އީރާނާ އެކު އޮންނަ ހުރިހާ ގުޅުމެއް ކަނޑާލުމަކީ ގަތަރަށް މަޖުބޫރު ކަމެއް ކަމަށް ތަކުރާރުކޮށް ވިދާޅުވެ ބަހުރެއިންގެ ޚާރިޖީ ވަޒީރު އަނެއްކާވެސް ވާހަކަފުޅު ދައްކަވައިފިއެވެ.
ގަތާރާ ގުޅުން ކަނޑާލާފައިވާ ގައުމުތަކުގެ ތެރޭގައި ހިމެނޭ ބަހުރެއިން ގެ ޚާރިޖީ ވަޒީރު ޝޭޚް ޚާލިދު ބިން އަހްމަދު އަލް ޚަލީފާ ސައުދީ އަރަބިއްޔާގެ އަޝާގް އަލް އަސްވަތު ނޫހަށް ދެއްވި އިންޓަވިއު އެއްގައި ވިދާޅުވީ، ގަތަރުން އީރާނާ ދުރަށް ދާން ޖެހޭ ކަމަށާއި އަދި "ޓެރަރިސްޓް" ގްރޫޕް ތަކަށް ވާގި ވެރިވުން ގަތަރުން ހުއްޓާލަން ޖެހޭ ކަމަށެވެ.
ބަހުރެއިންގެ ޚާރިޖީ ވަޒީރުގެ މި އިންޓަވިއުގައި އީރާނު ސިފަ ކުރައްވާފއިވަނީ "އެއް ނަންބަރު ދުޝްމަން" ގެ ގޮތުގައެވެ.
އީރާނަށް އަމާޒު ކުރައްވާ ބަހުރޭންގެ ޚާރިޖީ ވަޒީރު ސިފަކުރެއްވި ގޮތުގައި އެ ސަރަހައްދު ބައިބައިކޮށް ނުބައި ރޭވުން ރާވާ "ގައުމަކާ" ގުޅިގެން ގަތަރަށް މޮޅު ގޮތެއް ނުލިބޭނެ ކަމަށާއި ގަތަރު ގުޅިގެން އުޅެންޖެހޭނީ "ތިމަންނާމެންނާ" ކަމަށެވެ.
ބަހުރެއިންގެ ޚާރިޖީ ވަޒީރުގެ ވާހަކަފުޅުގައި އީރާނަކީ ގަލްފް ސަރަހައްދުގެ ގައުމުތައް ބައިބައޮކޮށް އެ ގައުމުތަކުގެ މައްޗަށް ގަދަވެ ގަންނަން މަސައްކަތް ކުރާ ގައުމެއް ކަމަށް ވިދާޅުވިއެވެ.
ގަތަރާ ގުޅުން ކަނޑާލި ގައުމުތަކުގެ ތެރޭގައި ހިމެނެނީ ސައުދީ އަރަބިއްޔާ އާއި، ޔުނައިޓެޑް އެރަބް އެމިރޭޓްސް (ޔޫއޭއީ) އާއި، ބަހްރޭން އާއި ލީބިޔާ އާއި ދިވެހި ރާއްޖެ، މޮރިޝަސް، މޮރިޓާނިއާ އަދި ސެނެގަލް އެވެ.
ޖޯޑްން އާއި ޖިބޫތީން ވަނީ އެ ދެ ގައުމުން ގަތަރާއި އެކު އޮންނަ ގުޅުން ހީނަރު ކޮށްފައިވާ ކަމަށް ބުނެފައެވެ.
