އިންޑިއާގެ ކޭސްތައް ދަށަށް، 58 ދުވަހަށް ފަހު 120،529 ކޭސް
5 ޖޫން 2021 | ހޮނިހިރު 07:48ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 28 މިލިއަނަށް އަރާފައި
އިންޑިއާގެ ކޮވިޑް-19ގެ ހާލަތު ދަނީ މަޑުމަޑުން ރަނގަޅުވަމުން
އިންޑިއާގައި ކޮވިޑް-19ގެ ކޭސްތައް ދަށަށް ދާން ފަށައިފިއެވެ. ގާތްގަޑަކަށް 58 ދުވަހަށް ފަހު ފުރަތަމަ ފަހަރަށް އެއްދުވަހާ ޕޮޒިޓިވްވި މީހުންގެ އަދަދު 120،529 އަށް ވަނީ ދަށްވެފައެވެ.
އިންޑިއާއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު 28،694،879ށް ވަނީ މިހާރު އަރާފައެވެ. އަދި ފާއިތުވި 24 ގަޑިއިރުގެ ތެރޭގައި 3,380 މީހުން މަރުވެ އެގައުމުން ބަލީގައި މަރުވި މީހުންގެ ޖުމްލަ އަދަދު ވަނީ 344,082ށް އަރާފައެވެ.
އޭގެ އިތުރުން އެގައުމުން ބައްޔަށް ޕޮޒިޓިވްވި މީހުންގެ ތެރެއިން ބަލިން ރަނގަޅުވާ މީހުންގެ އަދަދުވެސް ވަނީ އިތުރުވާން ފަށާފައެވެ. އެގޮތުން ފާއިތުވި 23 ދުވަހު އެގައުމުން ބައްޔަށް ޕޮޒިޓިވްވާ މީހުންނަށްވުރެ ބަލިން ރަނގަޅުވާ މީހުންގެ އަދަދު އިތުރެވެ. ފާއިތުވި 24 ގަޑި އިރުވެސް 197,894 މީހުން ވަނީ ބަލިން ރަނގަޅުވެފައެވެ. 1،555,248 މީހުން މިވަގުތު އިންޑިއާގައި ބައްޔަށް ފަރުވާ ހޯދަމުންދާއިރު، 26،700،000ށް ވުރެ ގިނަ މީހުން ވަނީ ބަލިން ރަނގަޅުވެފައެވެ.
އިންޑިއާއިން ކޮވިޑްގެ ބޮޑު ރާޅަކާއި ކުރިމަތިލަމުންދާއިރު ފާއިތުވާ ތިން ހަފުތާގައި އެކަނިވެސް އެގައުމުން 85،000ށް ވުރެ ގިނަ މީހުން ވަނީ މަރުވެފައެވެ.
