އިންޑިއާގެ ނިއުދިއްލީން އިތުރު މީހަކު ކޮވިޑް-19 އަށް ޕޮޒިޓިވްވެއްޖެ

ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ނޮވެލްކޮރޯނާވައިރަސް (ކޮވިޑް-19) އަށް އަވައްޓެރި އިންޑިއާގެ ވެރިރަށް ނިއުދިއްލީގެ އިތުރު މީހަކު ޕޮޒިޓިވްވެއްޖެއެވެ.

އިންޑިއާގެ ރަސްމީ އިދާރާތަކާ ހަވާލާދީ އެ ޤައުމުގެ ނޫސްތަކުން ރިޕޯޓްކޮށްފައިވާ ގޮތުން ހުކުރު ދުވަހު ކޮވިޑް-19 އަށް ޕޮޒިޓިވް މީހާއަކީ ތައިލޭންޑްއާއި މެލޭޝިއާއަށް ދަތުރުކޮށްފައިވާ މީހެކެވެ. އެގޮތުން އޭނާ މިހާރު ކަރަންޓީން ކުރެވިފައިވާ ކަމަށާއި، އޭނާގެ ހާލު "ސްޓޭބަލް" ކަމަށް މީޑިއާ ރިޕޯޓްތައް ބުނެއެވެ.

އެއާއެކު އަވައްޓެރި އިންޑިއާގައި މި ވައިރަސްއަށް ޕޮޒިޓިވްވި މީހުންގެ އަދަދު މިވަނީ 31 އަށް އަރާފައެވެ. އޭގެ ތެރެއިން 16 މީހުންނަކީ އިޓަލީއަށް ނިސްބަތްވާ މީހުންކަމަށް އިންޑިއާގެ ނޫސްތަކުން ރިޕޯޓްކޮށްފައިވެއެވެ.

ކޮވިޑް-19 އާ ގުޅިގެން އަޅަމުންދާ ފިޔަވަޅުތަކުގެ ތެރެއިން އިންޑިއާގެ 30 އެއާޕޯޓެއްގައި އެކަށީގެންވާ ފެންވަރަށް ވައިރަސްއަށް ސްކްރީން ކުރުމުގެ އިންތިޒާމް ހަމަޖެހިފައިވާ ކަމަށާއި، ހުރިހާ ޤައުމަކުން އަންނަ މީހުންވެސް ސްކްރީން ކުރެވޭނެ ކަމަށް ދިއްލީގެ ޕްރެސް އިންފޮމޭޝަން ބިއުރޯއިން ބުނެއެވެ.

އޭގެ އިތުރުން، ދިއްލީން މި ވައިރަސްއަށް ޕޮޒިޓިވްވެފައިވާ މީހަކު މީގެ ކުރިންވެސް ފެނިފައިވާއިރު، ކޮރޯނާ ވައިރަސްއާއި ބޭހޭ ޢާންމު މަޢުލޫމާތާއި، ސަލާމަތާއި ރައްކަލަށް ކުރެވިދާނެ ކަންކަމާއި ބެހޭ މަޢުލޫމާތު ދިއްލީގެ ސްކޫލްތަކާއި ޙިއްސާކޮށް، ހޭލުންތެރިކުރުވުގެ ޕްރޮގުރާމުތައް އެހިސާބުން ވަނީ ވަރުގަދަކޮށްފައެވެ.

ކޮވިޑް-19 އެކި ޤައުމުތަކުގައި ހަލުވިކަމާއެކު ފެތުރެމުންދާއިރު، އެންމެ ފަހުގެ ތަފާސްހިސާބުތައް ދައްކާގޮތުން ކޮރޯނާވައިރަސް ޖެހުނު މީހުންގެ އަދަދު 97,981 އަށް އަރާފައިވާއިރު، މަރުވި މީހުންގެ އަދަދު 3,381 އަށް ވަނީ އަރާފައެވެ.