ދެކުނު ކޮރެއާގެ މަގާމުން ދުރުކުރެވިފައިވާ ރައީސް ޕާކް ގުން-ހައި ގެ މައްޗަށް ކުރެވޭ ދައުވާތަކަށް އެކަަމަނާ އިންކާރު ކުރައްވައިފިއެެވެ.

ޕާކް ގުން-ހައި ގެ މައްޗަށް ކުރެވޭ ކޮރަޕްޝަނާއި އަދި މަގާމުގެ ނުފޫޒު ނާޖައިޒު ގޮތުގައި ބޭނުން ކުރުމުގެ 18 ދައުވާ އަކަށް އަންގާރަ ދުވަހު، ވެރިރަށް ސޯލްގައި ބޭއްވުނު ޝަރީއަތުގެ މަޖިލީހުގައި އެކަމަނާ ވަނީ އިންކާރު ކުރައްވައިފިއެވެ.

އެއްއިރެއްގައި ދެކުނު ކޮރެއާގެ އެންމެ ނުފޫޒު ގަދަ ފަރާތް ކަމަށްވާ، އުމުރުފުޅުން 65 އަހަރުގެ، ކުރީގެ ރައީސް ޕާކް ގުން-ހައި, ކޮރަޕްޝަނުގެ ތުހުމަތުގައި މިއަހަރު ވަނީ މަގާމުން ދުރުކުރެވިފައެވެ. ދެކުނު ކޮރެއާގައި ކޮރަޕްޝަނުގެ ދައުވާ ސާބިތުވެއްޖެ ނަމަ، އެކަމަށް އޮތް އެންމެ ބޮޑު އަދަބަކީ އުމުރަށް ޖަލަަށްލުމެވެ.

ޕާކް ގުން-ހައިގެ މައްޗަށް ތުހުމަތު ކުރެވެނީ އެކަމަނާގެ ގާތް ރަހްމަތްތެރިއެއް ކަމަށްވާ ޗޮއި ސޫން-ސިލްއާ ގުޅިގެން، ދެކުނު ކޮރެއާގެ ބޮޑެތި ކުންފުނިތަކުން ނާޖައިޒު ގޮތުގައި ފައިސާ ހޯދުމެވެ. ޝަރީއަތުގެ މަޖިލީހުގައި ޕާކް ގުން-ހައިގެ ވަކީލުން ވިދާޅުވީ، އެކަމަނާ އެކަނި ބޭނުން ނުކުރެވޭ ފައިސާއެއް، ކުންފުނިތަކުން ބާރުގެ ބޭނުންކޮށްގެން ހޯދުމުގެ ސަބަބެއް ނެތް ކަމަށެވެ.

ޝަރީއަތުގެ މަޖިލީހަށް ޕާކް ގުން-ހައިއާ އެކު  ޗޮއި ސޫން-ސިލް ވެސް ހާޒިރު ކުރިއެެވެ.

ޕާކް ގުން-ހައި ވެގެން ގޮސްފައި ވަނީ ދެކުނު ކޮރެއާގައި، ކޮރަޕްޝަނުގެ ތުހުމަތުގައި ޝަރީއަތް ހިންގުނު ތިންވަނަ ލީޑަރަށެވެ. އަދި ޑިމޮކްރެޓިކް ހަމަަތަކުން އިންތިޚާބުވެވަޑައިގެންނެވި ފަރާތަކަށް، ފުރަަތަމަ ކޮރަޕްޝަނުގެ ޝަރީއަތް ހިންގޭ ލީޑަރަށެވެ.