އިޓާލިއަން ލީގުގައި ޖެނޯއީ އިން ވަރުގަދަ އޭސީ މިލާން ބަލިކޮށްފިއެވެ.

ކޮރޯނާވައިރަސް (ކޮވިޑް-19) ގެ ސަބަބުން ސަޕޯޓަރުން ނުވައްދާ ކުޅުނު މި މެޗު ޖެނޯއާއިން ކާމިޔާބުކުރީ 2-1 ގެ ނަތީޖާ އަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް މެޗުގެ ވަރަށް ކުރީކޮޅު ޖެނޯއާއިން ވަނީ ލަނޑު ޖަހާ ލީޑު ނަގައިފައެވެ. ސަނަބްރިއާ ނަގައިދިން ހުރަހަކުން މި ލަނޑު އެޓީމަށް ކާމިޔާބުކޮށްދިނީ ގޯރަން ޕެންޑޭވް އެވެ.

މި ލަނޑާއި އެކު މިލާނުން އެޓީމުގެ ކުޅުން ރަނގަޅުކޮށް ޖެނޯއާގެ ގޯލަށް ނުރައްކާ ކޮށްފައިވެއެވެ. މެޗުގެ ފުރަތަމަ ހާފު ނިމުމުގެ ކުރިން މިލާނުގެ ޒަލަޓާން އިބްރަހިމޮވިޗް އަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. އޭރިއާ ތެރެއިން ހުހައް ހުރެ އޭނާ ފޮނުވައިލި ބޯޅަ ޖެނޯއާގެ ކީޕަރު ވަނީ ހުށިޔާރުކަމާއިއެކު ދިފާއުކޮށްފައެވެ.

ޖެނޯއާއިން ވަނީ މެޗުގެ ފުރަތަމަ ހާފު ނިމުމުގެ ކުރިން އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ބިރުޝީގެ ހުރަހަކުން ފްރެންސިސްކޯ ކެސާޓާ އެވެ.

މެޗުގެ ދެވަނަ ހާފުގައި މިލާނުން އެޓީމުގެ ކުޅުން ރަނގަޅުކުރި އިރު އެޓީމުން ވަނީ ޖެނޯއާ ގޯލަށް ގިނަ ހަމަލާތަކެއް ފޮނުވައިލައިފައެވެ. ނަމަވެސް މިހާފުގައި ޖެނޯއާއިން ވަނީ ވަރުގަދަ ޑިފެންސެއްކޮށް މިލާނުގެ ހަމަލާތައް ހުއްޓުވައިފައެވެ. ނަމަވެސް މެޗުގެ 77 ވަނަ މިނެޓުގައި އިބްރަހިމޮވިޗް ވަނީ ލަނޑު ޖަހާ ފަރަގު ކުޑަކޮށްފައެވެ.

މި ނަތީޖާ އާއި އެކު މިލާނުން އޮތީ އިޓާލިއަން ލީގު ތާވަލުގެ 7 ވަނައިގައި 26 މެޗުން ލިބުނު 36 ޕޮއިންޓާއެކުގައެވެ. އަދި މެޗުން މޮޅުވި ޖެނޯއާ އޮތީ ކުޅުނު 26 މެޗުން ލިބުނު 25 ޕޮއިންޓާއެކުގައެވެ. ލީގު ތާވަލުގެ އެއްވަނައިގައި އޮތް ލާޒިއޯ އަށް 26 މެޗުން 62 ޕޮއިންޓް ލިބިފައިވާއިރު ދެވަނައިގައި އޮތް ޔުވެންޓަސް އަށް 25 މެޗުން ލިބިފައިވަނީ 60 ޕޮއިންޓެވެ.