ބީބީސީގެ އަހަރުގެ ކުޅިވަރު ޝަހުޝިއްޔަތަކަށް މޯ ފަރާ ހޮވިއްޖެ

ބީބީސީ އިން ހޮވި 2017 ވަނަ އަހަރުގެ ކުޅިވަރު ޝަހްޝިއްޔަތަކަށް އިނގިރޭސިވިލާތުގެ ދިގު ދުވުންތެރިޔާ މޯ ފަރާ ހޮވިއްޖެ އެވެ.

ދިހަ ހާސް މީޓަރުގެ ދުނިޔޭގެ ޗެމްޕިއަން މޯ ފަރާއަކީ، 2002 ވަނަ އަހަރު ބީބީސީގެ ކުޅިވަރު ޝަހްޝިއްޔަތަށް ހޮވުނު ޕައުލާ ރެޑްކްލިފްގެ ފަހުން، މިއެވޯޑް ހޯދި ފުރަތަމަ ދިގު ދުވުންތެރިޔާ އެވެ.

އުމުރުން 34 އަހަރުގެ މޯ ފަރާ ވަނީ، އޯގަސްޓް މަހު ލަންޑަންގައި ބޭއްވި ވޯލްޑް ޗެމްޕިއަންޝިޕްގައި 10،000 މީޓަރުގެ ދުވުން ކާމިޔާބުކޮށް، މިރޭހުގެ ދުނިޔޭގެ ޗެމްޕިއަންކަން ޖެހިޖެހިގެން ތިންވަނަ ފަހަރު ހޯދާފައެވެ.

ބީބީސީގެ އަހަރުގެ ކުޅިވަރު ޝަހްޝިއްޔަތު މޯ ފަރާ އާ އެންމެ ވާދަކޮށްފައިވަނީ ދުނިޔޭގެ ސުޕަރ ބައިކް ޗެމްޕިއަން ޖޮނަތަން ރެއާ އެވެ. މިއެވޯޑަށް ވާދަކުރި އެތުލީޓުންގެ ތެރެއިން ތިންވަނަ އަށް އެންމެ ގިނަ ވޯޓު ލިބުނީ ދެ ފަހަރެއްގެ މަތިން ޕެރަލިމްޕިކް ޗެމްޕިއަންކަން ހޯދާފައިވާ ޖޮނީ ޕީކޮކް އެވެ.

އިނގިރޭސިވިލާތުގައި ބޭއްވި އެވޯޑް ހަފްލާގައި މޯ ފަރާ އަށް ބައިވެރިނުވެވުމާއެކު، އޭނާ އާ އެވޯޑް ހަވާލުކޮށްފައިވަނީ ވީޑިއޯ ލިންކް މެދުވެރިކޮށެވެ.

މިއެވޯޑަށް ވާދަކުރި 12 އެތުލީޓުންގެ ތެރެއިން، މޯ ފަރާ މީގެ ކުރިން ވަނީ ފަސް ފަހަރެއްގެ މަތީން ބީބީސީގެ އަހަރުގެ ކުޅިވަރު ޝަހްޝިއްޔަތުގެ އެވޯޑަށް ޝޯޓްލިސްޓްވެފައެވެ. އޭގެ ތެރެއިން އެވޯޑާއި އެންމެ ގާތަށް ގޮސްފައިވަނީ 2011 ވަނަ އަހަރު އެވެ. އެއަހަރު އާއްމުންގެ ވޯޓުން އޭނާ އަށް ލިބިފައިވަނީ ތިންވަނަ އެވެ.