ޔޫކްރޭނުން ކޮރޯނާވައިރަސް ފެނިއްޖެ

ހަލުވިކަމާއި އެކު ފެތުރެމުންދާ ކޮވިޑް-19 ޖެހިފައިވާ މީހަކު ޔޫކްރޭނުން ފެނިފައިވާ ކަމަށް އެ ޤައުމުގެ ހެލްތު މިނިސްޓްރީން ބުނެފިއެވެ.

އަންގާރަ ދުވަހު ނޫސްވެރިންނަށް މަޢުލޫމާތު ދެއްވަމުން ޔޫކްރޭންގެ ހެލްތު މިނިސްޓްރީގެ ޑެޕިއުޓީ ހެލްތު މިނިސްޓަރު ވިކްޓަރ ވިދާޅުވީ، ކޮރޯނާވައިރަސްގެ ޢަލާމާތްތައް ފެނުނު ފިރިހެނަކު ހޮނިހިރު ދުވަހު ހޮސްޕިޓަލުގައި އެޑްމިޓް ކުރި ކަމަށެވެ. އެ މީހާ އެޑްމިޓް ކޮށްފައިވަނީ އިޓަލީގައި ޗުއްޓީ ހޭދަކުރަމަށް ފަހު ޔޫކްރޭނަށް އައިތާ ދިން ދުވަސް ފަހުން ކަމަށް ހެލްތު މިނިސްޓްރީން ވަނީ ބުނެފައެވެ.

ވިކްޓަރަ ލިޔަޝްކޯފް ވިދާޅުވީ، ވައިރަސް ފެނުނު ފިރިހެން މީހާގެ ޙާލު ރަނގަޅު ކަމަށާއި، އޭނާގެ އަންހެނުން، އެ މީހުން ދިރިއުޅޭ ގޭގައި ކަރަންޓީނު ކޮށްފައިވާ ކަމަށެވެ. މީޑިއާތަކުން ރިޕޯޓުކުރާ ގޮތުން، އެ ދެމަފިރިން އިޓަލީގައި ޗުއްޓީ ހޭދަކުރުމަށް ފަހު ދަތުރުކޮށްފައިވަނީ، ފްލައިޓުގައި އިޓަލީގެ ރޯމްއިން ރުމޭނިޔާއަށެވެ. އޭގެ ފަހުން ޔޫކްރޭނަށް ދަތުރުކޮށްފައިވަނީ އެއްގަމު މަގުގައެވެ.

ރުމޭނިޔާއާއި، ޔޫކްރޭން ގުޅޭ ބޯޑަރުގެ ޗްކްޕޮއިންޓުން އެ މީހުންގެ ހަށިގަނޑުގައި ހުން ހުރިތޯ ބެލި ކަމަށާއި، އެކަމަކު ހުން ހަށިގަނޑުގައި ހުރިކަން އޭރު ދައްކާފައިނުވާ ކަމަށްވެސް ރިޕޯޓުތައް ބުނެއެވެ.

ޔޫކްރޭންގެ ހެލްތު މިނިސްޓްރީން ބުނީ، ކޮވިޑް-19 ޕޮޒިޓިވްވި މީހާއާ ކޮންޓެކްޓް ވެފައިވާ މީހުން ހޯދައިގަތުމުގެ މަސައްކަތްކުރާ ކަމަށެވެ.

ޗައިނާއިން ފެތުރެމުންދާ ކޮވިޑް-19 އަށް މިހާތަނަށް 85,000 މީހަކު ޕޮޒިޓިވް ވެފައެވެ. އަދި ބަލީގައި މަރުވި މީހުންގެ ޢަދަދު 3،000 އަށް އަރައެވެ.