ދިނުމުންނެވެ. މަޖިލީހުގައި ތިއްބަވާ އެހެން ޕާޓީތަކާއި މިނިވަން މެމްބަރުންގެ ތެރެއިން ބައެއް ފަރާތްތަކުން ވަނީ މި އިސްލާހަށް ވޯޓު ދެއްވާނެ ކަމަށް ވިދާޅުވެފައެވެ.
ހަރަދު ކުޑަކުރުމުގެ ގޮތުން މިހާތަނަށް ހުށައަޅާފައިވާ ކަންކަމަށް ބަލާއިރު، މަހެއްގެ މައްޗަށް މިލިއަނެއްހާ ރުފިޔާ ސަލާމަތްކުރެވޭނެއެވެ.
