އަހަރުގެ ކުޅިވަރު ޝަހްސިއްޔަތަކަށް ފެޑެރާ ހޮވިއްޖެ

ބީބީސީއިން ހޮވާ އަހަރުގެ އެންމެ ވަރުގަދަ ކުޅިވަރު ޝަހްސިއްޔަތަކަށް ސްވިޓްޒަލޭންޑުގެ ރޯޖާ ފެޑެރާ ހޮވިއްޖެއެވެ.

އުމުރުން 36 އަހަރުގެ ފެޑެރާ މި އެވޯޑު ހޯދީ އިތުރު ފަސް ފަރާތަކާ ވާދަކުރުމަށް ފަހުއެވެ. އެގޮތުން ފެޑެރާ މި މަގާމު ހާސިލުކުރީ އެމެރިކާގެ ޓޮމް ބްރޭޑީ އާއި އެ ގައުމުގެ ފެތުންތެރިޔާ ކެޓީ ލެޑެކީއާގެ އިތުރުން ހަމަ އެ ގައުމުގެ އެތުލީޓް ޓެޓީނާ މެކްފޭޑެން، އޮސްޓްރޭލިއާގެ އެތުލީޓް ސެލީ ޕާސަންގެ އިތުރުން ނެދަލޭންޑްސްގެ ޑާޓް ކުޅުންތެރިޔާ މައިކަލް ވެންގާވެންއާ ވާދަކޮށެވެ.

މި މަގާމަށް ފެޑެރާ ނޮމިނޭޓްކުރީ ކުޅިވަރު ދިރާސާކުރާ މާހިރުންގެ ޕެނަލަކުންނެވެ. މި މަގާމު ފެޑެރާއަށް ލިބިގެންދިޔައީ ބީބީސީގެ ކުޅިވަރު ވެބްސައިޓްގައި ނެގުނު ވޯޓަކުންނެވެ. މިއީ ފެޑެރާ މި މަގާމު ހާސިލްކުރި ތިންވަނަ ފަހަރެވެ. އޭނާގެ ކުރިން ޖެމެއިކާގެ އެތުލީޓު އުސެއިން ބޯލްޓް އަދި ބޮކްސިން ލެޖެންޑް މުހައްމަދު އަލީ ވަނީ މި މަގާމު ތިން ފަހަރެއްގެ މަތިން ހޯދާފައެވެ.

މި މަގާމު ލިބިގެންދިޔުމުން ފެޑެރާ ބުނީ ބީބީސީ އިން ހޮވި މިފަދަ ޝަރަފުވެރި މަގާމެއް ލިބުމުން ވަރަށް އުފާވާ ކަމަށާއި އަދި ވޯޓަކުން ހޮވުމުން މި މަގާމު މާ ބޮޑަށް ހާއްސަވެގެންދާ ކަމަށެވެ. ހަމައެހެންމެ ސަޕޯޓަރުންގެ ފަރާތުން މެދުކެނޑުމެއް ނެތި ލިބެމުންދާ ސަޕޯޓަށް ޝުކުރު އަދާކުރާ ކަމަށާއި އޭނާއާ ދެކޮޅަށް މި މަގާމަށް ވާދަކޮށްފައި ވަނީ ހުސް ޗެމްޕިއަނުން ކަމަށެވެ.

ހަ މަސްދުވަހުގެ އިންޖަރީއެއްގެ ސަބަބުން ކުޅުމާއި ދުރުގައި ހުރުމަށް ފަހު އެނބުރި އައިސް ފެޑެރާ ވަނީ މި ސީޒަނުގައި މޮޅު ކުޅުމެއް ދައްކާފައެވެ. މިއަހަރުގެ ތެރޭގައި ފެޑެރާ ދެ ގްރޭންސްލޭމް މުބާރާތް ކާމިޔާބުކުރިއެވެ. އެއީ ވިމްބެލްޑަން މުބާރާތާއި އޮސްޓްރޭލިއަން އޯޕަން ޓެނިސް ޗެމްޕިއަންޝިޕެވެ. މި ދެ މުބާރާތުގެ ތައްޓާ އެކު އެންމެ ގިނަ ގްރޭންސްލޭމް މުބާރާތް ކާމިޔާބުކުރި ކުޅުންތެރިޔާގެ ރެކޯޑް ފެޑެރާ ވަނީ ފުޅާކޮށްފައެވެ. އޭނާވަނީ ކެރިއަރުގައި މިހާތަނަށް 19 ގްރޭންސްލޭމް މުބާރާތް ކާމިޔާބުކޮށްފައެވެ.

ހަމައެހެންމެ މިއަހަރު ކާމިޔާބުކުރި ވިމްބެލްޑަން މުބާރާތާ އެކު ފެޑެރާ ވެގެން ގޮސްފައިވަނީ އޯޕެން އެރާގައި މި މުބާރާތް ކާމިޔާބުކުރި އެންމެ އުމުރުން ދުވަސްވީ ކުޅުންތެރިޔާއަށެވެ.

މިއަހަރު ފެޑެރާ ހަތް މުބާރާތް ކާމިޔާބުކޮށްފައިވާއިރު އޭނާ ކުޅުނު 57 މެޗުގެ ތެރެއިން ބަލިވެފައި ވަނީ އެންމެ ފަސް މެޗުންނެވެ. ބާކީ ފަސް މެޗުން އޭނާވަނީ މޮޅުވެފައެވެ.

ފެޑެރާގެ ކެރިއަރުގައި އޭނާވަނީ މިހާތަނަށް 95 މުބާރާތެއް ކާމިޔާބުކޮށްފައެވެ. ހަމައެހެންމެ އޭނާ ވަނީ ދުނިޔޭގެ އެއް ނަމްބަރު ޓެނިސް ކުޅުންތެރިޔާގެ ގޮތުގައި އޭޓީޕީ ރޭންކިންގެ އެއްވަނަ 302 ހަފްތާ ވަންދެން ދަމަހައްޓާފައެވެ. ފެޑެރާއަކީ ބީބީސީއިން ހޮވި 2006 އަދި 2007 ވަނަ އަހަރުގެ އެންމެ ވަރުގަދަ ކުޅިވަރު ޝަހްސިއްޔަތެވެ.