ލަންޑަންގެ ފްލެޓް އިމާރާތެއްގައި ރޯވެ އެތައް ބަޔަކު ޒަޚަމްވެއްޖެ

ހުޅަނގު ލަންޑަންގައި ހުންނަ 27 ބުރީގެ ފްލެޓް އިމާރާތެއްގައި އަލިފާން ރޯވެ ބައެއް މީހުން ޒަޚަމްވެ އަދި އެއްބަޔަކު ރައްކާތެރި ހިސާބުތަކަށް ބަދަލުކުރަން ޖެހިއްޖެ ކަމަށް ފުލުހުންނާއި ފަޔަރ ސަރވިސަސްއިން ބުނެފިއެވެ.

ލަންޑަންގެ ފަޔަރ ބްރިގޭޑުން ބުނީ ދެވަނަ ބުރިން ފެށިގެން އިމާރާތުގެ އެންމެ މައްޗާ ހިސާބަށް އަލިފާން ހިފާފައިވާ މި އިމާރާތުން އަލިފާން ނިއްވުމަށް 40 ފަޔަރ އިންޖީނު އަދި 200 ފަޔަރ ފައިޓަރުން މަސައްކަތް ކުރަމުންދާކަމަށެވެ.

ލެންކެސްޓަރ ގައި ހުންނަ ގްރެންފެލް ޓަވަރގައި އަލިފާން ރޯވެފައިވަނީ އަންގާރަ ދުވަހުގެ ރޭ މެންދަމުގެ ވަގުތެއްގައެވެ.

ފުލުހުން ބުނީ އެކިވަރުގެ ހާނީއްކަ ވެފައިވާ އެތައް ބަޔަކަށް ފަރުވާ ދީފައިވާކަމަށެވެ.

"އިމާރާތުގައި ދިރިއުޅެމުންދާ މީހުން ރައްކާތެރި ހިސާބުތަކަށް ގެންދިއުމުގެ މަސައްކަތްދަނީ ކުރަމުން" ފުލުހުން ބުންޏެވެ.

ފަޔަރ ބްރިގޭޑުން ބުނީ އަލިފާން ރޯވާން ދިމާވި ސަބަބެއް އަދި އެނގިފައި ނުވާކަމަށެވެ.

ފުލުހުން ނެރެފައިވާ ބަޔާނެއްގައި ބުނެފައިވަނީ ހާދިސާ ރިޕޯޓްކުރުމަށް ފުލުހުންނަށް ގުޅާފައިވަނީ ރޭގަނޑު 1:16ގައި ކަމަށެވެ.

ލަންޑަންގެ މޭޔަރ ސާދިގް ޚާންވަނީ "ހާދިސާގެ ދަނޑިވަޅު" އިއުލާނު ކުރައްވާފައެވެ.