ކުރީގެ ރައީސް ޔާމީނާއެކު އެއްވެސް ޑީލެއް ހަދާފައިނުވާނެ: މިނިސްޓަރު އިމްރާން
3 މާރިޗު 2020 | އަންގާރަ 03:40ޑީލެއް ހަދަންޖެހޭ އެއްވެއް ސަބަބެއް ނެތް
މިނިސްޓަރު އިމްރާން އާއި ކުރީގެ ރައީސް އަބްދުﷲ ޔާމީން
ޖަލު ޙުކުމެއް ތަންފީޒުކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީނާއި އެއްވެސް ޑީލެއް ހަދާފައިނުވާނެ ކަމަށް ހޯމް މިނިސްޓަރު އައްޝައިޚް އިމްރާން ޢަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގުރާމުގައި މިނިސްޓަރު އިމްރާން ވިދާޅުވީ ރައީސް ޔާމީނާއި ޑީލް ހެދި ވާހަކަތައް އޭގެ ޒާތައް ބަލާއިރު ކުޑަކޮށް ހިނި އަންނަ ކަހަލަ ވާހަކައެއް ކަމަށެވެ. ރައީސް ޔާމީނުގެ އެންމެ ބާރާއި ނުފޫޒުގައި ހުންނެވިއިރު ޑީލްއެއް ހުށަހެޅުއްވި ކަމަށާއި، ނަމަވެސް އެޑީލް ނުހަދާކަން ރާއްޖޭގެ ހުރިހާ ރައްޔިތުންނަށް އެނގޭނެ ކަމަށް މިނިސްޓަރު އިމްރާން ވިދާޅުވިއެވެ. އަދި ވިދާޅުވީ މިހާރު ރައީސް ޔާމީނުގެ އެއްވެސް ބާރުވެރިކަމެއް ނެތް ޙާލަތުގައި ޑީލެއް ހަދަންޖެހޭ ހިސާބަށް ނުދާނެ ކަމަށެވެ.
މިނިސްޓަރު އިމްރާން ވިދާޅުވީ މިސަރުކާރުން އެއްވެސް މީހާކާ ނުވަތަ ޒާތީ ގޮތުން އަނިޔާވެރި ޢަމަލެއް ނުހިންގާނެ ކަމަށާއި، ޒާތީ ގޮތުން އަދަބެއް ނުދޭނެ ކަމަށެވެ. އަދި އެ އުޞޫލުން ކަންކަން ކުރިއަށްދޭތޯ ކަށަވަރުކުރަން ބޭނުންވާ ކަމަށް މިނިސްޓަރު ވިދާޅުވިއެވެ.
ރައީސް ޔާމީނާ ބައްދަލުކުރީ ހޯމް މިނިސްޓަރުގެހައްޞިއްޔަތުންކަން ފާހަގަކުރައްވައި މިނިސްޓަރު އިމްރާން ވިދާޅުވީ ޖަލަށް ވަޑައިގެންނެވީ، އަސާސީ ޙައްޤެއް އުނިވޭތޯއާއި، ލާއިންސާނީ ގޮތެއްގައި ޢަމަލުކުރޭތޯއާއި އަދި ޖަލުގެ ޙާލަތު ބައްލަވަން ކަމަށެވެ.
މިނިސްޓަރު އިމްރާން ވިދާޅުވީ ރައީސް ޔާމީނަށް އެއްވެސް އަސާސީ ޙައްޤެއް ގެއްލިފައިވޭތޯ އަދި އެމަނިކުފާނަށް އިތުރަށް ކަންކަން ރަނގަޅުކުރަން ޖެހޭތޯ މިބައްދަލުވުމުގައި ބެލުނު ކަމަށާއި، ޑޮކްޓަރު އިރުޝާދުދީފައިވާ ގޮތަށް ބޭސްފަރުވާގެ ކަންކަން ހަމަޖެހޭނެކަމުގެ ޔަޤީންކަން ރައީސް ޔާމީނަށް ދެއްވި ކަމަށެވެ. އަދި އެ ބައްދަލުވުމުގައި ރައީސް ޔާމީނުގެ ސަރުކާރުގެ ދެވަނަ ނައިބު ރައީސް އަޙްމަދު އަދީބުގެ ގޯސް، އަނިޔާވެރި ވާހަކަތަކާއި އަދީބު ޢަމަލުކުރައްވާފައި ގޮތުގެ ވާހަކަތައް ރައީސް ޔާމީން ދެއްކެވި ކަމަށާއި، އެވާހަކަތައް އަޑުއެއްސެވި ކަމަށް މިނިސްޓަރު އިމްރާން ވިދާޅުވިއެވެ.
ރައީސް ޔާމީނާ ޑީލްއެއް ހަދަންޖެހޭ އެއްވެސް ސަބަބެއް ނެތް ކަމަށާއި، އެފަދަ ކަމެއް ނުކުރައްވާނެކަމުގެ ޔަޤީންކަން މިނިސްޓަރު އިމްރާން ދެއްވިއެވެ.
މިނިސްޓަރު އިމްރާން ވިދާޅުވީ ސަރުކާރު ދަމަހައްޓަން ކުރެވެން ހުރި އިޚުލާސްތެރި މަސައްކަތްތައް ކުރައްވާނެ ކަމަށެވެ.
