ކުޅިވަރު ދަނޑުތައް ބަންދުކޮށްފި

ދުނިޔޭގައި ހަލުވިކަމާއިއެކު މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) އާއި ގުޅިގެން ރައްކާތެރި ފިޔަވަޅު އެޅުމުގެގޮތުން މާލޭ ސަރަހައްދުގައި ގާއިމްކޮށްފައިވާ ކުޅިވަރު ކުޅޭ ތަންތަން ބަންދުކުރުމަށް ކުޅިވަރާ ބެހޭ ވުޒާރާއިން ނިންމައިފިއެވެ.

ކުޅިވަރާ ބެހޭ ވުޒާރާއިން ނެރުނު ނޫސްބަޔާނުގައި ބުނީ ކޮރޯނާވައިރަސް (ކޮވިޑް-19) އިން ރައްކާތެރިވުމަށް ކުޅިވަރު ކުޅޭ ތަންތަން ބަންދުކުރުމަށް އެ މިނިސްޓްރީއިން ނިންމައިފައިވާ ކަމަށާއި މި ނިންމުން ނިންމަން ނިންމީ ގިނަ މީހުން އެއްތަނަކަށް ޖަމާވެގެން ހިންގާ ހަރަކާތްތައް ހުއްޓުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ގިނަ ފިޔަވަޅުތަކެއް އަޅަމުންދާތީ، އެ އެޖެންސީގެ ލަފާގެ މަތިން ކަމަށެވެ.

ކުޅިވަރާ ބެހޭ ވުޒާރާއިން މި ނިންމުން ނިންމިއިރު ރާއްޖޭގެ ގިނަ ކުޅިވަރު އެސޯސިއޭޝަންތަކުން ވަނީ އެ އެސޯސިއޭޝަނުން ހިންގަން ނިންމައިފައިވާ ހުރިހާ ހަރަކާތެއް ހުއްޓައިލުމަށް ނިންމައިފައެވެ. އެގޮތުން ފުޓުބޯޅަ އެސޯސިއޭޝަން އޮފް މޯލްޑިވްސް، އެތުލެޓިކްސް އެސޯސިއޭޝަން އޮފް މޯލްޑިވްސް، ބެޑްމިންޓަން އެސޯސިއޭޝަން އޮފް މޯލްޑިވްސް އަދި ކްރިކެޓް އެސޯސިއޭޝަން އޮފް މޯލްޑިވްސްއިން ވެސް ވަނީ މި ނިންމުން ނިންމައިފައެވެ.

ރާއްޖެއިން މިހާތަނަށް 13 މީހުން ކޮވިޑް-19 އަށް ޕޮޒިޓިވްވެފައިވާއިރު މި ބަލީގައި ރާއްޖެއިން މިހާތަނަށް މީހަކު މަރުވެފައެއް ނުވެއެވެ.