ކޮވިޑް-19: ޓްރަމްޕް އެމެރިކާގައި ކުއްލި ޙާލަތު އިއުލާނުކޮށްފި

މިހާރު ފެތުރެމުންދާ ނޮވެލްކޮރޯނާވައިރަސް (ކޮވިޑް-19) އާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް އެ ޤައުމުގައި ސްޓޭޓް އޮފް އެމަރޖެންސީ (އެސްއޯއީ) އިއުލާނުކުރައްވައިފިއެވެ.

ކޮވިޑް-19 އާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ކުއްލި ނުރައްކަލުގެ ހާލަތު އިއުލާންކޮށްފައިވަނީ ހުކުރު ދުވަހު އެވެ. އެގޮތުން އެމަނިކުފާނު ކުއްލި ޙާލަތު އިއުލާނު ކުރެއްވީ ވައިޓްހައުސްގައި އިންނަވައި ޤައުމާ މުޚާތަބުކުރައްވައި ދެއްކެވި ވާހަކަފުޅުގައެވެ.

ކުއްލި ނުރައްކަލުގެ ހާލަތު އެމެރިކާގައި އިއުލާންކުރިއިރު، އެ ޤައުމުގެ 44 ސްޓޭޓަކުން ކޮވިޑް-19 އަށް ޕޮޒިޓިވްވެފައިވާ ކޭސްތައް ފެނިފައިވެއެވެ. އަދި ޖުމްލަ 1920 މީހަކު ކޮވިޑް-19 އަށް ޕޮޒިޓިވްވެފައިވާއިރު، 41 މީހަކު އެމެރިކާގައި ވަނީ މަރުވެފަ އެވެ.

ކުއްލި ނުރައްކަލުގެ ޙާލަތު އިއުލާނު ކުރެއްވުމާއެކު އެމެރިކާގައި ސިއްޙީ ގޮތުން އަޅަންޖެހޭ ފިޔަވަޅުތައް އެޅުމަށް ތަންފީޒު ކުރަންޖެހޭ ކަންކަން ތަންފީޒު ކުރަން އިތުރަށް ފަސޭހަވެގެންދާއިރު، އައު ހޮސްޕިޓަލުތަކާއި ފަރުވާދިނުމުގެ ކަންކަން ޤާއިމު ކުރުމުގެ އިންތިޒާމްތައް ފަހިވެގެންދާނެއެވެ. އޭގެ އިތުރުން، އެމަރޖެންސީ ރިލީފް ފަންޑުތަކުގައި ހުރި 50 ބިލިއަނެއްހާ އެމެރިކާ ޑޮލަރު ސިއްޙީ އެކި ބޭނުންތަކަށް ބޭނުން ކުރަން ފެށިގެންދާނެއެވެ.

އެމެރިކާގައިވެސް މި ވައިރަސްއާ ގުޅިގެން ހަރުކަށި ފިޔަވަޅުތަކެއް އަޅާފައިވާއިރު، ގިނަ މީހުން އެއްތަނަކަށް އެއްވެ އުޅުމާއި، ސުކޫލުތައް ބަންދު ކުރުމުގެ އިތުރުން ބައެއް ކުޅިވަރު ހަރަކާތްތައްވެސް ވަނީ މުއްދަތެއް ނެތް ގޮތަށް ފަސްކޮށްފައެވެ.

މި ވައިރަސްގައި އެމެރިކާއިން އެންމެ ފުރަތަމަ މީހަކު މަރުވުމާއި ގުޅިގެން އޭރު ރައީސް ޓްރަމްޕް ވިދާޅުވެފައިވަނީ އެ ޤައުމު ވަނީ މިވައިރަސް އަށް ތައްޔާރުވެފައި ކަމަށެވެ. އަދި ވައިރަސް ޖެހިގެން މީހަކު މަރުވެފައި ވީނަމަވެސް އަދި އެ ޤައުމުގެ ރައްޔިތުން ހާސްވެ ކަންބޮޑުނުވުމަށް ޓްރަމްޕް އޭރު އެދިވަޑައިގަންނަވާފައިވެއެވެ.

އެ މީހާ މަރުވެފައިވަނީ ވޮޝިންގޓަންގެ ހުޅަނގު އުތުރު ސްޓޭޓެއް ކަމަށްވާ ކިންގ ކައުންޓީނެވެ.