މިއީ ކަންބޮޑުވެ ހާސްވާންވީ ވަގުތެއް ނޫން މިއީ ވިސްނުންތެރިކަމާއި ޙިކްމަތްތެރިކަމާ އެކު، ޑޮކްޓަރުންގެ ލަފަޔާއި އިރުޝާދާ އެއްގޮތަށް، އެންމެން ގުޅިގެން މަސައްކަތް ކުރަންވީ ވަގުތުކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ކޮވިޑް-19 އާ ގުޅިގެން ބުރާސްފަތި ދުވަހު ގައުމާ މުހާތަބުކުރައްވާ ރައީސް ސޯލިހު ވިދާޅުވީ، ފެތުރެމުންމިދާ ބަލިމަޑުކަމުން ސަލާމަތްވުމަށް، ކުރަމުން އަންނަ މަސައްކަތުގައި ހުރިހާ އެންމެންގެ އެހީތެރިކަމާއި އެއްބާރުލުން ސަރުކާރަށް ބޭނުންވާކަމަށެވެ. އެގޮތުން، ކޯވިޑް19 އަކީ މުޅި ދުނިޔޭގައި ފެތުރެމުންދާ ބަލިމަޑުކަމެއްކަމަށާއި ނަމ މިއީ ކަންބޮޑުވެ ހާސްވާންވީ ވަގުތެއް ނޫންކަމަށް އެމަނިކުފާނު ވަނީ ފާހަގަކުރައްވާފައެވެ. އެގޮތުން، ވިސްނުންތެރިކަމާއި ޙިކްމަތްތެރިކަމާ އެކު، ޑޮކްޓަރުންގެ ލަފަޔާއި އިރުޝާދާ އެއްގޮތަށް، އެންމެން ގުޅިގެން މަސައްކަތް ކުރުމަށް ރައީސް ސޯލިހު ވަނީ އިލްތިމާސްކުރައްވާފައެވެ. ރައިސް ސޯލިހު ވަނީ ގިނަ މީހުން އެއްތަނަކަށް އެއްވެ ނޫޅުމަށްވެސް އިލްތިމާސްކުރައްވާފައެވެ.

ބަލިން ސަލާމަތްވުމަށް ސަރުކާރުން ކުރަމުން މއަންނަ މަސައްކަތުގައި ހުރިހާ އެންމެންގެ އެހީތެރިކަމާއި އެއްބާރުލުން ބޭނުންވާކަން ފާހަގަކުރައްވައި ރައީސް ސޯލިހު ވަނީ ޚާއްޞަކޮށް ޞިއްޙީ ދާއިރާގެ ފަންނީ ބޭފުޅުންގެ އެހީތެރިކަން މިވަގުތު ސަރުކާރަށް ވަރަށް ބޮޑަށް ބޭނުންވާކަމަށް ވިދާޅުވެފައެވެ. އަދި މިކަމުގައި އެއްބާރުލުމެއް ދޭނެ ކަމުގެ ޔަޤީންކަން، ރާއްޖޭގައި މިވަގުތު ހުރި އަމިއްލަ ދެ ހޮސްޕިޓަލެއްކަމަށްވާ އޭ.ޑީ.ކޭ އާއި ޓްރީޓޮޕް ހޮސްޕިޓަލުން ދީފައިވާކަމަށް ރައީސް ވަނީ ވިދާޅުވެފައެވެ. ރައީސް ވަނީ ރާއްޖެއިން މި ބަލީގެ ނުރައްކާތެރިކަން ނައްތާލުމަށާއި ފެތުރުނަ ނުދިނުމަށް ރެޔާއި ދުވާލު އެއްވެސް ވަރުބަލިކަމެއް ނެތި އެއްބާރުލުން ދޭ ފަރާތަކަށް ޝުކުރުއަދާކުރައްވާފައެވެ.

މި ބަލިން ރައްޔިތުން ރައްކާތެރިކުރުމުގައި ސަރުކާރުން އަޅަމުންދާ ފިޔަވަޅުތަކާއި، ރާއްޖޭގައި މި ބަލީގެ ޙާލަތު އޮތް ގޮތްވެސް، އެއްވެސް ފޮރުވުމެއް ސިއްރު ކުރުމެއް ނެތި ހާމަކުރަމުން ދާނެކަމުގެ ޔަގީންކަން ރައީސް ސޯލިހު ވަނީ ރައްޔިތުންނަށް އަރުވާފައެވެ.