ދިވެހިރާއްޖޭގައި އޮތް އެންމެ ދުވަސްވީ އެއް ފުޓްބޯޅަ ޓީމު ކަމުގައިވާ ނިއުރޭޑިއަންޓް ސްޕޯޓްސް ކްލަބުގެ މަސައްކަތް ދެ ގިޔަރަށް ކުރިޔަށް ޖައްސާލާ އެ ކްލަބުގެ އައު ޗެއާމަންގެ މަގާމަށް ހދ. ނޮޅިވަރަމު ދާއިރާގެ މަޖިލިސް މެމްބަރު މުހައްމަދު ނަޝީދު އަބްދުﷲ (މޮސްޓާ) ހަމަޖައްސައިފި އެވެ.

ނިއުރޭޑިއަންޓުން މިކަން އިއުލާނުކޮށްފައިވަނީ އަންގާރަ ދުވަހުގެރޭއެވެ.

ޗެއާމަންގެ މަގާމަށް މޮސްޓާ ހަމަޖެއްސިއިރު އެ ކްލަބުން އަންގާރަ ދުވަހުގެރޭ ވަނީ ވައިސް ޗެއާމަނާއި ބޯޑު މެމްބަރުންގެ ގޮތުގައި ހަތް މެމްބަރުން ހަމަޖައްސާފައެވެ. ވައިސް ޗެއާމަނުގެ މަގާމަށް ހަމަޖެއްސީ ކުރިން އެކްޓިން ޗެއާމަންގެ މަގާމުގައި ހުރި ސައްޔިދު އަލީ އެވެ. އަދި ބޯޑު މެމްބަރުންގެ ގޮތުގައި ހަމަޖެއްސީ ޒަހީނުއްދީން ސައީދާއި، ހުސައިން ޝާމް އާދަމާއި، ހަސަން ހުސައިން އާއި، އަބްދުލްމުއިޒް މުސްތަފާ އާއި، އަހުމަދު ޝިޔާމާއި، އަހުމަދު ވާސިފް އަދި އިސްމާއިލް ރަޝީދު އެވެ.

ކުޅުންތެރިންނަށް މުސާރަ ނުދީގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ސަސްޕެންޑްކޮށްފައިވާ ނިއުރޭޑިއަންޓުގެ ސަސްޕެންޝަން މިދިޔަ އަހަރު އެފްއޭއެމްގެ އަހަރީ އާންމު ޖަލްސާގައި ކްލަބުތަކުން ވަނީ ދަމަހައްޓާފައެވެ. އެކަމަކު މިމަހު އޮންނަ އަހަރީ އާންމު ޖަލްސާގައި އެ ސަސްޕެންޝަން އުވާލުމުގެ ފުރުސަތު އެބައޮތެވެ. އެއާއެކު ނިއުރޭޑިއަންޓުގެ ސަޕޯޓަރުން އަންނަނީ ނިއުރޭޑިއަންޓަށް ދިމާވެފައިވާ ހާލަތުން އަރައިގަތުމަށް ހާއްސަ މަސައްކަތްތަކެއް ކުރަމުންނެވެ.

ފުޓްބޯޅައިގެ ހުރިހާ ކަމަކުން މިދިޔަ އަހަރު ނިއުރޭޑިއަންޓް ސަސްޕެންޑު ކުރިއިރު، ނިއުރޭޑިއަންޓުން ދިވެހި ކުޅުންތެރިންނަށް މުސާރައިގެ ގޮތުގައި 2.4 މިލިއަން ރުފިޔާ ދޭން އޭރު ޖެހުނެވެ. އެކަމަކު އެފްއޭއެމްގައި ހުރި ނިއުރޭޑިއަންޓުގެ ފައިސާއިން ދިވެހި ކުޅުންތެރިންނަށް ވަނީ މިހާރު މުސާރަ ދީފައެވެ. ނަމަވެސް އަފްޣާނިސްތާނުގެ ޑިފެންޑަރު ހާރޫން އަމީރީ އަށް މުސާރައިގެ ގޮތުގައި އަދި އުސޫލުން ބޭރުން އެއްބަސްވުން ބާތިލުކޮށްފައިވާތީ 703،707 (ހަތްލައްކަ ތިންހާސް ހަތްސަތޭކަ ހަތް ރުފިޔާ) ދޭން ފީފާއިން ވަނީ ނިއުރޭޑިއަންޓަށް އަންގާފައެވެ. އަދި ކުރީގެ ކޯޗު ބެނާޑޯ ޓަވަރޭޒް އަށް 511،342 (ފަސްލައްކަ އެގާރަހާސް ތިންސަތޭކަ ސާޅީސްދެ ރުފިޔާ) ދޭންވެސް ވަނީ އަންގާފައެވެ.