ބުދަ ދުވަހު ގެއްލުނު މިޔަންމާގެ އަސްކަރީ މަތިންދާ ބޯޓުން ދަތުރުކުރި 29 މީހެއްގެ ހަށިގަނޑު ބުރާސްފަތި ދުވަހު ފެނިއްޖެ އެވެ.
ވެއްޓުނު ބޯޓުގައި 122 ޕަސެންޖަރުން ތިބިއިރު، މިޔަންމާގެ ނޭވީ އާއި އާންމުންގެ ކަނޑު ބޯޓުތަކުގައި ކުރި މަސައްކަތުން މިޔަންމާގެ އައްސޭރިފަށުގެ ޓައުނެއް ކަމަށްވާ ލޯންގްލޮންއާ ގާތުގައި އޮންނަ އަންޑަމަން ކަނޑުން 21 މީހެއްގެ ހަށިގަނޑު އަދި އަށް ކުޑަކުދިންގެ ހަށިގަނޑު ފެނިފައިވެއެވެ.
ފެނުނު މީހުންގެ ހަށިގަނޑު ވަރަށް ބޮޑަށް ހަލާކުވެފައިވާ ކަމަށް އޮފިޝަލުން ބުނާއިރު ލައިފް ޖެެކެޓް އަޅައިގެން ހުރި އެއްވެސް މީހެއްގެ ހަށިގަނޑު ފެނިފައިނުވާ ކަމަށް ރިޕޯޓުތައް ބުނެއެވެ.
ބޯޓު ވެއްޓެން ދިމާވީ ކީއްވެ ކަމެއް އަދި ނޭނގެއެވެ.
ބޯޓުގެ ބައިތައްވެސް އަންޑަމަން ކަނޑުން ފެނިފައިވާ ކަމަށް ރިޕޯޓުތައް ބުނެއެވެ.
ފްލައިޓް ދަތުރުކުރަމުންދިޔައީ ބައިގަޑިއިރުގެ ކުރު ރާސްތަ ދަތުރެއްގައި ކަމަށްވާއިރު ބޯޓު ދަތުރު ކުރި ސަރަހައްދުގެ މޫސުން ގޯސްކަމުގެ އެއްވެސް ރިޕޯޓެއް ލިބިފައެއް ނުވެއެވެ.
އަސްކަރިއްޔާއިން ބުނާ ގޮތުގައި ވެއްޓުނު ބޯޓަކީ މިދިޔަ އަހަރުގެ މާޗް މަހު ގަނެފައިވާ ފްލައިޓެކެވެ. އަދި 809 ގަޑިއިރު ހަމަކޮށްފައި ވެއެވެ.
މި ފަހުގެ އަހަރުތަކުގައި މިޔަންމާގައި ވަނީ މަތިންދާ ބޯޓް ވެއްޓުމުގެ ބައެއް ހާދިސާތައް ހިނގާފައެވެ.
