ޗައިނާގައި މީހުން ކަރަންޓީންކޮށްފައި ހުރި އިމާރާތެއް ވެއްޓުން: 10 މީހުން މަރުވެ 23 މީހުން ގެއްލިއްޖެ

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ޗައިނާގައި މީހުން ކަރަންޓީން ކޮށްފައި ހުރި އިމާރާތެއް ކުއްލި ގޮތަކަށް ވެއްޓުނު ހާދިސާގައި 10 މީހުން މަރުވެއްޖެއެވެ.

ހޮނިހިރު ދުވަހު ޗައިނާގެ ފޫޖާން ޕްރޮވިންސްގެ ޗުއަންޖޯ ނަމަކަށް ކިޔާ އަވަށެއްގައި ހިނގި މި ހާދިސާގެ ފަހުގެ މައުލޫމާތުތަކާ ގުޅޭގޮތުން ބީބީސީގައި ރިޕޯޓްކޮށްފައިވަނީ، މި ހާދިސާގައި 10 މީހަކު މަރުވެ، 23 މީހުން ވީނުވީއެއް ނޭނގި ގެއްލިފައިވާ ކަމަށެވެ.

ރިޕޯޓްތައް ބުނާގޮތުން 5 ބުރީގެ މި އިމާރާތް ވެއްޓިފައިވަނީ ހޮނިހިރު ދުވަހުގެ ރޭ 7:00 ހާއިރުއެވެ. އަދި އެ ހޮޓަލަކީ ޗުއަންޖޯގެ ލީޖަންޖޫ ޑިސްޓްރިކްޓްގައި މީހުން ކަރަންޓީން ކޮށްފައިހުރި 2 އިމާރާތުގެ ތެރެއިން އެއް އިމާރާތެވެ. އެގޮތުން އެ އަވަށުގައި ކޮވިޑް-19 އަށް ޕޮޒިޓިވްވެފައިވާ މީހުން ގާތުގައި އުޅެފައިވާ މީހުން ކަރަންޓީން ކޮށްފައިތިބީ އެ ހޮޓަލުގައެވެ.

ބޭރުގެ މީޑިއާތަކުން ރިޕޯޓްކުރާ ގޮތުން އިމާރަތް ވެއްޓުނުއިރު އިމާރާތުގައި 71 މީހުން ތިއްބެވެ.

ބީބީސީގައި ރިޕޯޓްކޮށްފައިވާ ގޮތުން ރެސްކިއު ޓީމުތަކުން އަދިވެސް ދަނީ އެ ސަރަޙައްދުގައި ހަރަކާތްތެރިވަމުންނެވެ.

ކޮވިޑް-19 އެކި ޤައުމުތަކުގައި ފެތުރެމުންދާއިރު، ވައިރަސްގެ އަސަރު ކޮށްފައިވާ މީހުންގެ އަދަދު ވަނީ ލައްކައަކަށް އަރާފައެވެ. އަދި ވައިރަސްގެ ސަބަބުން މަރުވި މީހުންގެ އަދަދު 3800 އަށްވުރެ ގިނައެވެ.