ރައްޔިތުންނަށް ރަނގަޅަށް ޚިދުމަތް ފޯރުކޮށްދިނުމަށް ކޯލިޝަންގެ ލީޑަރުން ވުޒާރާތަކާ ހަވާލުވުމަށް މެންބަރު ހަލީމް ގޮވާލައްވައިފި
2 މާރިޗު 2020 | ހޯމަ 10:00ސަރުކާރު ތަންކޮޅެއް ލަސްކޮށް އުޅޭކަމަށް ބޭފުޅުންނަށް ދެކެވޭ ދެކެވުމަކީ ކޯލިޝަންގެ މައްސަލައެއް ކަމަށް ގަބޫލުކުރައްވާ ކަމަށް އަހުމަދު ހަލީމު ވިދާޅުވި
ބިލެތްދޫ ދާއިރާގެ އަހުމަދު ހަލީމު
ސަރުކާރު ހިންގާ ކޯލިޝަން ބަދަހިކޮށް ބޭއްވުމަށާއި ރައްޔިތުންނަށް ރަނގަޅަށް ޚިދުމަތް ފޯރުކޮށްދިނުމަށް ކޯލިޝަންގެ ލީޑަރުން ސަރުކާރުގެ ވުޒާރާތަކާއި ހަވާލުވުމަށް ބިލެތްދޫ ދާއިރާގެ އެމްޑީޕީ މެންބަރ އަހުމަދު ހަލީމް(ދޮންބިލެއް) ގޮވާލައްވައިފި އެވެ.
ދިވެހިރާއްޖޭގެ ހަކަތައިގެ ބިލަށް ބަހުސްކުރައްވަމުން އަހުމަދު ހަލީމު ވިދާޅުވީ ރައްޔިތުން ކޯލިޝަން ސަރުކާރު ހޮވާފައިވަނީ ކޯލިޝަން ސަރުކާރެއް ބަދަހިކޮށް އޮވެގެން ކަމަށް ގަބޫލުކުރެވިގެން ކަމަށެވެ. އެހެންނަމަވެސް ސަރުކާރު ތަންކޮޅެއް ލަސްކޮށް އުޅޭކަމަށް ބޭފުޅުންނަށް ދެކެވޭ ދެކެވުމަކީ ކޯލިޝަންގެ މައްސަލައެއް ކަމަށް ޤަބޫލުކުރައްވާ ކަމަށް އަހުމަދު ހަލީމު ވިދާޅުވި އެވެ. ކޯލިޝަނާ ހެދި ކަންކަން ނުކުރެވިގެން ލަސްވެގެންދާ ކަމަށް ޤަބޫލުކުރައްވާ އަހުމަދު ހަލީމު ވިދާޅުވި އެވެ.
ހަލީމު ވިދާޅުވީ މިހާރުވެސް ކޯލިޝަންގެ އެއް ވަޒީރަކު ރަނގަޅު ނަމޫނާއެއް މިކަމުގައި ދައްކަވަމުން ގެންދަވާކަމަށެވެ. އެގޮތުން ހޯމް މިނިސްޓަރަކަށް ހުންނެވި އަދާލަތު ޕާޓީގެ ލީޑަރ އައްޝައިޚް އިމްރާން އަބްދުﷲ ގެ ނަން ފާހަގަކުރައްވާ އަހުމަދު ހަލީމު ވިދާޅުވީ މަޖިލީހުން ތެލިފޮޅިގެން ފުލުހުންނަށް ޤާނޫނަކުން ބާރުދީފައިވާ ކަަމަށެވެ.
މީގެއިތުރުން މިހާރު ލީކުވެގެން އުޅޭ އޯޑިއޯތަކަށް އިޝާރާތްކުރައްވާ އަހުމަދު ހަލީމު ވިދާޅުވީ ޖުމްހޫރީ ޕާޓީގެ ލީޑަރ ގާސިމު ވަޒީރު ކަމުގައި ހުންނެވިނަމަ މިހާރު އެ ނިކުންނަ އޯޑިއޯ އާއި ވީޑިއޯ ފަދަ ތަކެތި ނުނިކުންނާނެ ކަމަށެވެ.
މިފަހަކަށް އައިސް ރައްޔިތުންގެ މަޖިލީހުގައި ތިއްބަވާ އެމްޑީޕީގެ މެންބަރުން ގެންދަވަނީ ކޯލިޝަންގައި ހިމެނޭ އެހެން ޕާޓީތަކަށް ވަކިން ޚާއްޞަކޮށް ކޯލިޝަންގައި ހިމެނޭ އެހެން ވުޒާރާތަކުގެ ވަޒީރުންނަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުންނެވެ. އެގޮތުން ފިޝަރީޒް މިނިސްޓަރާއި ހައުސިންގ މިނިސްޓަރ އިސްތިޢުފާ ދެއްވުމަށް މީގެކުރިން މެންބަރުން ވަނީ ގޮވާލައްވާފަ އެވެ. އަދި ކޯލިޝަން ސަރުކާރު ނިމުމަށް ގެނައުމަށްވެސް މެންބަރުން ވަނީ ގޮވާލައްވާފަ އެވެ.
