ޖަލުތަކުގައި އާއިލީ ބައްދަލުވުންތައް މެދު ކަނޑާލައިފި
12 މާރިޗު 2020 | ބުރާސްފަތި 16:59ފޯންކޯލްގެ އަދަދު ވަނީ އިތުރު ކޮށްފައި
މޯލްޑިވްސް ކަރެކްޝަނަލް ސަރވިސް | ރާއްޖެއެމްވީ
ކޮވިޑް-19 އަށް ރާއްޖެއިން އަށް މީހަކު ޕޮޒިޓިވްވެ، ރާއްޖޭގައި ސިއްހީ ކުއްލި ހާލަތު އިއުލާން ކުރުމާއި ގުޅިގެން ޖަލުތަކުގައި ތިބި ގައިދީންނަަށް ރައްކާތެރިކަމުގެ ފިޔަވަޅެއްގެ ގޮތުން އާއިލީ އަދި އެކަހެރި ބައްދަލުވުންތައް މެދުކަނޑާލައިފިއެވެ.
މޯލްޑިވްސް ކަރެކްޝަނަލް ސަރވިސް (އެމްސީއަރް) އިން ބުރާސްފަތި ދުވަހު ނެރެފައިވާ ނޫސް ބަޔާނެއްގައި ބުނެފައިވަނީ، ގައިދީންނާއި ބަންދު މީހުންގެ އިތުރުން ޖަލުތަކުގައި މަސައްކަތް ކުރާ އޮފިސަރުންނާއި މުވައްޒަފުންގެ ސަލާމަތާއި ރައްކާތެރިކަމަށްޓަކައި އާއިލީ އަދި އެކަހެރި ބައްދަލުވުންތައް ވަގުތީގޮތުން މެދުކަނޑާލާފައިވާ ކަމަށެވެ.
އަދި ޖަލުތަކުގައި ތިބި ގައިދީންނަށާއި ބަންދު މީހުންނަށް، އާއިލާގެ ފަރާތުން އަންނައުނު ފޯރުކޮށްދިނުން ވެސް ވަގުތީ ގޮތުންމެދު ކަނޑާލެވިފައިވާ ކަމަށް ވެސް ކަރެކްޝަނުން ބުންޏެވެ.
ނަމަވެސް، ޢާއިލާއާ އޮންނަ ގުޅުން ބަދަހިކޮށް، އިތުރު ފުރުޞަތު ހޯދައިދިނުމުގެ ގޮތުން މިހާރު ފޯން ކޯލް ދެމުންދާ މިންވަރު އިތުރު ކުރުމަށް ކަރެކްޝަނުން ވަނީ ނިންމާފައެވެ.
ކަރެކްޝަނުން އެހެން ނިންމާފައިވާއިރު، ކޮވިޑް-19 އާ ގުޅިގެން ގިނަ މީހުން އެއްވާ ތަންތަނަށް ނުދިޔުމަށް ސިއްހީ މާހިރުން ދަނީ އިލްތިމާސް ކުރަމުންނެވެ. އަދި ސަރުކާރުގެ އިތުރުން އަމިއްލަ އޮފީސް ތަކުގައި މަސައްކަތްކުރާ މުވައްޒަފުންނަށް ގޭގައި މަސައްކަތް ކުރެވޭނެ އިންތިޒާމް ދަނީ ހަމަޖައްސަމުންނެވެ.
