ކްރިސްޓަލް ޕެލަސްއިން ފަހަތުންއަރާ ޗެލްސީ ބަލިކޮށްފި

އިނގިރޭސި ޕްރިމިއާ ލީގުގައި ކްރީސްޓަލް ޕެލަސްއިން ފަހަތުންއަރާ ވަރުގަދަ ޗެލްސީ ބަލިކޮށްފި އެވެ. ހޮނިހިރު ދުވަހުގެ ރޭ އަމިއްލަ ދަނޑުގައި ކުޅެމުންދިޔަ ޗެލްސީގެ މައްޗަށް ކުރިސްޓަލް ޕެލަސްއިން ކުރިހޯދީ 2-1 ލަނޑުގެ ނަތީޖާއަކުންނެވެ.

މެޗު ފެށިގެން ފަސްވަނަ މިނެޓުގައި ފެބްރިގާސް ވަނީ ރީތި ލަނޑެށް ކާމިޔާބުކޮއްދީ ޗެލްސީއަށް ލީޑު ނަގާދީފަ އެވެ. ނަމަވެސް ޗެލްސީއަށް ލީޑުގައި މާ ގިނައިރު ދެމި އޮވެވޭ ގޮތެށް ނުވި އެވެ. ކުރިސްޓަލް ޕެލަސްއިން ވަނީ މެޗުގެ ނުވަ ވަނަ މިނެޓުގައި ލަނޑެށް ކާމިޔާބުކޮށް ޗެލްސީ ސިއްސުވާލާފަ އެވެ. މި ލަނޑު އެޓީމަށް ކާމިޔާބުކޮއްދިނީ ވިލްފްރެޑް ޒަޙާ އެވެ. ޗެލްސީގެ ހަތަރު ޑިފެންޑަރުން ފޫއަޅުވާލުމައްފަހު ޒަޙާ ފޮނުވާލި ބޯޅަ އަމާޒުވީ ސީދާ ގޯލުގެ ތިރީ ކަނަށެވެ.

އޭގެ ދެމިނެޓް ފަހުން އަނެއްކާވެސް ކުރިސްޓަލް ޕެލަސްއިން ވަނީ ލަނޑެށް ކާމިޔާބުކޮށް މެޗުގެ ލީޑު އަތުލާފަ އެވެ. މެޗުގެ އެގާރަ ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ ކްރިސްޓިއަން ބެންޓެކޭ އެވެ. ޗެލްސީގެ ތިން ޑިފެންޑަރުން ކައިރިން ނައްޓާލުމައްފަހު ބެންޓެކޭ މި ލަނޑު ކާމިޔާބުކޮއްފައިވަނީ ކީޕަރު ކައިރިންވެސް ކަޓުވާލުމައްފަހު އެވެ.

މި ލަނޑައްފަހުވެސް ޗެލްސީއަށް ވަނީ ނަތީޖާ ހަމަހަމަ ކުރަން ރަނުގެ ފުރުސަތުތަކެށް ލިބިގެން ގޮސްފަ އެވެ. ނަމަވެސް ޗެލްސީގެ ގިނަ ހަމަލާތަކެއްގެ ޝިކާރައަކައްވީ ކުރިސްޓަލް ޕެލަސްގެ ގޯލްކީޕަރެވެ.

މެޗައްފަހު ވާހަކަ ދައްކަމުން ޗެލްސީގެ ކޯޗް ކޮންޓޭ ވަނީ މެޗުން ޗެލްސީ ބަލިވުން ހައްގު ނޫން ކަމަށްބުނެ ނަތީޖާ އާއި މެދު ހިތްހަމަ ނުޖެހުން ފާޅުކޮއްފަ އެވެ. ނަމަވެސް ކޮންޓޭ ބުނީ، މިއީ ފުޓުބޯޅަ ކަމަށާ އެހެންކަމުން މި ނަތީޖާ ގަބޫލު ކުރާ ކަމަށެވެ.

މެޗުން ޗެލްސީ ބަލިވި ކަމުގައިވިޔަސް އަދިވެސް ޗެލްސީ އޮތީ ލީގު ތާވަލުގެ އެއްވަނާގަ އެވެ. ކުޅުނު 29 މެޗުން 69 ޕޮއިންޓާއެކު ޗެލްސީ އެއްވަނާގައި އޮތްއިރު ދެވަނާގައި އޮތް ޓޮޓެންހަމް އަށް ކުޅުނު 29 މެޗުން ލިބިފައިވަނީ 62 ޕޮއިންޓެވެ.