ކޮވިޑް-19: އިނގިރޭސިވިލާތުގެ ސިފައިން ތައްޔާރީ ހާލަތައް
4 މާރިޗު 2020 | ބުދަ 02:19''ބެޓްލް'' ޕްލޭން ގައި ހަތަރު ސްޓޭޖެއް ހިމެނޭ
އިނގިރޭސިވިލާތުގެ ބޮޑު ވަޒީރު، އެގައުމުގެ ސިފައިންނާ އެކު
އިނގިރޭސިވިލާތުގައި ކޮވިޑް-19 ފެތުރޭ ޢަދަދު އިތުރުވެއްޖެ ޙާލަތެއްގައި ފުލުހުންނަށް ބޭނުންވާ އެހީތެރިކަން ފޯރުކޮށްދިނުމަށް އިނގިރޭސި ސިފައިން ތައްޔާރީ ޙާލަތުގައި ތިބޭނެ ކަމަށް އެޤައުމުގެ ބޮޑު ވަޒީރު ބޮރިސް ޖޯންސަން ވިދާޅުވެއްޖެއެވެ.
އިނގިރޭސީ ސަރުކާރުން ވަނީ، ކޮވިޑް-19 އިން ރައްކާތެރިވުމުގެ ގޮތުން އަޅާނެ ފިޔަވަޅުތައް ހިމެނޭ ''ބެޓްލް ޕްލޭން'' އެއް އެކުލަވާލައި އެ ޕްލޭން ޝާއިޢުކޮށްފައެވެ. އެ ޕްލޭންގައިވާ ގޮތުން ވައިރަސް މާ ގަދަޔަށް ފެތުރިއްޖެ ޙާލަތެއްގައި ސްކޫލުތައް ބަންދުކުރުމާއި، މީހުން ގިނައިން އެއްވެ ބާއްވާ ޙަފުލާތައް ކެންސަލް ނުވަތަ ފަސްކުރެވިގެން ދާނެއެވެ.
ކޮރޯނާވައިރަސް ފެތުރޭ ޢަދަދު އިތުރުވެއްޖެ ޙާލަތެއްގައި، ފުލުހުންގެ ޢަދަދު މަދުވެއްޖެނަމަ ސިފައިން ނެރޭނެތޯ އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ސުވާލު ކުރުމުން ބޮރިސް ވިދާޅުވީ، ސިފައިން އަބަދުވެސް ތިބޭނީ ފުލުހުންނަށް އެހީވެދިނުމަށް، ތައްޔާރީ ޙާލަތުގައި ކަަމަށެވެ. އެކަމަކު އެއީ ޙާލަތު ވަރަށް ގޯސްވުމުންކަން އޭނާ ފާހަގަކުރެއްވިއެވެ.
އިނގިރޭސިވިލާތުގެ 51 މީހެއްގެ ގައިން ވައިރަސް ފެނިފައިވެއެވެ. އެކަމަކު ކޮވިޑް-19 ފެތުރުން ހުއްޓުވުމަށް އެއްވެސް ސިޓީއެއް ލޮކް ޑައުން އަދި މިހާތަނަށް ކޮށްފައެއް ނުވެއެވެ. އިނގިރޭސިވިލާތުގެ ޗީފް މެޑިކަލް އޮފިސަރަ ކްރިސް ވިޓީ ވިދާޅުވީ، ލޮކްޑައުން ކުރުމަކީވެސް އޮތް ފުރުޞަތެއް ކަމަށެވެ.
އެކަމަކު ކުރިއަށް އޮތް ތަނުގައި އެފަދަ ފިޔަވަޅެއް އެޅުން ވަރަށް ގާތް ކަމަށް އޭނާ ވިދާޅުވިއެވެ.
