ފިލިޕީންސް ކެސީނޯ ކޮމްޕްލެކްސް ހަމަލާ: 34 މީހެއްގެ ހަށިގަނޑު ފެނިއްޖެ
މިއީ ވައްކަންކުރުމަށް ދިން ހަމަލާއެއް ކަމަށް ފުލުހުން ބުނޭ
މިއީ ޓެރަރިސްޓް ހަމަލާއެއް ކަަމަށް ނުބެލެވޭ ކަމަށް އޮފިޝަލުން ވަނީ ބުނެފައި
ފިލިޕީންސްގެ ކެސީނޯ އަދި ހޮޓެލް ކޮމްޕްލެކްސްއެއްގައި މީހަކު ބަޑިން ހަމަލާ ދިން ހާދިސާގައި މަރުވެފައިވާ 34 މީހެއްގެ ހަށިގަނޑު ފެނިފައިވާ ކަމަށް އޮފިޝަލުން ބުނެފިއެވެ.
ރިޕޯޓުތައް ބުނާ ގޮތުން ގިނަ މީހުން މަރުވެފައި ވަނީ ކެސީނޯ މޭޒުތަކުގައި އަލިފާން ރޯކޮށްލުމުގެ ސަބަބުން ބޯ ދުމުގެ އަސަރު މީހުންނަށް ކޮށް، ނޭވާ ހާސްވެގެންނެވެ.
ހުކުރު ދުވަހު ދަންވަރުގެ ވަގުތެއްގައި "ރިޒޯޓް ވާލްޑް މެނީލާ" އަށް ބަޑިން ހަމަލާ ދޭން ފަށާފައި ވަނީ ތަނުގެ ޓީވީ މޮނީޓަރުތަކަށް ބަޑި ޖަހަމުންނެވެ.
ފުލުހުން ފަހުން ބުނެފައި ވަނީ ހަމަލާ ދިން މީހާ ވަނީ އޭނާ އަމިއްލައަށް ގައިގައި އަލިފާން ރޯކޮށްގެން މަރުވެފައި ކަމަށެވެ.
ކަމާބެހޭ އޮފިޝަލުން ބުނީ މިހަމަލާއަކީ ހަގީގަތުގައި ވައްކަން ކުަރަން އުޅުމުގެ ހާދިސާއެއް ކަމަށާއި، މިއީ ޓެރަރިޒަމާ ގުޅޭ ކަމެއް ނޫން ކަމަށެވެ. އޮފިޝަލުން މިހެން ބުނި ނަމަވެސް އައިއެސް އިން އިން ވަނީ މި ހަމަލާގެ ޒިންމާ ނަގާފައެވެ.
ހަމަލާ ދިން މީހާގެ ނަން އާންމުކޮށްފައި އަދި ނުވާއިރު ރައިފަލެއް ބޭނުންކޮށްގެން ހަމަލާދިން މީހާއަކީ ސިކުނޑީގެ އުނިކަމެއް ހުންނަ މީހަކަށް ފަހަރުގައި ވެދާނޭ ކަމަށް އޮފިޝަލުން ބުނެފައި ވެއެވެ.
